連番蝦碌的南京馬拉松
中國大陸嘅長跑比賽，近呢幾年可以話「番10番」。馬拉松賽事，由2010年嘅13場，到2015年已多達134場。2016年更達到337場。
賽事多咗，主辦嘅機構又可唔可以維持比賽嘅質素，令跑友有「賓至如歸」嘅感受呢？
其實都唔使做咩統計、研究，上國內啲跑步網睇下，就可以見到一啲稱為「長跑亂象」嘅新聞。以下挑選幾宗「亂象」事件：
----- 廣告 Ad -----
1. 2016年清遠馬拉松：番梘當蛋糕
唔知係大會錯，定係跑手眼大睇過籠。總之唔少跑手跑完之後，收到大會派發，包裝精美嘅沖涼番梘。好多跑手就以為係蛋糕吞咗落肚。結果，報導話超過12,000人不適送院，當中3人入ICU，佔參賽選手差唔多一半！
2. 南京馬拉松2016：非洲跑手蕩失路
大會原本重金禮聘幾位非洲跑手參加比賽，點知返終點一刻，返終點只係得一位蒙古選手。咁嗰幾位非洲跑手呢？大會事後話，工作人員因為言語不通，令非洲選手跑錯路咁話喎。同一場比賽，完賽證書落錯市長個大名，南京市長變咗吉林市長！
3. 黃山百公里賽2016：訓練「人在野」
在黃山舉辦嘅100公里越野賽，選手在參加後大吐苦水，指補給不足，路線縮短。有逾百位跑手組織「維權群組」，結果驚動官方出手，主辧單位被禁止再次舉辦呢項賽事。(賽後報告《雨戰黃山美景之經典中的傳奇荒謬賽事》)
沒有計時器的起終點 (黃山越野賽) 圖: 陳包栢
4. 深圳馬拉松2016：男選手得女子組亞軍
大陸比賽代跑成風，據講已經發展成重要產業。深圳馬拉松，就過份到搵男子跑手參加女子組比賽，仲拎埋亞軍！搞到咁揚，結果就梗係齊齊受罰禁止比賽。不過，上淘寶咪又可以買到參賽名額，禁唔禁其實有咩分別呢？
----- 廣告 Ad -----
5. 山東臨沂國際馬拉松2015：世界級走數
大會請咗多名世界級跑手參賽，結果9位外籍跑手，共奪得差唔多8萬美金。不過選手等足半年，都未收到獎金。最後要勞動官府追數，先可以「收返條數」。
呢幾張大支票，竟然要半年後先可以兌現。
6. 重慶馬拉松2015：你太靚仔了
重慶馬松松起步後，有人發現路邊一位負責秩序嘅警察，個樣似某位明星，有人就喺比賽期間走埋去搵佢Selfie，搞下搞下，搞到賽道擠塞，卒之呢位靚仔警察要被逼落更，上警車匿埋。
亦有人會話，佢參加過大大小小N咁多場大陸嘅比賽，比賽好到加零一。佢最權威，其他人不得立亂評論！
利申：我只係一個普通升斗市民，井底之蛙，乜都唔識。我唔敢評論，亦唔係叫人唔好參加國內比賽，只係當寫幾宗趣聞畀大家笑下咋。大人，唔該放過我啦。
更多：
Fitz.hk Facebook專頁
[跑步禮儀] 中國篇
[官媒發炮] 國內馬拉松5年增10倍，是否太多!?
Fitz Running 跑步
