田徑賽嘅200米跑，最講求轉彎嘅技術。
平時喺運動場有衝圈嘅跑友，相信會有疑問: 點解運動場跑圈一定要逆時針?
唔講咩原因住，講下歷史先。
事實上，喺現代奧運創辦之初，1896年和1906年雅典奧運，以及1904年聖路易斯奧運，田徑選手都是順時針跑步。到1908年倫敦奧運，為咗要依從英國皇室習慣，田徑賽事暫改為逆時針。
----- 廣告 Ad -----
到1912年，奧委會確立「逆時針」呢個安排，並於當年嘅斯德哥爾摩奧運上採用。不過又無解釋原因，所以令唔少人無所適從。
當時，除咗奧運之外，世界各地嘅田徑賽仍有唔同安排，有啲係順時針，有啲係逆時針。直到1952年英國人 Roger Bannister 逆時針喺1英里賽突破4分鐘嘅成績，大家先接受「逆時針」呢個跑法。
短片: Roger Bannister 突破4分鐘的故事
咁究竟點解「逆時針」會好啲? 理由莫衷一是:
- Roger Bannister 話自己慣用右手，所以跑逆時針時，轉彎會順啲
- 有人話當時運動員要喺馬場嘅跑道訓練，而美國賽馬係逆時針跑
- 科學家話人類心臟喺左邊，所以會以左邊為重心，而右腳較為有力，所以跑逆時針會快啲
真相係點? 其實未必重要。總之大家去運動場跑圈跟規距，逆時針跑啦，咪阻住人呀。
資料來源：Daily Bhaskar、BBC.com、Runners’ World
----- 廣告 Ad -----
Fitz 編輯部
我哋坐唔定、無時停，唔做運動唔舒服! 只要係有用知識、重要資訊，以至好玩話題，Fitz都會全力搜羅，同時鼓勵「郁民」齊齊參與，打造一個開放嘅運動生活資訊平台。