Fitz > 運動 Sports > 跑步 Running > 人生之初馬點滴

人生之初馬點滴_01自從跑完今年渣馬全馬後,患咗感冒成兩個星期,而且好耐都未試過成兩個星期冇跑過, 難得有餘暇,睇番以前既相, 發現原來自己曾經參與9屆既渣馬賽事!

回想自己喺08,09年係報10k, 比賽前我都冇特別去練,最多只喺比賽1個月前至開始去運動場跑!

人生之初馬點滴_02
自製之手帶, 但防唔到水

09年跑完10k過終点時,竟然跑完唔夠喉“, 所以第二年起開始我既半馬生涯。不過當時既我,只係抱著志在參與既心態去完成比賽,每年比賽報名後至會開始練跑, 直至比賽完就休腳! 我冇參加任何團跑或跑會,身邊既朋友亦唔多鍾意跑步,所以每次比賽完後,我只會好快就離開會場,同而家既我相比,真係好LONELY!,奇怪每年我一定繼續報名參加!

15年果屆,身邊好多朋友知道我一直有玩開渣馬既, 都建議我轉玩全馬。當然玩咗錦多年半馬,其實亦曾經有少少想玩全馬既想法,但畢竟係兩個唔同級別既賽事,自問未有足夠能力去完成42.195k既賽程, 所以當時我决定繼續玩我既第6年半馬,但我亦已經為我既備戰全馬行動宣佈正式啟動!

的而且確,當15年的渣馬完咗後,為咗令自己跑多D, 我每個星期總有兩次戶外跑(全城街馬,係佢令我愛上街跑!),我亦開始報玩渣馬以外既比賽 (包括路賽及山賽),参與大小既團跑活動,甚至加入跑會,希望自己跑得更好,曾經有某幾個星期竟一連5日都冇返屋企食飯,真係見跑友仲多過見屋企人!

人生之初馬點滴_03
開跑前已經開始落雨

講返今屆既賽事,比賽日天氣係近10年以嚟最惡劣既一屆!雨水一直都好似未曾停過呀,講錯咗! 有停過,不過已經係差唔多跑完時至唔落啦! 本來賽前對我這位初馬參加者已經擔心好多野,諗吓自己跑唔跑得完,會唔會中途抽筋或撞牆, 會唔會俾人捉去坐巴士,會唔會冇哂朱古力攞或宿攞咗D生蕉等等而家又多咗天雨一個大問題去考驗我。不過,畢竟自己比以往付出多咗時間同精神,有師兄同我講過: 平時練咗幾多,比賽時就會俾到幾多,冇人可以只靠打天才波就成功,一定要先有付出才有收成。 身邊既團跑隊友亦不停勉勵我,俾咗好大既信心令我去努力應戰,所以我決定如果中途抽筋而跑唔到,我會行; 我唔會俾人捉上巴士坐; 冇香蕉朱古力,我自己有GEL食,落大雨我就著雨褸跑總之見招拆招!

人生之初馬點滴_04
我既跑團—將軍夜遊

比賽當日, 開跑前已經開始落雨,唔著雨褸會淋濕身,但著住跑又好焗,我諗跑完自己應該淋襯或焗襯啦,好無奈但比賽都係要繼續進行。當跑到賽道大約19k,左边小腿開始有點抽,甚至愈跑愈痛,最後惟有慢慢行順再繼續跑。

人生之初馬點滴_05
難得停雨, 係汀九橋影相留念

雨好似一直未落, 尢其係橋上跑風勢又大,令我跑得好狼狽。身上的雨䄛係我當時最可靠既拍檔之一,雖然曾經停過雨,但我都一直帶著件雨褸, 因為唔知幾時又再落雨嘛!

人生之初馬點滴_06
雨中都要擺POST—苦中作樂

當過完西隧到上環天橋時,體力已經用得七七八八, 開始對腳又累又扯住痛,只能放慢腳步時行時跑,以及靠意志支撐,辛苦既時刻時間過得特別慢,我深深感受得到。

人生之初馬點滴_07
轉出銅鑼灣一刻

跑著跑著,忽然聽到身邊好嘈,原來已經到咗銅鑼灣最後路段啦! 當聽到不斷有人打氣或歡呼,令我好似注入大量動力再可以加快地跑,直到衝缐一刻,眼角竟不自控地泛起淚水原來, 主要因為跑完對腳痛到想喊咋!

人生之初馬點滴_08
衝線的一刻

跑出既時間已經唔重要,最重要係體驗比賽過程及完成到賽事。

人生就好似要不斷進行馬拉松,每次需要跑很長遠既路程去完成, 而且途中可能遇到好多困難(天氣、身體狀況),從中鍛練意志和努力,其實更要有計劃去完成比賽,這就是我從馬拉松領晤既人生觀。

人生之初馬點滴_09
跑完去同隊友食番餐勁既 

更多:
Fitz.hk Facebook專頁
[渣馬筆記] 新手的6個見聞
[初馬成了] 能持續 獲得糟蹋亦滿足
Fitz Running 跑步


文章為作者意見,不代表Fitz立場。