[寒冰跑法] 西伯利亞人必讀攻略 (冬天跑步注意事項)

氣溫跌至個位數，可惜我唔係西伯利亞人，所以做唔到冬天的冠軍，但都可以教下大家，喺嚴寒下練跑點樣做足保暖。

好啦，正所謂「工欲善其事，先利其器」：

裝備篇

1. 打底衫 (E.g Nike pro)：緊身衫有一定保暖作用，但首要係貼身，你唔好買件「鬆泡泡」嘅緊身衫 LOL
2. 風褸：唔好覺得著風褸會跑得慢左，但風褸嘅擋風功能可以幫到你保唔少暖
3. 緊身Tight (常人稱現代褲)：點解會叫現代褲我就唔解釋咁多，但緊身tight同緊身衫原理一樣，越貼身就越保暖
4. 手套：手套? 洗碗手套? 錯! 係跑步手套，由於手、腳係離心臟最遠嘅地方，血液循環都會較弱，手、腳都會較易冰冷，戴返對跑步手套，除左型之外，都仲可以擋風、保暖。手掌唔失溫，整個人都會暖好多

熱身篇

喺寒冷天氣下，切記唔好心急。正所謂「一子錯，滿盤皆落索」。喺寒冷天氣下，除左你嘅意志會返左你屋企張床之外，身體嘅筋鍵 & 肌肉會比正常時間更加崩緊，係呢d時間，你一做唔夠熱身就進行高強度訓練的話，你有好大好大好大機會拉傷。如果本身比較怕凍嘅你，不妨試下係練跑前飲返杯熱飲暖暖身先，一樣有效。

小小建議：喺進行高強度訓練前，最好就慢跑10－15分鐘先，令身體溫度稍為升高，再進行「動態拉筋」。「動態拉筋」相對比「靜態拉筋」好，因為動態拉筋會保持一個運動狀態，令你身體溫度不易回落。「動態拉筋」大家可以集中於下肢嘅大肌肉群，而「動態拉筋」建議大家都起碼要有10－15分鐘。

比賽篇

撞正咁凍既日子，要去比賽真係好崩潰，如果有得揀，我會想返屋企訓教……但可惜唔得。真係落到場，我又可以點算……

1. 一件即棄雨衣：好多時寄完行李，去到臨開跑前都會有一段時間，係呢到時間你唔係叫我著住背心短褲吹風掛？呢個時間一件雨衣就係最好法保，既輕便又10級保暖
2. 舊衫：如果你覺得即棄雨衣唔環保唔緊要，係屋企搵曬你d又殘又唔岩著既衫出黎，寄完行李著住上線，起跑後跑至身體溫度提升，就揾個地方扔左去 (PS: 唔鼓勵亂拋垃圾）
3. 手套：如以上所講一樣咁有用，唔再多講
4. 乳貼：天氣寒冷，皮膚乾燥，再加上衫褲鞋襪嘅高速摩擦，想唔出血都難啦..你明的
5. 熱身：想要有好成績，就要做足熱身。內容唔多講，自己Loop返上去睇熱身篇

HNR 跑步團隊 Facebook 專頁