Fitz > 運動 Sports > 跑步 Running > 毒L,跑場覓真愛啦! (下)
圖片來源

Mentee 問媾女係唔係好難,答案視乎你問邊個。你問冠A,他會話食女食到要食偉哥。你問褲二袋,他會話當他開戰車出去兜風時,自動會有女被吸引過,MK 啲個句,『有車又有樓,晚晚開罐頭』。

但不是人人都是冠A或褲二袋,毒L可以點樣?

跑場似乎是一個充滿幻海奇情的地方,冠A和褲二袋不會為你帶來任何優勢,有時反而會礙事。

男人唔可以窮的下聯

就以我的一位朋友作例子。

圖片來源

朋友是快腳,4分披個隻,留一個 Fast and Furious 髮型,AAA教練,每次喺跑場見到他時,他總是俾女圍的,十分之受女歡迎。

一次練習後,他拉了我去啟業熟食中心食飯同飲嘢。原來他有感情煩惱,他問我揀邊條女好,係唔係好頂癮呢? 兩條女我都識,一個是賢良淑德的盛女,樣子和身材不是特別出眾,但是是愈睇愈順眼個 type,十級溫柔體貼,是成熟版 Rose Byrne。另一個是俏皮女學生,青春可人,十分之 Kawaīī,似足 Zoey Deutch

還記得第三鐵律 – 不要做兵,要令她也喜歡你嗎? 友人成功地先令她們放下戒心,然後慢慢讓她們看到自己的優點,其中一樣是細心和對女仔孩子的可護備至。不得不讚他眼光獨到,能從豬扒中見到索女。Zoey 初來跑步班時是豬扒一塊,仲係要碎上個隻,每次跑圈都是最後一個完成。友人愛心爆棚,每一次都會陪她完成,他非常體貼地不讓 Zoey 感到被憐憫,會邊跑邊講笑,逗得條女好開心。

Zoey 有一陣子十分沮喪,打算不再來上堂,友人很懂得用 WhatsApp 冧女。當條女話想放棄時,他沒有「永不放棄同學會」的說教,講完都唔知噏乜 spring 的廢話。他只 WhatsApp 條片,條女便振作過來。

去片!

下聯是女仔唔可以懶 。

咁Mentor你點媾女架?

圖片來源

Mentee:「唔好講人哋,不如講你點媾吖。」

我條女係跑步識的,唔該溫書,睇返《追不到的跑步女孩》。「時間」同「距離」是愛情最大的敵人也是情深最好的證明。我等了阿 Gwen 差不多一年才去第一次街,由第一次遇上她我就開始每天寫 blog,再見到她時我 WhatsApp 了條 link 給她,是三百幾天對她的思念。

其間我去不同地方跑比賽,每到一處地方都會買些我覺得她會喜歡的小禮物,我相信有緣的話,禮物會去到她手上。第一次見到她,我已經留意到 Gwen 是百份百日系女生。她最喜歡我在跑名古屋 City Marathon 時買給她的古董寶麗萊 SX-70,原來大家都是《情書》迷。

那一年,我倆一起抽中東馬。她是上午收到確認電郵,我要到下午先收到,我係個 cubicle 度嗌了出來。晚上,我約了她來慶祝和傾「拾科」訓練計劃,怎知 Gwen 告訴我原來羅太抽不到,但抬了錢去 KNT 報名。

「Gwen,妳同 Audrey 跑完東馬會唔會 stay behind?」
「唔會呀,我同 Audrey 星期日夜機走,佢要趕返屋企揍仔。」
「妳公司好忙,行唔開呀?」
「又唔係,農曆年之後,無咁忙。」
「咁不如一齊去北海道小樽呀?」

Gwen 突然板起面來,怒瞪著我。「你同其他人一樣,成日諗著呃人蝦條。」

「妳講咗去邊呀? 旅 旅 旅…行之嘛,講 講 講咗去咩 咩 咩 呃蝦條暏。」
「口都窒哂,仲唔係心虛? 我唔想再見到你,你走開呀! 你唔走呀嘛,我走。」
「對唔著呀,Gwen,當我無講過好唔好?」我拉著阿 Gwen。

Gwen 轉過來,本來黑臉的她忽然爆笑起來,「低能仔,我整蠱你咋,見到你個反應,真係笑死我。Sorry呀,玩你咋,我都想同你去小樽。」
「妳份人咁衰架,玩人都有個限度吖 。」

Gwen 的笑容是我見過最燦爛的,最甜美的,超可愛。頃刻,我很想摟她入懷抱,把她緊緊抱著,永遠都不放開。

之後看《Whiplash》,Déjà vu。

Fxxk Me Once Shame on You Fxxk Me Twice Shame on Me

圖片來源

說回 Mentee,他開始跟我一起跑步,週末我倆跑遍港九新界,他最愛是跑上摩星嶺 YHA 睇日落,我們邊跑邊吹水做 mentoring。Mentee 很有跑步天份,第一次10公里賽時間是40分頭。跑步成績令他變得有自信,跑步的改變是由外而內,再由內而外。最大收穫是他在寶雲道練跑時碰上公司 Compliance 的美女律師 Cheyenne,他同我求攻略。

