[渣打臺北公益馬拉松2019] 得來不易的冠軍

視障跑手梁小偉 (左)，右邊是本文作者 Nick

跟 Gary (梁小偉) 衝過台北渣打馬拉松13公里終點後，有點激動地擁抱一翻。得左喇，終於得左喇。冷靜下來後，佢第一句就對住我講:「嘩，好刺激，真係未試過。」………

舊年 (2018年) 11月15號佢 Whatsapp 問我有無興趣領跑一齊參加台北渣打馬拉松13公里，考慮一晚後我就決定同佢去參加。

當時自己一路準備緊廣州馬拉松，由到完賽，養左一陣子傷。到12月尾先開始一齊有機會練習第一課。

成個訓練主要係練目標全程平均每公里四分半既速度。近年 Gary 一直以超長慢跑為主所以起初都幾擔心，到第二課開始有信心，直到出發前既第四課已經充滿信心。

1月13日6點24分大會槍聲一響 (視障組及VIP組別提早一分鐘起步)。起步順常順利，大約2、3百米後開始察覺到有同組別對手緊貼。全程開始展開拉鋸，三公里後開始追到早前起步既半馬組別，因為道路唔算廣闊，必須要依靠左邊跑，一路跑，跟緊貼後面既領跑者一齊要大嗌前面讓路。

2017年賽事資助圖片。 來源: 渣打臺北公益馬拉松

意外一

到半程左右，後面緊貼既對手突然慢慢向右跑，當時未有為意，直到見到一個指示牌，半馬向前走，13公里跑者要轉右。當時心知不妙，但當時道路中間已經有唔少跑者，差不多到需要轉右時我兩人要cut入去。呢一刻發生左第一次小意外……

Cut 入去時我兩被中間道路既選手撞到，大家無心的。眼見對手已經轉右了。

我: 腳有無事?
G: 無
我: 其他地方呢?
G: 繼續

2017年賽事補給圖片。 來源: 渣打臺北公益馬拉松

----- 廣告 Ad -----

意外二

往後路線只剩下13公里組別既。但第二個小意外又發生……

整條賽道共四個水站，所有水站都安排係右邊，要知道我由第一日同 Gary 跑我都已經係企係佢左邊，所以我幫唔到佢拎水。因為當時已經慢慢追貼，所以當刻無考慮放慢去水站，甚至換手。

差不多到第三個水站時……

我: 水站都係你果邊
G: 不如比我埋去試下拎

結果拎唔到，仲將數十個杯掃跌左，而且 GARY 仲將前面另一張枱成張撞跌。

我: Gary，Gary，有無事有無事?
G表情有點痛苦: 得，繼續

開始多轉彎位了，對手因視力優勢比較好 (不是完全失明)，所以呢段時間又被拉開一點。但對手期間都有換手埋水站，所以落後不算太多。10公里，45″16，唔錯。

衝線

到最後兩公里，雙方相隔唔夠三米距離，道路開始比較寬，Gary 憑著對手腳步聲掌握位置優勢兼調整速度應付最終一段路。印象中有5至6次類似情況都成功阻止對方過頭。

最後一公里，依然係對手前少少。由起步到目前，我都一直示意對手大約位置同距離，特別係對方想加油過頭時都作出提示等 Gary 作出決定。

講到呢度想講一樣好重要既野，我係領跑者。而唔係拖/拉跑者，領跑者本身能力一定要比視障運動員高，所以我一定要係控制到身體情況下，拉繩，放繩，捉手等指示去引領視障運動員可以安全地跑。

初起步的確有啲緊張，我有拉住gary走，佢提左我幾次。直到比賽後段，佢收慢少少 head 住對手，我就醒起呢兩年幾一齊練跑傾計分享時得知既經驗。我知道佢有心放慢，我知道佢等緊最後機會。

見到拱門，我示意大約仲有400米，佢開始加速，開始拉開對手。

我一路比指示:「就到，300，頂住，比埋我，仲有100，50，30，去埋……」

13.1公里。59″22 平均速度 4分31。得左喇，終於得左喇………

作者: Nick Ip-RuNick，感激 Nick 兄授權轉載。

Nick Ip-RuNick Facebook專頁
Gary Leung梁小偉- 視障跑手 Facebook 專頁

Fitz連結: https://fitz.hk/?p=112065