剛開始跑步嘅時候，曾經以為只要日練夜練死跑爛跑，里數夠多，一定會有變快變勁嘅一日。但當跑得越多跑得越耐，始發現還需好多細節上嘅訓練去配合，假以時日方能成為一拳超人，跑步確然係一門無底深潭嘅學問。
今次拜訪嘅「Garmin Run Club」，當中唯一兼極可能係最靚女教頭林嘉欣 (嘉欣教練) 正正係一個著重細節嘅跑步教練，拍攝當晚嘅節目正係由佢所帶領嘅「夏季體能提升班」，盛夏之際，適逢休季，正好趁機還原基本步，深化基本功。當晚菜單係體能鍛練與800米衝圈嘅交替訓練，難得唔使再 intervals 至死，暗鬆一口氣! 不知是否女教練嘅關係，總覺嘉欣教練外剛內柔慈悲為懷，好明顯考慮咗好多唔同嘅因素，細節位份外周詳。
從前不懂體能與肌力訓練嘅重要性，總以為跑得快砌得夠耐就達標。但日子耐咗對自身要求亦高咗，發現體能同肌力開始跟唔上，甚至感覺碰上樽頸位。有一種好老土嘅講法 – 作為跑手應該要不停改善自己嘅弱項，因為弱項嘅改進，往往比強項嘅訓練更能顯著提升功力。嘉欣教練所規劃嘅「夏季體能提升班」正與此說法不謀而合，佢讓我領略到跑步訓練原來絕不止於 intervals、tempo、fartlek、LSD 呢類著重「跑」嘅練習，細節嘅協調，基本功嘅重塑同樣不容忽視。
----- 廣告 Ad -----
走訪過不少跑會，當中尤其令自己佩服嘅必定係全身投入教練行列嘅精英跑手們，嘉欣教練正是其中一位。現今香港狀況，要走出舒適圈一頭裁進那個未知領域，的確需要無比勇氣及熱誠。一窩蜂嘅跑步熱潮會係曇花一現還是全民運動成真 ? 天曉得。可貴嘅係呢班為著追尋理想而全身貢獻跑壇嘅勇士，從不曾喺言語上甚或表情上流露出半點抱怨、刻苦或迷惘，反之係當下香港眾生失去多時甚至早已忘卻嘅嗰份對生命嘅熱忱。只要話題跟跑步有關都會兩眼放光、口若懸河、眉飛識舞、開懷暢談……毫無疑問，呢份於未知領域當中仍能大無畏打不死兼熱血滿瀉嘅豪情壯志，跑步嘅人絕對會明，但我認為以一場馬拉松作比喻更貼切 – 無論花咗幾多時間及血汗去練習，你仍然無法百份百拿捏過程掌控結果，但偏偏跑手們就係擁有嗰份咬實唔放堅持到底，非到終點拱門方擺休嘅高昂戰意，需知道，42.195嘅路上從不曾出現過舒適圈。
「跑步」所教識我哋嘅，從來就不止跑步!