他照我的方法去打開話題,之後每個星期六都扮乜咁啱嘅,直到偶遇變成約定。飛雲,機會終於來了,一次跑完步之後,Cheyenne 跟 mentee 哭訴,原來她在北京「水記」做 partner 的男朋友偷食唔止一次。

「他呃咗我三次。當我知道要派去北京時,他發誓會對我專一,不會搭上其他人,怎知俾我知道佢一落機就去搵個北姑。」
「他話這個女孩子是幼稚園教師,怎知被認出是卡啦OK公關小姐。」
「他答應我會同個女仔分開,當晚我呃佢飛返香港。第二天,一早走上 apartment,見到佢同個女仔喺張床度。」

這種情況,當然是謀定而後動,先觀察形勢,才開始發動攻勢,乘虛而入。Mentee 陪 Cheyenne 跑步療情傷。

Mentee 帶 Cheyenne 黃昏時跑上摩星嶺,這裡可以看到香港最美的日落。開始做 cool down 時,mentee 戴上耳機,Cheyenne 好奇問「你都幾奇怪,大部份人都係跑嘅時候聽歌,你就 cool down 時先聽。你聽緊咩嘢歌?」

「做完 cool down 話你知。」

做完 cool down,Mentee 和 Cheyenne 坐在長椅上休息,望著詩意翩翩的黃昏雲彩,mentee 把耳機輕輕塞進 Cheyenne 耳裡,耳畔傳來的是《約定》。斯時,Cheyenne 把頭靠在 mentee 肩膀上。瞬間空氣給凝著了,彷彿時間也停下來。當歌曲結束時,mentee 把手伸過去,想挽著 Cheyenne 的手,Cheyenne 即時摔開了他。

Cheyenne 站起來跟 mentee 說「我地會唔會太快呀?」Mentee 默言不語。

接著的下一秒鐘,Cheyenne竟伸出手來挽著 mentee 的手說「頭先未係時候,依家係。」

有些日子,你只想經歷一次,有些時刻,你好想重複百遍。Mentee 話永遠都不會忘記當時挽著Cheyenne 手時像被雷擊的天旋地轉感覺。

「當我倆手拖手走過每一段路時,感覺就如夕爺形容,彷彿整個城市都輕快起來。」Mentee 道。

為何聖誕總是冷

「Mentee,咁你要好好記著這一秒鐘。」這是我跟 mentee 最近一次 Skype 通話,不過已經是9個月之前的事,其間我大部分時間都在不同地方工作,總是跟他聯絡不上。

聖誕前夕,我回到香港,廿五日的黃昏我在城門河跑步,路上遇上很多情侶,迎面而來都是一雙一對的甜蜜戀人跟我說 Merry Christmas。他們有沒有顧下 lone 丁的感受呢?

這個聖誕真太冷! 跑回沙田運動場,熱水浴後,仍是手腳冰冷。交回 locker 鎖匙,正準備離開時,聽到一把熟悉的聲音從看台傳來,是 mentee。

「你死咗去邊呀? 又唔覆我email,又無 update Facebook,你攪咩?」我坐到他身旁。Déjà vu。

「Cheyenne 返回他身邊。我真係唔係好明,如果一間餐廳畀屎你食,你一定不會再返去。但一個人畀屎你食,你係會返轉頭的。」Mentee 一副生意失敗 look。

「我曾經以為愛情跟跑步一樣,只要肯付出便有回報,你跑過的里數是不會背叛你的,但是對一個人付出,許多時,再多也是徒然。可能上天嫌我擁有得太少。」

「Cheyenne 說只是 timing,如果她是先遇到我,或許會喜歡我」

「是 timing,但願我比他早一步遇上 Cheyenne。」

「Mentor,我想一個人坐多一陣,我無嘢,再約你跑步吖。」

「約定你除夕上大金鐘睇日出。」我跟 mentee 話別。

我想他現在需要的是空間多過我。聖誕節晚上的運動場十分冷清,入夜後,氣溫跌到只得十度。在寒冬之中,是割捨不下的眷戀。我按 iPod 的 shuffle play,響起《東邪西毒》OST,是 bygone love。

其實一開始,Mentee 已經知道這是一場馬拉松,贏的只有一個,而他一定是輸的一個。或許他相信過程比結果重要。

她愛上一個L人,只有不斷付出,同時好想知道被愛的感覺是怎樣,結果傷了另一個人的心。

得不到的東西永遠是最美好的。不懂珍惜,給你一生都是浪費。學會把握,只是一天已足夠。

馬拉松講求時間,戀愛都是。

跑步令 mentee 成為一個更好的人,可惜在他最好的時候,他最喜歡的人不在他身邊。

當你不能夠再擁有的時候,你唯一可以做的就是令自己盡量不要忘記。

以後每日每天,除了跑步之外,這就是 mentee 另一樣會努力做的事情。

(全文完)

>>毒L,跑場覓真愛啦! (上)

Fitz 連結: https://fitz.hk/?p=100493


更多:
Fitz Facebook 專頁
毒L,跑場覓真愛啦! (上)
當這地球沒有街
從跑步中見識香港人有幾仆街
Fitz Running 跑步


文章為作者意見,不代表Fitz立場。