[撒哈拉超馬] 第四日: 82公里長征 (下)

 

到達 CP 4， 太陽開始落山，天色逐漸轉暗；我期待收太陽後會減少燙熱嘅感覺，一切會逐漸好轉。

然而賽事總是充滿挑戰性；之前經常聽人說過，沙漠早晚温差大，晚上會變得很冰涼，有時甚至凍得需要穿著羽絨，如此一來就對我相當有利 (因為自己耐寒能力素來都不俗)。 可是入黑後非但無轉涼，甚至半點風都沒有，四週依然悶熱，感覺相當翳焗，連呼吸都覺得唔太暢順。 天色全黑，大家都要用頭燈照明，大會掛起營光棒等發亮嘅物體以顯示賽道方向。只是呢 d 發光嘅指示每個都相隔都頗遠，從遠處看那光亮度就好似天上星星般咁微弱，只是有一丁點嘅光，有時都唔太肯定是不是那個方向。其實身邊不時都會有其他選手響附近， 十個八個人嘅情況下頭燈就成了一條 「火龍 」，自己就多倚靠呢 d 燈光辨別方向，而且要急步緊貼大隊以免越隔越遠，到時看不到「火龍」迷路就真係不知如何是好。

入夜後嘅路段盡是沙地，有高有低有sand dunes； 其實到 CP4 前右腳嘅防沙套已經穿了，自己還感覺到鞋入面盡是沙石，我更感到腳板起了水泡及有份疼痛。其實當時好想找個位置坐下來先修補一下防沙套以免再入沙，可是沿途完全無地方可以坐下來，唯有先繼續向前走到CP5 再算。只是到 CP 5  前不知為何狀態越來越差，身體沉重、發唔倒力、甚至有想嘔嘅感覺。那刻好擔心，會唔會係因為睡眠不足，令到自己狀態迅速下降？好不容易終於捱到 CP 5;  到CP5嘅一刻，真的不禁令我想起毅行者基維爾營站嘅情景，簡單來說，就是「屍橫遍野」，到處都係虛脫及疲倦不堪嘅選手。大會擺設左多張沙灘椅比參加者休息，結果均坐無虛席，不少選手還在呼呼大睡。我只能找個位置坐在地上，先吃下餘下那半包脫水飯，再拿出牛皮膠修補一下破爛嘅防沙套。其實原先自己有打算睡一睡充充電，只是食過飯後加上飲過大會那杯熱甜茶，體力又好似恢復了一點； 反正只餘下三十公里左右，思前想後，我最後還是決定咬緊牙筋，速戰速決，立即繼續起步出發。

很奇怪，CP5 後狀態又好似慢慢恢復過來，上 sand dunes 有氣有力，人亦越來越精神。夜越深，氣溫終於有份清涼，雖然還是跑不起，但卻可以健步如飛越行越快。這時抬頭望向天空，盡是繁星滿天，沒有光害下星星顯得特別光亮，而且七彩繽紛好不美麗。由於週遭沒有太多其他選手，我播放一些詩歌自己邊行邊唱，心靈更是多了一份恬靜。就這樣走著走著，不經不覺，就到了最後一個 CP7。其實響 CP 7 已經望到前面有燈光，好像不是好遠，那裡就是終點了。只是之前睇過 road book，理性提醒著自己，望到也好其實也還有 9km 路要走，這也反映到沙漠環境是多麼的空曠。最後這 9km 雖然大部份是 stony terrain，然而不是沒有難度：我感到腳板嘅水泡比之前更痛，走起來有點一拐一拐。幸好有行山杖嘅幫助，不致於十分影響前進速度。終點那拱門，在眼前變得越來越大，也即是越來越近，終於，穿過去了！ 最後嘅 20 米更與香港另一位參加者一起跑過去！ 整個賽事最難嘅一部份，終於成功地完成了！！

到達終點已經係凌晨 4 點多；不知是否衝線太過興奮，衝線後完全無倦及睡意。加上問了工作人員醫療站會在早上七時開門，自己想趁沒有太多人嘅時候到醫療站治理一下水泡，所以最後都決定不睡。我趁其他 tentmates 未返，趕快執拾一下背囊、洗衣服、做左幾回伸展運動，還有煲水煮飯醫一醫肚。未幾天色已開始光亮，我就到醫療站排隊等待處理腳患。傷者真的相當多，明顯地大部份都是要處理腳部問題而來。每個患者入醫療站前亦先要消毒洗腳，然後套好腳套才入醫療站讓醫生治理。輪候到我嘅時候，我告訴醫生幾個水泡位置，他就十分細心地幫我逐個刺穿後再很好好包紮一番。其實自己水泡問題不算好嚴重，相比起其他選手嘅傷勢就真是小巫見大巫。只是自己真的好想在最後一日嘅marathon day 盡情地跑一下，所以早一點處理好傷勢，希望到時可以跑得更自在。

離開醫療站，我順道走到佈告欄看看自己嘅時間同成績；大會每日都會將各參賽者當日嘅完成時間以及總排名張貼出來；今日long day 自己總共用左 19 多個小時，比起自己預算嘅21 小時快左1 個小時多，自己響狀態不足下做都可以到這個，個人而言其實都相當滿意了。

更多：
Fitz.hk Facebook專頁
[撒哈拉超馬] 第四日: 82公里長征 (上)
[撒哈拉超馬] 第三日: 無盡的沙漠
[撒哈拉超馬] 第二日: 沉重的背囊
[撒哈拉超馬] 第一日: 34公里的挑戰
張思縈@Fitz.hk
Fitz Hiking 行山