[中國跑壇] 業餘一哥被揭服食禁藥 越野賽藥檢制度必須完善

李一鵬 (右)

中國反興奮劑中心1月7日公佈，有「上海業餘一哥」之稱嘅李一鵬，被驗出喺2018年淮南馬拉松中使用違禁藥物促紅素 (EPO)，將被褫奪亞軍成績。

李一鵬喺國內跑界享負盛名，全馬最佳時間係上海馬拉松2018嘅2小時26分05秒，而喺芝加哥馬拉松2017，佢喺1500名中國跑手中成績最快。而李一鵬所屬嘅業餘跑會「野蠻部落」，同時大受歡迎。據講要入團一啲都唔易，男會員要全馬sub-3，女會員要有sub-330嘅成績。

為巨大利益鋌而走險

李一鵬並唔係第一位服食禁藥嘅業餘跑手。2018年7月，反興奮劑中心公佈多宗違規個案，當中包括「顏值女王」李文杰及另一位業餘跑手侯艷民。2018年，總共有5位業餘馬拉松跑手，因服食禁藥而被處分，當中有一位更是未成年。

李文杰

或者有人會問，稱得上業餘，跑步只為興趣，食禁藥?

其實，內地跑界近年發展蓬勃，每年多達1000場比賽，主辦單位為催谷報名人數，好多時會聘請「跑界KOL」出戰。這些KOL除了贏得獎金，亦可賺取出場費。有傳李文杰每場比賽可賺取高達數萬收益，一年可賺幾十萬。為咗利益，為咗金錢，這些業餘跑手不惜鋌而走險。

越野賽制度不完善

近年，中國越野賽跑手開始揚威國際，例如 UTMB2018的CCC，祈敏、姚妙分別成為男女子亞軍及冠軍。《南華早報》Mark Agnew 早前就喺專欄撰文，指西方有唔少聲音懷疑，這些國內跑手有否違例服食禁藥出賽。

正如呢篇文章標題所講，喺無證據之下，UTMB賽會唔會假定任何有人有違規行為。不過 Mark 亦提出，現今國際越野跑賽事，仍未有如國際田聯IAAF一套行之有效嘅賽事制度，藥檢制度喺越野賽亦唔常見。喺呢個情況下，唔單止中國，其他國家有心出術跑手，一樣有機可乘。

隨住越野跑風氣越吹越盛，睇嚟推行藥檢制度，只係時間問題。

資料來源: 南華早報、騰訊體育

Fitz連結: https://fitz.hk/?p=112509