債主指定找數戰衣

先旨聲明:本篇文章並無任何高人分析或渣馬完賽秘笈,相反,此乃一名身材肥胖中國籍男子,全馬找數失敗之過程紀錄,當中涉及危險情節及不雅用語,家中小朋友(或任何人)切勿模仿。

欲知前文可重溫以下兩條短片及《[找數真漢子] 抽水抽著火水 抽籤抽中東馬》。

由細到大,我都係一個B+學生,即係五星星尖子唔到你,墊屍底又唔會無份,應該係徘徊喺中間偏上嗰堆面目模糊嘅「好學生」。以前會諗:「點解我讀嚟讀去都只得個B,幾時先有A呢?」大個咗發現,其實要攞A,就好似日本人對工藝嘅要求咁,做到完美就需要120%嘅專注,你付出80%嘅努力,件產品咪就只得B級囉。

講咗咁耐,其實想講嘅係「馬拉松」呢回事,絕對唔係你得過且過就搞得掂,回帶去返今次找數源頭,個爭論點係:「你覺得行毅行難啲,定係跑全馬難啲?」Well,到呢一刻我仍然深信,毅行係易過全馬好多,唔係「距離」問題,而係「時限」。毅行48小時,你唔衝時間攞A,要攞個B或者C (即係行三十幾四十個鐘),係 achieveable,唔係天方夜譚,但你唔練跑唔練長課,就想喺時限6小時內完成42.195公里 (亦即係僅僅合格),係人都會話你有病。而我,渣馬當日就真係帶病之下,展開找數第一關……

小小利伸:渣馬前做咗傷膝青年,停操養豬接近兩個月,最長一課只係去到12K左右,所以你話係咪危險情節,所有人切勿模仿…

▲ 過去幾年都有去起點做嘢,但今年落場,感覺真係好唔同

▲ 今次找數主題係#唔好死,只求平安完賽,但賽前三日嚴重失聲,連求救都只能用whatsapp打字,為免發生意外,特登睇咗呢篇講馬拉松猝死徵兆,老老實實,我未想死住

▲ 小弟有幸抽中馬拉松1組,即係6:35分起步,唔使最後一組咁大壓力。賽前都講過,目標係6小時30分左右,係,即係過咗時限,但係喺拉閘前返到維園就當贏,keep到9分pacing內就得,完賽cert呢家嘢真係好閒

▲ 賽前已經將衝閘時間,set 做手機 wallpaper

▲ 臨上場刑場前,下意識自拍一張

▲ 沿路專心比賽,係食gel飲水又唔阻人時,先會攞手機影下相。去到呢個大概5K忽然有人從後拍我遞張紙嚟,原來係7點起步HNR嘅Will爺,打開一睇,差啲喊出嚟 (見下圖) 後來Will爺話佢應該係馬拉松2組第一個到….

▼ 因為深知練唔夠,加上只以完賽為目標,去到汀九橋前(約19K)嘅策略都係行上斜 (見高度圖),平路、落斜就盡量跑,去到傳說中嘅昂船洲大橋,當然慢行

按圖放大

▼ 入南灣隧道,撞見囉嗦大叔,嘗試跟佢一陣但當然失敗 (小腹好痛),都係 keep 返自己 pacing 好了

▼ 我有位朋友每年都做渣馬義工,今年佢負責入長青隧道前嗰個 point,所以去程會喺青馬附近見到佢。事前已問,可否喺水站攞定少少朱古力俾我 (我認,絕對係 outside support),結果我當時真係好肚餓,一路食一路感動,多謝佢拍埋片,證明我真係有跑哈哈 (當時把聲已經算好少少)

特別鳴謝Joe,辛苦你哋義工了

▼ 老老實實,去到汀九橋嗰陣,只係2個半小時多啲,仲好有信心完成,但就係由呢度開始,形勢急轉直下,乜汀九橋唔係跑到尾就調頭架咩,點解仲有一大段先折返!? (開始崩潰)

▲ 去到半程點,已經三小時多啲,信心開始動搖,雙腳亦開始想抽

▲ 唔少人話,成個渣馬係三號幹線呢段最悶最難捱,的確,呢段我係跌 watt 跌得好快,基本上一跑快少少就想抽筋 (大腿同小腿都係)。無練夠就係無練夠,無得呃無得死頂,結果盡量維持「一條燈柱跑、一條燈柱行」嘅策略,唔俾自己消磨晒啲鬥志

▲ 死捱再儲力衝落斜,過西隧 checkpoint 嗰一刻,只係比拉閘時間早5分鐘,本來幸運得來嘅25分鐘 buffer 已經用晒。當時已經筋疲力歇,心諗,要35分鐘內跑5K過西隧,先至 meet 到下個 checkpoint,我仲有無可能做到?

▲ 結果,我係被西隧呢個大佬打敗咗,已經唔記得喺最後條斜路嗰幾分鐘內,講咗幾多句粗口:「點解咁L斜架!?」

▲ 其實而家諗返,我係心有不甘嘅,因為當我上到天橋嗰陣,雖然已到拉閘時間,但其實個網仲未拉晒! 出盡奶力狂奔,最後只差50米左右飲恨,同2017街馬一樣結局上車收場,唯一唔同嘅,係呢次跑咗37K。

▲ 車上一片寂靜,無錯我仲上到上層,因為下層已經爆咗

▲ 其實同一時間,HNR等一大班朋友,喺馬師道等緊我衝閘,見證歷史一刻,我諗如果我當日去到,真係會喊出嚟

按圖放大

▲ 找數第一關,失敗! 上圖明顯見到,過咗半程點之後,我同加利仔一樣「跑得慢、無速度、唔夠快」,練唔夠同無肌力就梗架啦,東馬前唔解決呢個問題,老老實實7小時時限都未必夠 (仲未計會好凍好凍)。

後記

呢張打咗個紅色交叉嘅號碼布,而家擺咗喺屋企當眼處,日日夜夜提醒自己,呢條數仲未找完。有時會諗,如果我當日決心再強啲,喺三號幹線跑快少少,又或者喺西隧斜路爆埋上去,結果會唔會唔一樣?

世事嘅嘢,又邊有咁多如果,我只係知道完賽之後,感冒大爆發病咗成個星期,到而家(28/1)都仲未好返,又少過 weekend 練喇,2月25日東京馬拉松,點搞?


更多:
Fitz Facebook專頁
[找數真漢子] 抽水抽著火水 抽籤抽中東馬
[找數真漢子] 零操練PB完走10K馬拉松
[找數真漢子] 馬拉松之旅 由街馬DQ開始
[email protected]
Fitz Running 跑步


文章為作者意見,不代表Fitz立場。

歡迎投稿: http://fitz.hk/contribute/

廣告