絕非標題黨，「跑到爆骨」係真有其事！
「FTA香港健體治療協會」主席盧少強教練 Desmond，就係過來人。
後生嘅時候，盧SIR係學校羽毛球隊成員，未試過認真跑步。不過因為跑步呢項運動門檻低，裝備少，就試下跟人去跑下。點知，佢一試就上癮，放棄羽毛球之餘，亦加入跑班。
當時佢嘅教練好強調跑步姿勢嘅重要，例如每次操練，都要做幾百下擺手動作，而跑步成績亦因為咁而得以提升，最快紀錄，就係以3小時14分完成全馬。
不過，正所謂年少氣盛，大概五至六年前，盧SIR喺一次10公里賽事，為咗要追時間，右腳嚴重受傷！
----- 廣告 Ad -----
「醫生話呢個叫做『疲勞性骨折』，話我右腳脛骨因為勞損過度，原本已經有少少傷。而嗰次咁激烈嘅比賽，我就喺轉彎時再受重創，令脛骨爆裂！結果我要成四個月先叫做好返無事。」
盧SIR語重深長咁話：「所謂『時間重要於一切』其實係錯誤嘅想法，當你受傷之後，你根本咩都做唔到，仲講咩做時間？」
呢次嘅受傷，令盧SIR驚醒回來。佢回憶自己最初學跑步時，教練重視姿勢嘅訓練，令佢相信跑步最重要令自己健康，成績以及時間其實係次要。
肌力訓練係皇道
咁咩先係正確跑步姿勢？盧SIR解釋話，最重要係肌力嘅運用：
----- 廣告 Ad -----
「大多數人跑步時受傷，都係因為唔識得運用肌肉。好似話，唔識得落腳，令軟組織或者關節，承受不必要嘅壓力。我哋喺治療工作時，接觸過一個案，係有位跑手習慣以前掌落地，但因為用錯力，令前掌嚴重骨折！」
「所以我好強調，運動成績其實一啲都唔緊要！我喺跑班訓練時，就會用一半時間去鍛煉肌肉，減輕大家喺運動時受傷嘅機會。至於姿勢方面，因為各人有唔同習慣，要改都唔可以一時三刻改到，就唯有喺肌力入面著手。」
盧SIR補充話：「大家都會畀錢去學游水，去學打網球，但係無乜人要畀錢去學跑步。因為大家都以為跑步係與生俱來，唔使學都識。不過正正因為咁，大家唔太重視姿勢，而搞到成日有人受傷。而我哋希望可以糾正呢個錯誤諗法。」
本身有玩開詠春嘅盧SIR仲話：「打交同武術最大分別，就係武術講求系統，講求方法。而跑步訓練亦應該有嚴謹嘅系統。」
盧SIR而家教跑班，仍堅持以鍛煉肌肉為重點。
成立「FTA 香港健體治療協會」
盧SIR以呢個原則，喺2015年成立咗「FTA 香港健體治療協會」，透過整合各種專業人士，將伸展治療、物理治療、飲食營養等健康知識，再結合各項運動，去推廣現代都市人嘅健康生活。
盧SIR解釋，FTA嘅目標係成立一個平台，透過Workshop等培訓，令唔同職業，唔同背景嘅都市人，都有健康嘅生活。
「好似話，一般白領嘅問題係腰痠背痛，而飲食業從業員就因為企得多而有腳痛。我哋會透過一啲Workshop去教佢哋做唔同嘅伸展運動，亦提供唔同嘅健康資訊，希望大家都可以喺身體同心理都得到健康。」
圖片來源：Felix Chung
FTA旗下亦有跑會「陽光動跑」，向跑友推廣正確嘅跑步態度。佢哋會去志願機構提供服務，盧SIR就試過為一班邊緣青年深宵開跑步班：
----- 廣告 Ad -----
「因為嗰班青人嘅作息時間同一般人好唔同，所以呢個跑班要喺凌晨開班。不過跑步可以令佢哋學識紀律同規距，而做運動又可以提升佢哋嘅自信。對我來講，真係好有意義！」
盧SIR以「陽光動跑」提倡正確跑姿。
更多：
Fitz.hk Facebook專頁
[跑道上的智者] 金SIR的跑步人生
[年少多好] 跑步環台1000公里 HeHe畢業之旅
[專訪馬高教練] 同你講心的魔鬼
一個「廢青」跑出全世界的故事
Fitz Running 跑步
