就嚟又要去一個出名熱嘅地方比賽，上一次破咗人生比賽記錄，38度! 今次唔知會唔會咁熱呢？
熱，真係會令人懷疑人生。
天氣凉嗰陣，跑步係一種運動；天氣熱嗰陣，跑步就變咗一種執迷。
五度跑步，你係硬漢；三十度跑步，你係癡漢，三十五度跑步，好多人會覺得你係精神病漢。
但正如馬拉松傳奇 Eliud Kipchoge 所講：” Only the disciplined ones in life are free. “。熱跑就係自由嘅代價。你可以選擇坐喺冷氣房、睇 Netflix、隊冰凍啤酒，但你偏偏選擇咗烈陽下條路。嗰一刻，你唔係同人比，而係同自己對話。
----- 廣告 Ad -----
熱，係跑者嘅命中宿敵!
每個跑者都會話跑步怕熱唔怕凍，講得一啲都冇錯，因為冷只係令你想快啲郁，而熱係會令你懷疑點解自己要郁。
夏天跑步，好似參加一場唔設冷氣嘅試煉。太陽伯伯企喺頭頂睇住你，條氣未順，汗已經落雨式咁流。跑一陣，感覺好似喺蒸籠入面搵出口；每吸一啖氣都好似呼吸風筒吹出嚟嘅熱風咁，幫你個喉嚨吊鐘恤髮。
不過講真，熱跑係最誠實而具挑戰性嘅一種跑。冇得扮型，冇得靠裝備遮掩，冇得講乜乜大道理。跑到一半，你只會諗：我仲未虛脫仲未死，已經算贏。
熱到懶都係正常人性。
有時明明話今日要去跑，推開門感到外面熱浪滾滾，再睇吓個氣溫報告，心入面會有個細細聲講：不如聽日啦？
嗰個細細聲，係理性。
但熱跑從來都唔係講理性，而係講癲。你要有種 “ 我唔信邪 “ 嘅精神。
不過癲都要有限度，太陽底下跑到標冷汗，咁就唔係毅力，係自毁傾向。
熱加濕，更加係天然七武器之首。
香港嘅夏天特別毒，唔止熱，仲濕到連雲都出汗。嗰啲日子，氣溫只係28度，但濕度90%，跑咗五公里，好似游完水返嚟。
“ 濕 “ 係熱嘅好朋友，一齊出場時，好似倚天屠龍一齊咁，問你死未？冇人贏得過佢哋。你唔係喺度跑緊，而係喺度練緊神功，功成之日，天下無敵 …… 諗係咁諗囉。
建議大家，熱跑前查天氣報告，睇清楚實感溫度 嗰行字。因為有時佢寫32°C，但實際感覺可能係死線邊緣。
流汗，係修行。
好多人話鍾意跑步因為可以出一身汗，好爽。但老實講，當你跑到連眼眉都出汗、襪都榨得出鹹味嗰陣，真係一啲都唔爽。
不過有一刻你會明白，汗唔再係負擔，而係你身體同天氣嘅對話。同佢講：想我認輸? 冇咁容易!
熱住跑，其實係人生縮影。
熱跑其實同人生好似。
唔一定啱天氣，唔一定有風景，但你仲係決定出門。因為你知，唔跑唔舒服。
喺熱氣中跑，你學識點樣面對不如意：汗流滿面、心跳爆表、前面個人仲要比你慢但唔肯讓位，霸住條線。但當你撐到終點，嗰一刻，冇風，冇靚景，冇掌聲，只有一個字，掂! I did it!
因為人生有時都係咁：
生命有時好熱、好焗、好唔舒服，
但你仍然可以選擇對抗。
唔係等天氣啱先去跑，而係學識點樣喺令好多人卻步嘅熱浪中繼續前行。
尾聲：I’m on fire
熱住跑，唔係講求快，而係講求心。
當你頂住烈日仍然着起對跑鞋出門口，嗰份倔強，已經係跑者之魂。
----- 廣告 Ad -----
