(按：唔知作者找咩數，又或者點解要找呢條全馬數，請重溫《[找數真漢子] 馬拉松之旅 由街馬DQ開始》)
根據2016年瑞銀UBS做嘅一項調查，香港又有樣嘢稱霸全球：打工仔全球工時最長。香港人，每周平均工作50.11小時，拋離全球平均數38%，亦比平均工時最短嘅法國人，足足多20個鐘。
50個鐘，係一個乜嘢概念？假設你五天工作，即係每日平均返工10個鐘，9點開工就7點收工，如果你係堅毅嘅新界西人，咁啱又返市區，咁前前後後要加多3個鐘頭搭車(我真係住新西)，再計埋充足休息要瞓夠7小時，即係每日真正屬於自己嘅時間，可能只得4個鐘左右12。
1 未計食飯沖涼，仲有拍拖湊仔湊女等「節目」
2 住市區請自行加返1小時
「我恐懼、我誤判、我愧疚」
講咗咁大段開場白，無非都係想將我嘅「零操練」合理化。成個二月，除咗比賽我只係真正跑過一次(仲要係HNR嘅跑團活動)，老老實實，睇住自己個app儲得20K唔夠，係真心恐懼同埋愧疚嘅，而呢個亦係我堅持要「每月一賽 」嘅原因：俾咗錢報名，你唔係唔去下話。
話雖如此，作為Fitz編輯之一，基本上我係24小時工作，除咗要不停update網站同Facebook，星期六日有咩大賽唔參加都要做嘢，唔知點解，今時今日仲有人以為做網站好型 (真係收過類似message)，真相係忙到甩轆你唔知啫。所以對於「找數」呢件事，我開始懷疑自己係咪誤判……
之不過咁，本文標題寫明 [找數真漢子]，講得出就要做得到，我(唯有)開始搵方法去完成呢件事，既然時間係最大困難，咁就嘗試先解決呢個問題。要練一個馬拉松，坊間有一萬種不同講法，我嘗試去歸納，發現一般都係話一星期跑3至4次，當中包括1次長課，總距離起碼50至60K (如有錯請指正)。
計完條數，我當堂震到手埋，唔係俾個距離嚇親，而係所需嘅時間。純計數，好似我呢啲7分幾8分披嘅慢腳仔，練10K前前後後起碼需時個半鐘，21K長課呢？3個鐘頭一定無走雞。去返文章第一部份，香港打工仔一至五平均只得4個鐘私人時間，放工落街跑返一兩粒鐘，成晚已經無咗，長課就更加唔使講，當然要喺weekend進行。去到呢個位，我真心驚嘆香港所有跑友嘅毅力同堅持，唔單止係體力上，更加係精神上，how you can manage it is really beyond me。有人話，跑步係鍛鍊意志，我真心不能同意更多，淨係諗下OT完仲有動力去跑，第二朝又要晨咁早起身逼車逼地鐵，呢份毅力已經唔係正常人做到。鬼佬講work-life balance算係乜，香港人先係最L勁。
(俾完掌聲自己，心水清嘅你應該發現我仲未講過會點做，其實大家有無咩分配時間嘅好方法？熱烈歡迎留言提供)
最後，點都要交待返我嘅「每月一賽 」。2月26號朝早，我靜悄悄去咗參加一個10K……
瞓咗4個鐘天未光就出門口，我問咗自己三次究竟做緊乜，後來發現當日係今年入冬最凍
終於去到體院，水蛇春咁長嘅比賽名，真係唔會記得
上線準備8點起步，第四次問自己而家做緊乜
發現凍到著咗上衫嘅泳衣男，人生即時有返色彩同意義，不枉此行
呢10K真係非常專心跑，所以無selfie無呃like，係去到最尾繞場半圈時先影返張(因為行緊)
結果1小時18分完成，PB全因之前跑得太慢
本來諗住衝1小時15分，但跑到半路左腳成隻腳掌好痺加小膁痛，最後3K幾乎係跑1分鐘行1分鐘咁返嚟
>
其實當日跑完10K後，跟手仲去埋Fitz行山團，夜晚返到屋企即時進入昏迷狀態……
最最最後，點都要交代埋呢幾樣嘢：
- 上次篇文出街後，幾乎見親人都叫我「記住找數」，得喇得喇
- 亦因為上篇文，喺街都識到新朋友，亦有人去HNR陪我一齊跑，真心感動，我跑到一定盡量跑！
- 小弟寫文速度應該慢過跑步，請見諒寫得唔夠多唔夠好，想update啲可以follow我Facebook同Instagram (FB個名係我之前做電台開咪用的，唔好問我點解叫呢個名……)
- 3月嘅「每月一賽」，會係 Translantau 25，其實我鍾意玩山多過路跑，不過一樣都係咁慢，到時再寫包膠，下次見！
Fitz.hk Facebook專頁
[找數真漢子] 馬拉松之旅 由街馬DQ開始
Fitz Running 跑步
