一篇流傳咗至少幾年嘅潮文，題為《您知道為什麼馬拉松選手不得癌症嗎？》（亦有叫《排汗與排尿的差別》），作者不詳，內容講一位「德國體育醫學龍頭」艾倫斯特嘅發現，話所有運動員，只有馬拉松選手係無患癌記錄。
之後篇文講呢位博士有個「驚人」發現，話馬拉松選手每日跑30公里，流2千公升汗水，可以排走身體有害物質，包括礦物質。而博士仲話，流汗對身體嘅好處，比小便仲多。
潮文分好多等級，有啲固然可以假亂真，但呢篇嘅水準真係好低。要破解佢，唔使用劍，用google同維基百科已經得。
事實上，成篇文就咁睇，已經有幾點令人好懷疑：
----- 廣告 Ad -----
1. 馬拉松選手無患癌記錄？
若以1896年現代奧運會作為馬拉松運動為開始，呢項運動都以超過120年歷史。到呢幾年，全球正式馬拉松賽事超過800場，拉上補下咁計，每場比賽平均五千人，咁一年都有400萬人係馬拉松選手。我唔計呢120年，剩係計呢一年嗰400萬人，呢位所謂「醫學龍頭」係咪可以肯肯定絕對無人患癌？邏輯學ABC都教過，「天下烏鴉一樣黑」，只要搵隻白色烏鴉都可以推翻名題。呢400萬人搵一個驗到有癌細胞，呢位醫學龍頭已經可以執包伏返鄉下耕田。
2. 排汗好過小便？
讀過下初中科學嘅中學生都知道，汗水由汗腺經毛孔排出體外，主要功能調節體溫。但尿液係要由腎臟過濾及處理人體多餘水份及廢物，並將其排出體外。二者功能明顯不同。如果呢位醫學博士真有其人，真係有咁突破常理嘅研究，佢點解唔喺醫學期刊發表文章，而只係淪為網絡潮文？
3. 齋吹唔使本
同大部份潮文一樣，呢篇文章又無講個研究幾時做，喺邊度做，同點樣做，又無一啲公認嘅權威去支持。最老套嘅係，連嗰個乜鬼「醫學龍頭」嘅XXX博士，都唔可以好清楚講到佢嘅真正名銜。同三號風球，四圍流傳嗰班「天台文返工嘅老友」、「貨櫃碼頭揸車嘅親戚」一樣。
唉，其實我都唔使多講，有另一位仁兄，就真係好認真咁破解呢篇潮文，大家自己慢慢睇（潮文、破解文章並列）。
潮文常見招數：唔見樣又懶係會引人暇想的相
不過，流汗雖未必可以排毒，但至少流汗可加速新陳代謝，排走身體水份，可令人減磅，令人健康。
大家就趁夏天，做多啲運動，流多啲汗啦。
----- 廣告 Ad -----
