[深圳馬拉松] 1人痔瘡出血送院 全國關注

12月17日深圳國際馬拉松，邊個贏出可能無人記得，不過呢位跑友就受到全國傳媒關注。

佢唔係跑得快，亦唔係嗰啲「70歲阿婆第N個馬拉松」嘅故事。佢無名無姓，連性別都唔知，但出現喺全國嘅報道入面。

是咁的，深圳馬拉松比賽後，強國所有新聞都依慣例報道，而強國做法就好鍾意掟數據，呢次因為氣溫急降，醫療數字就成為報道主題：

「現場共處置傷病員6464人次，其中肌肉痙攣4962人次，低血糖891人次，扭傷拉傷518人次，擦傷53人次，關節疼痛12人次，其他28人次；入院10人，其中8人病情輕，經處置後已離院；1人痔瘡出血，住院擬手術治療……」

「痔瘡出血」最後竟然成為主題中嘅主題。騰訊體育更以「深圳馬拉松一選手痔瘡出血住院」為題，將呢位病人寫成比賽焦點! 而依照內地媒體運作，騰訊呢段新聞稿，會轉載到地區省市嘅網站、報章，甚至電視。於是乎，「痔瘡出血」就成全國新聞了!

你可能會怪呢啲媒體以標題嘩眾取寵，小題大做。不過諗深一層，有關方面將病人嘅病情公諸於世，忽視病人私隱，係咪仲過份先?

呢位患有痔瘡嘅跑友，而家受到全國關注，真係情何以堪啊!

資料及圖片來源：騰訊體育

分享連結: