----- 廣告 Ad -----
怪事年年有,北方特別多。福建福州市一名音樂老師,有日帶住隔離屋企嘅7歲小朋友小磊一齊跑步,點知跑跑下,小磊突然暈低,老師即 call 十字車到場,可惜經搶救後小磊宣告不治。小磊父母遷怒於老師,仲要求佢賠償50萬元人民幣。老師不服,話父母都有負任,只願意賠10萬。雙方傾唔掂數最後鬧上法庭,案件正在審理之中。
死亡報告話,小磊有心臟問題,唔適宜做運動,而事發當日天氣酷熱,令小磊跑一陣已經支持唔住。
----- 廣告 Ad -----
呢單案件最大爭議,係父母堅決話老師靜靜雞帶小磊出街跑步,問都無問過家長。不過老師有微信對話 cap 圖,真憑實據睇到佢哋要求老師「帶孩子出去操練」。老師亦提及,父母明知小朋友心臟有問題,根本唔應該鼓勵佢去跑步。
7歲小朋友要出街,做父母竟然話唔知道,已經係失職;明知小朋友身體有問題,應該係好好管教佢,減低出事風險運動;到出事之後,苛責出於好心照顧嘅老師,仲要申索賠償,呢對父母簡直係極品。
筆者唔知香港有無呢啲家長,不過各位有教小朋友嘅體育教練,真係要打醒十二分精神。
----- 廣告 Ad -----
資料: 台灣新浪網