well……(超感謝 HNR 仝人 圖: William Leung)

有時啲嘢,真係整定。

如果你未聽聞呢度有人要找數,條數又係找乜嘅話,首先建議睇返呢篇文章。簡單重溫: 有人早前同女友打賭,話對方抽中又完成到毅行者100公里嘅話,自己就會去跑個馬拉松 (注: 女方本身已完走N隻馬,而男嘅,亦即係本人,2012年行過毅行但從來唔跑步,係名乎其實跑2K都想死嘅死肥仔……

當年以電台員工身份參加,喺馬鞍山頂大雨到睇唔到路,最後 Full team 完成真係謝天謝地


其實當下應承,都唔係無計過嘅,心諗:你抽到又行到先算啦! 大家都知,毅行者近年越嚟越難抽,自己抽咗兩年後備名單都無,點知佢舊年(2016)又會咁順利架啫……不過算! 你抽到時我都要抽,以我呢個無成績支持、無跟跑會、無乜比賽嘅「N無人士」,都係抽中先算啦,點不知,運氣嘅嘢,真係話嚟就嚟……

話無乜參加,其實知道要找數後都有 keep 住跑比賽,但成績就…….

數,既然要找,咁籤,就無得唔抽,呢個跑季,我總共入籤三隻馬,聽天由命,抽中邊隻就跑邊隻,最好就有咁難中得咁難中,咁抽唔中都唔關我事吖! 結果,第一隻公布嘅香港渣馬,中! (個心涼咗一截,仲頂得住);第二隻,東馬,中! (唔係下化,唔係東莞馬拉松喎,東京8%咁都中!?) 最後去到第三隻京都馬,中埋! (已經唔識反應) 唔……我知我要找數,但都唔使咁樣下話,六合彩又唔見我中……

東馬公布結果前,仲大大聲話抽中唔去會遭天譴……
結果係咁

不過喺呢個moment,容許我道個歉。

如果唔係抽中東馬,我都幾肯定會去京都,但而家兩個比賽只差一個星期,連完成一隻都有極大疑問嘅我,真係零信心連馬,唯有選擇放棄……仲有個人需要一提,沙灘哥曾經同我講:「照報全馬啦,報咗你先會練!」係,你啱! 成個夏天都偷懶嘅我,而家知錯了。

2018.1.21 渣打香港馬拉松
2018 2.25 東京馬拉松
2018 3.25 buff 逆走100 (仲私人送多個找數山賽……)

有晒時間表路線圖,今次真係唔練唔得,壓力來源已經超越咗找數,而係去到東京,跑唔完點對得住鄉親父老!? 要知道,東馬時限7小時,男子組別完走率年年都九成幾 (2016年係96.7%),「你知唔知有幾多人想跑都無得跑呀!? 」連抽4年都唔中的債主如是說,我知,我都唔係想咁架…….

之不過咁,自從認真加操,好自然對跑步認識多咗。村上春樹話:「痛是難免,苦卻是甘願」,老老實實,練跑真係好L辛苦,不過亦體會咗好多,留返下篇再分享吧。

自己練之餘每個星期三都有跟HNR跑 圖: William Leung

最後,而家距離渣馬仲有三個月,大家會有咩意見俾小弟? 利申: 10K PB 1小時17分,未試過完成半馬,目標係「唔好死」。



更多:
Fitz Facebook專頁
[找數真漢子] 零操練PB完走10K馬拉松
[找數真漢子] 馬拉松之旅 由街馬DQ開始
Fitz Running 跑步

Advertisements