阿女今年跑渣馬全馬挑戰組，13同14號都有工作唔得閒去維園攞跑手包，叫阿媽去攞。
媽：「攞到喇，今年件衫冇比錯碼，仲係你最恨嘅女裝，幫你 check 埋個袋，全馬挑戰組嘅，號碼布都係你個名。」
女：「唔該晒，你冇跑手包領取信噃，睇新聞話冇跑手包領取信嘅人有人排咗兩個鐘至攞到，大會安排又混亂，你係咪排咗好耐？」
媽：「15分鐘左右，我最怕同人迫，10點幾去到維園喇。」
女：「至醒係你啦。」
----- 廣告 Ad -----
媽：「舊年跑衫啲 size 攪到亂晒龍，今年又有咩甩漏嘢?」
女：「好記性噃，今年梗係有啦，簡直係年年新鮮年年甘……報名時跑手用信用卡過數，跟住有啲跑友信用卡懷疑被盜用；又有網友想訂號碼布鎖匙扣，但係喺官方網站搵唔到佢同佢先生個號碼，打去秘書處問，竟然比錯號碼；又或者好似好多人咁，收唔到取跑手包封信，打去問又好耐冇人接電話；仲有呀，精英跑手應該喺優先起步區，但有啲跑友個號碼布漏咗綠色印；跟住朋友張號碼布，差啲比錯隔離個男跑手；有單仲攪笑，喺個 group 度收到張相，號碼布係個女生，寄行李個牌係男生；加埋維園安排混亂，隨口噏都有幾樣。」
媽：「真係好多噃，你好似都有打去問架，唔見你話冇人接。」
女：「大會個 facebook 喺月頭有講過收唔到跑手包領取信嘅處理方法，但因為我唔係親身去攞，所以要問清楚仲有咩要攞去，佢地係有人接電話，但係我等咗15分鐘囉。」
----- 廣告 Ad -----
媽：「好彩你肯等。」
1月13日 (星期六) 下晝2點，詢問處有幾百人排隊。
女：「其實唔係個個問題都好大嘅，或者人地忙中有錯，或者系統問題，香港人好緊張服務質素，有不滿就放上網公告天下，呢啲都係我被動咁收到嘅消息，可能仲有我唔知。」
阿女一邊同阿媽傾，一邊試大會 tee。
媽：「好啱身噃，今年著佢跑囉。」
女：「一定唔會，件衫越靚越唔會著，靚即係多人著啦，多人著即係唔突出，你唔見我每次比賽都唔會著大會 tee 同色嘅衫咩?」
媽：「又好似係噃。」
女：「我唔係想標奇立異，只係唔想跑完之後冇相。」
----- 廣告 Ad -----
媽：「有關係嘅咩?」
女：「你睇下呢篇文【如何在跑步比賽被拍攝又不失霸氣?】就明架喇，跑步最緊要有相嘛，如果我係攝影師，影幾萬人嘅相，個個都著瑩光黃，對眼都會疲勞，反而見到著其他顏色衫嘅跑手會醒神啲，比著你可能都會影多幾張。」
媽：「有道理……你著件衫著得咁 fit，唔會送比人啦。」
女：「你講 跑Tee共享? 今次唔會喇，難得咁啱身，我又冇瑩光黃跑衫，佢負責人講過，如果件跑衣唔係放喺屋企封塵，而係有更好嘅用途就唔好捐喇。」
媽：「試夠好瞓，就快12點喇，又話呢個星期要瞓多啲。」
女：「yes, madam! 星期日3點鬧鐘，咁早起身，諗起都驚驚。」
以上內容部分虛構，如有雷同請話我知。
每個人跑馬拉松都有佢嘅原因，可能係身痕唔跑唔安樂，可能想集郵為咗個完成牌，可能想PB，或者 just for fun，點都好，祝大家輕鬆完賽，順利到終點!
CC Physical Fitness Channel Facebook專頁
更多：
Fitz Facebook專頁
[渣馬Q&A] 如果明知練唔夠，點樣可以唔使上車?
[渣馬Q&A] 而家買新鞋好唔好?
渣馬前夕(二) DLF 好過 DNF
Fitz Running 跑步
