我愛上了跑女 她愛上了麥理浩 (中)

前文提要：我娶咗個老婆，佢為咗要收身減肥，結婚前走咗去跑步，仲入埋跑會。一段時間後，佢話要參加毅行者…… (見《我愛上了跑女 她愛上了麥理浩 (上)》)

鳳凰觀日

而結婚一個月紀念，我哋去咗昂坪宿營，理由係佢好想操下山，同埋去鳳凰山睇日出。

結果就係，呢個結婚紀念日嘅宿營，絕對唔溫馨唔浪漫，因為一行人一共有九位男女!

「其實呢，我想問，如果要喺昂坪上鳳凰山山頂睇日出，我哋要幾點開始行上去呢？」

當時我哋企喺心經簡林，望住匿喺雲入面嘅鳳凰山頂，feel到自己有啲腳軟，好擔心我要行足12粒鐘。

「平時我哋行開兩個鐘內，夜行預多半個鐘……四點……三點起行都應該得。」一位叫 Fred 嘅跑會成員，望一望我嘅大肚腩，好慷慨咁畀多一個鐘我。不過，嗰晚我哋老婆喺廚房兩個人洗緊碗嘅時候，老婆同我講:

「Fred問你有無上過鳳凰山，佢話未行過山嘅話，夜晚上去好危險喎……」

就係咁，我哋呢一個結婚周月嘅浪漫約會，我只係留守喺渡假屋，煮定早餐等佢哋睇完日出返嚟食。

講開跑步對我哋相處嘅影響，上面呢件事只係冰山一角。好多問題確實一言難盡。

我正職係揸Uber

兩公婆一部車，原意係兩口子放假時可以揸部車可以去下郊外，唔使一定要留喺市區商場同你逼。不過自己老婆鍾意跑步之後，我就成為佢嘅御用 Uber 司機。

佢有比賽時，朝早未天未光就要送佢去起點，等佢跑完之後，又要送佢，以及送佢班跑友走人。最初都好興奮喺跑道搵個位同佢打氣。但試過多幾次之後，你會發現佢唔係望你唔到，就係嫌你影響佢嘅心情。記得佢第一年參加渣馬全馬，我落住大雨喺西隧等咗佢幾個鐘，諗住拎支水畀佢飲。點知佢回敬我:「成條跑道五公里有個水站，你仲拎支水畀我做乜呀!」二話不說，佢將我支水丟落垃圾桶!

我又加入了Deliveroo

佢參加路跑，我最多都只係做電召的士司機，坐喺車入面等佢幾個鐘。到佢有興趣玩山賽，先至係我惡夢嘅開始。

之前講過，佢六月份成功抽中咗毅行者，成為隊長。六月尾佢已開始密集式操練。我除咗要繼續「揸Uber」，仲要做埋 Deliveroo，定時定候去到「山卡啦」咁遠，送水送食物畀佢哋。嗰一年嘅暑假，我足跡遍及西沙公路嘅水浪窩、西貢井欄樹、大帽山荃錦坳、城門水塘、鶴藪、林村……

最誇張一次，我一個人車住八個人嘅糧水，一共12支寶礦力，加埋八個飯盒，而目的係北潭凹……

嗰陣我對香港郊野一無所知，連北潭涌都未去過，根本唔知西貢有個禁區。到我車住一車糧草去到北潭涌閘口，知道唔入得去嘅時候，我要喺北潭涌停車場等位，等位失敗後揸返部車去西貢墟泊好佢。然後拎住嗰一堆嘢搭的士入北潭凹!

最後，仲畀一班只係等咗十五分鐘嘅人怪責，話我影響佢哋操練嘅節奏!

(三之二，待續)
本文為作者觀點，並不代表Fitz立場

Fitz 連結: https://fitz.hk/?p=100577

更多:
Fitz Facebook 專頁
毒L，跑場覓真愛啦! (下)
毒L，跑場覓真愛啦! (上)
Fitz Running 跑步