精英選手原來百中無一 1A文章《[讀者來料] 渣馬跑手用假印搶頭位?》發表之後,跑圈朋友議論紛紛,我哋亦喺呢兩日收到各式各樣資料,正反都有,當中固然有部份資料暫時難以核實其真偽。不過部份資料經過查實後,我哋可以話事情已有新嘅進展。

背景:事件主因,係有跑手發現某些參加渣馬2016全馬挑戰組的選手,號碼布上蓋有「Elite Starting Zone」嘅印章。但依照其他跑手嘅相片,顯示大會所採用嘅正式印章,應為「Start Zone」,係無「ing」。而據報料人所講,有人已向渣馬大會投訴,但投訴暫時並未有回應,而該名選手更可獲得$1000嘅達標獎金。

左:疑似假印;右:真印
左:疑似假印;右:真印

查到呢到,我哋亦只能寫信畀主辦渣打香港馬拉松嘅香港業餘田徑總會,了解傳聞嘅真偽。代表佢哋嘅奧美公關亦喺2月19日回覆我哋,已經將信件轉交到田總。

(按圖放大)
(按圖放大)

而喺上一篇文章出街之後,我哋收到唔少朋友私下畀我哋訊息,其中有位「真•精英選手」,傳嚟一份「精英起跑區之安排」

精英選手原來百中無一 1
(按圖放大)

依照文件顯示,要進入精英起跑區,就要:

  1. 渣打香港馬拉松之衛冕運動員
  2. 達到國際田聯IAAF金/銀/銅水平
  3. 海外特邀運動員 (男女子各10位,名單見賽事手冊)

用常理分析,第1及第3點可以一眼認到,係就係,唔係就唔係,基本上無得扮 (除非選手要著鯊魚衫出賽,或者平日喺香港日練夜練嘅跑友,原來係外國選手)。而一般人最糊裏糊塗就係第2點 (包括我在內), IAAF嘅金/銀/銅水平,其實係點樣樣?原來,可以話係難到無人有 :(資料來源:IAAF)

精英選手原來百中無一3

  • 全馬金級選手 — 男2’10”;女2’28”
  • 全馬銀級選手 – 男2’12”;女2’32”
  • 全馬銅級選手 – 男2’16”;女2’38”

根據田總嘅最新運動員排名,全馬組別裏面,排頭嘅徐志堅堅SIR,時間係2’29”40。而女子選手係姚潔貞,時間係2’38”24。好可惜,姚潔貞差24秒,都係去唔到銅級選手。

精英選手原來百中無一2A
(按圖放大)

即係話,本地選手要進入「精英起跑區」,唯一嘅途徑就係「衛冕選手」。而照字面解,「衛冕」嘅人,每項賽事只得唯一一個人,就算計晒全馬、半馬、10K,加埋各年齡分組,都唔應該多過12人 (年齡組別全馬3組、半馬4組、10K 4組)。咁喺2016年1月17日,究竟有幾多位本地選手進入「精英起跑區」?就真係要田總先可以解答到。

不過,與此同時,喺facebook群組長跑長友有跑手留言,指除咗上一篇文章嘅主角女跑手,亦有唔少跑手,都係掛住疑似錯誤印章「Starting Zone」嘅號碼布。

經我哋Fitz.hk仔細考證過圖片後,亦證實呢個講法。去到呢個階段,最重要嘅地方,係呢啲選手究竟合唔合乎上面呢三項資格排頭位出賽呢?(印仔嘅「Start Zone」,有無「ing」尾,必須要待田總答覆後先有定論。)

我們根據手頭收集到5位選手嘅出賽編號及姓名,發現以下情況:

  1. 該5位選手,極有可能係排頭位起步 (因為大會時間與晶片時間相差不足3秒)
  2. 5位選手裏面,有3位選手沒有2015年嘅成績 (疑點利益歸於被告,當佢哋有好成績,但紀錄有錯漏),而查證到其餘2位選手,時間分別係3小時40分左右,以及3小時50分左右。與IAAF金銀銅嘅選手資格,相去甚遠。
  3. 5位選手皆非衛冕選手
  4. 5位選手皆非渣馬大會所公佈之海外特邀選手
海外特邀選手有呢20位
海外特邀選手有呢20位

從表面證供睇,如果佢哋真係排頭位出賽 (相信無人會信佢哋可以用3秒內衝過前排選手起步),咁佢哋用咩方法排頭位就真係好耐人尋味。

而因為呢次事件,亦引發唔少跑友嘅討論,當中除咗大家對所謂「精英起跑區」嘅資格好有疑問外,亦對於「挑戰組」嘅參賽方式表示懷疑,例如究竟在報名時填上嘅最佳時間,有沒有人去核實呢?

再加埋呢次「排頭位疑雲」,一點一滴,都再加深大家對渣打香港馬拉松的公平公正,有所懷疑。

呢一刻,我哋仍然期待香港業餘田徑總會有盡快對事件有回覆,令大家對佢再充滿信心。

後話:
寫呢篇文嘅同時,Fitz.hk亦發表咗一份聲明,希望大家明白我哋調查呢件事嘅動機。

精英選手原來百中無一 6
(按圖放大)

筆者口痕,再補充幾點:

  1. 我哋去寫呢個調查嘅最初目的,係發現咗一啲唔公平嘅事。作為一個正常人,明白到有唔公平嘅事就要說不。而追查真相,並唔係有咩好崇高嘅任務,只係一個有良知嘅人嘅自然反應,別無其他。
  2. 「公開真相」係我哋做呢件事唯一目的。當我哋拒絕赤化,希望維持過去美好生活時,我更相信大家唔會希望活在一個充滿謊言嘅社會。
  3. 喺呢個原則下,整個調查從來無考慮會唔會令到咩人開心或唔開心。
  4. 呢幾年大家最痛恨係乜?我估一定包括「私相受授」、「利益輸送」。大家睇新聞時,見到呢啲情況會開聲鬧,點解身邊發生呢啲事,反而叫人「唔好搞事」?
  5. 香港已經夠多特權階級嘞……

更多:
Fitz.hk Facebook專頁
[讀者來料] 渣馬跑手用假印搶頭位?
[渣馬] 我無上巴士 你唔好屈我
渣馬專區@Fitz.hk
[渣馬數據分析] 一張圖睇下你跑成點
Fitz Running 跑步

首頁 > 運動 Sports > 跑步 Running > [渣馬呃頭位疑雲] 精英選手原來百中無一