最近嗰個禮拜日，大多香港跑友去咗跑美津濃半馬 / 台北馬拉松之際，我就重返三年前嘅終點—石崗雷公田，參加一場長跑比賽。三年前(實際上係2013年1月)我就跑10km，當時仲拎埋全場冠軍，嚟到今年，就抱著寓賽於操嘅心態跑30km，作為備來年 “香港渣馬”嘅另一課30km長課。
據熟悉石崗30km賽道嘅跑友透露，賽道起伏不定，難度足以媲美跑馬拉松，故賽會於早年舉辦呢個賽事果陣就以 “馬拉松熱身賽” 作主打，吸引唔少跑手報名參賽。今年嘅石崗30km就由關島旅遊局贊助，故此男、女子全場冠軍係可以暢遊關島，順手可以跑埋關島馬拉松。
對於小弟而言，冇期望自然唔會失望，雖則咁諗係有D消極，但正正就係咁先至會有 “意外收穫”，今次亦唔例外，我係賽前冇試路嘅情況下，一開跑已經係前四位，但跑跑下且戰且走，帶頭走一段，到咗27km先俾其他跑手過，結果全場冠軍就唔係我，我全場只係跑第四，但就拎到年齡組別冠軍，意外地有 “新玩具”玩，對於跑步唔多講究裝備嘅我黎講，又可以走到潮流嘅尖端。
山長水遠黎到石崗參賽，其實仲有另一個目的，就係……農場鮮奶，因為起點附近就係鮮奶農場，跑完可以同D跑友去食碗餐蛋麵/豆腐花，當然最重要嘅就係整返盒靚牛奶飲吓啦。
呢場係我係2015年最後嘅比賽，喺度祝大家聖誕快樂，新年進步。
更多：
Fitz.hk Facebook專頁
澳門半馬記
快閃曼谷
Sam＠Fitz.hk
Fitz Running 跑步
香港教育學院第一屆運動科學學系畢業生，”教大告白EdUHK Crushes” 及 “心夢之城”創辦人，亦為”觀塘區跑步聯盟”召集人，個人馬拉松最佳時間2小時48分，現時熱衷於研究遠征出戰較冷門的長跑比賽的可行方案，成為香港跑界的”另類人士”。
