街馬@九龍東今個星期日就到，相信大家都已經攞咗跑手包啦！講真嗰句，打開嗰陣真係有驚喜，設計得意盞鬼之餘，啲印刷品一摸上手就知係有心之作，唔怪得佢越搞越大，今年仲第一次主辦半馬賽事啦！
唔知大家係咪同我一樣，參加渣馬同街馬嘅心情非常唔同，跑渣馬嘅感覺係，我一定要衝到好時間，反而街馬就無乜諗要表現成點，盡情have fun就係最大目標！之不過咁，既然兩個賽事咁近，難免會有比較。首先件大會tee，雖然兩件都係大陸品牌出品(渣馬係特步，街馬係李寧)，但係街馬呢件明顯質地較好，摸上手比較舒服。設計就見仁見智啦，我都覺得幾得意嘅，好過渣馬嗰件先，街馬1：0。
街馬其中一個好玩之處，就係可以自訂號碼布上面嘅稱號。小女子叫咩就唔好提喇，反而好期待比賽當日會見到啲乜，會唔會有近期熱爆嘅「D7689」呢？呢個位無理由唔係街馬贏，2：0！
----- 廣告 Ad -----
最後不得不講埋個獎牌，點解10公里嗰個會咁得意架？早知我唔報半馬啦！唉，不過算啦，半馬有得跑第一次開放俾賽事嘅觀塘繞道，都算有特別意義，據聞街馬今年內會喺中西區再搞一次，到時我一定會報返10公里！點都好，街馬完勝渣馬3：0，期待星期日落場跑跑跑！
Sophia
平日打字多過行路，鍾意鍵盤多過跑鞋。成為跑手，全因古語有云：「女仔唔跑邊會靚？」