筆者之前介紹荃灣愉景新城後面的照潭徑，有唔少荃灣街坊都提出意見，話呢條路晚黑好多人放狗，好多人又無公德心，而且條路又短等等。多謝各位老街坊，我搬到荃灣唔算好耐，初來報到，還希望大家多加鞕策。

見到有街坊話照潭徑好短，我都覺，所以呢一日我就試下搵條新路，咁又畀我搵到喎。

荃灣 大欖涌引水道緩跑徑

• 緩跑徑起點/終點: 荃灣柴灣角
• 路線: 荃灣柴灣角 > 汀九 (近清快塘)
• 距離: 6公里 (單程)
• 注意
  • 康文署網頁指示市民到汀九終點要原路折返
  • 其實呢條引水道並非由柴灣角做起點。引水道西到汀九，東面係荃錦公路近曹公潭。整條引水道全長8.6公里。

康文署圖片

----- 廣告 Ad -----

有樹蔭 炎夏適宜

筆者動身之日，天文台於朝早9時已發出酷熱天氣警告。原本計劃跑青公或海濱公園，不過見到烈陽，諗到沿路無遮檔，還是不了。於是諗到上山進發。

當時位處荃景圍，最佳的路線當然經柴灣角走元荃古道。由港安醫院行咗十五分鐘樓梯，就見到呢條緩跑徑了。

元荃古道入口

由柴灣角上樓梯，去到呢一個位，就係引水道緩跑徑了。紅色車一邊，係往荃錦公路方向，另一邊就係去汀九。

呢條路勝在有樹蔭，氣溫高達32度都唔覺太辛苦。沿路大致係平路，略有上落斜。路面係車路嘅石屎路，所以嚴格來說都算係路跑。有樹蔭加上少少風，悶夏天氣之下都令人幾享受。

最難頂嘅係，由荃景圍體育館 (愉景新城) 走上去柴灣角呢一段 (Google話有成2公里) 其實幾甘。不過都叫做練到嘢，又好似好值得咁。

路經唔少溪澗

----- 廣告 Ad -----

沿途有民居，唔好立亂進入

詳細路線

• 荃景圍體育館 > 柴灣角 (港安醫院) > 引水道緩跑徑 > 汀九方向 (中途折返)
• 距離: 約15公里 (引水道一段可隨時掉頭)
• 注意: 到汀九盡頭未必有路落到深井。康文署網頁叫人掉頭，筆者未探過路，都係小心啲好
• 評價: 引水道幾好跑，不過由體育館上引水道一段，要2公里狂上斜，會幾辛苦，不過練到嘢

小心呢個路口

見到荃威花園有路口，以為可以快啲落到山

點知落到去，發現只通往私人屋苑閘口 (同埋幾座山墳)，除咗掉頭無其他路。好彩遇到屋苑居民，帶我入去。

按: 歡迎投稿分享你的社區跑步路線 https://fitz.hk/contribute

資料來源: 康文署

Fitz連結: https://fitz.hk/?p=123053