[挑戰南極100公里] 與跑錶說再見

由

2017-01-04

Fitz > 運動 Sports > 跑步 Running > [挑戰南極100公里] 與跑錶說再見

2017 件第一樣唔開心嘅事，就是要面對別離。別離對象，唔係一個人，而係我隻跑步錶。

03 年人生經歷谷底，好需要休息，決定完全退下火線，刻意減慢步伐，完全唔理會時間。休息左十年，開始出返來比賽，然而唔想與時間競賽嘅習慣依然未改。縱然決定左參加北極馬拉松，成年要不停比賽寓操於賽，甚至參加左跑步班提昇自己，依然都只係用住隻 Baby G，純粹睇下自己響比賽度用左幾多時間便已足夠。

對自己來說，自知唔係什麼頂尖運動員，參賽涉及競逐也好，最重要嘅係自己響事情上盡過力沒有，成績如何，就交託於神。而且無專業跑步錶唔代表唔會有進步、突破 ; 2015 年北馬出發前嘅渣馬，自己第一次 sub 4 ，兩星期後嘅東馬再一次 PB，都只係帶住 Baby G, 全憑感覺去跑。所以對自己來說，有沒有專業嘅跑步錶，其實不是太重要。

然而出發前最後一刻，還是決定買隻 Suunto ambit 3，其實嗰陣邊隻錶打邊隻錶、邊隻有什麼 function等等完全唔知 , 純粹係朋友建議買邊隻就買邊隻。買嘅原因只係一個 : 紀錄人生重要時刻，保存返呢個賽事寶貴嘅點點滴滴，留待他日作回味。

由北馬開始，隻錶就一直陪伴左右，參加過大大小小唔同嘅賽事，走盡東西南北，並同我參與過好多重要同獨特嘅賽，珠峰馬拉松、撒哈拉、ccc、16 年嘅 HK100，可謂同我一齊跨越，見證住我嘅成長、改變，由一個亂跑嘅阿毛，扮晒野升左呢做左個好似好專業嘅跑手。

呢段時間操練南極，其實曾經一度考慮過好唔好換過隻錶。隻錶雖然唔係用左好耐，但去過幾個極端賽事後開始唔係好準，耗電亦都比以前快，加上南極賽響嚴寒同長時間下唔知佢捱唔捱得到尾。但最後我還是拚棄了這個念頭，因為隻錶係我老友記；雖然做領跑要盡量輕裝顧少 d野，但我寧願帶多個叉電器，希望隻錶陪我踏足埋這片極地，同我一樣走勻四極。

只是到最後，隻錶還是意外地無左了。

好多人覺得，無左咪買過另外一隻，正如錶款功能outdate左，都要換過另一隻。

只是當確實無左隻錶，自己第一個感覺唔係肉赤要比錢買過隻，而係一份心痛，因為我無左個一直陪住我共同進退嘅伙伴、戰友。

每當我諗到呢度，我就有份傷感，好想喊。

今日練山，佢已經唔響我身邊，繼續好想喊。