[社區跑步設施] 荃灣 照潭徑

巴士站上面就係荃景圍體育館

搬咗去荃灣幾年，已經當咗自己係荃灣人，所以好想發掘呢個社區。呢條緩跑徑，外人可能覺得無乜特別，如果呢篇文落入X假期手中，題目一定會係「荃灣緩跑秘境，正到出水!」其實，呢條緩跑徑絕對稱唔上「好很正」嘅級數，只係我作為荃灣居民，見到呢個地方似乎無乜人講過，畀大家知道喺荃灣跑步，都唔係得青山公路啫。

呢到正式名稱叫「照潭徑」，潭就無，坑渠就有一條。位置喺愉景新城巴士總站入面，沿住地鐵車廠外圍直入荃景圍。緩跑徑單程長約500米 (Google Map 計)，如果來回一轉，再加埋跑過坑渠對岸，都有2公里。

呢條緩跑徑嘅好處，係臨近愉景新城以及荃景圍體育館，補給、沖涼、各方面一應俱全。跑得唔夠喉，可以跑多1公里出荃灣海濱公園跑青公，甚至直上柴灣角跑入元荃古道都得。而且佢雖然算喺荃灣市區，不過緩跑徑一啲都唔多人 (因為行人通常行荃景圍大路)，最啱hea跑。

荃灣照潭徑

• 起點: 愉景新城巴士總站側 (荃景圍體育館下面)
• 長度: 單程約500米 (可來回並過坑渠跑過對岸，總長度可達2公里)
• 配套: 荃景圍體育館、公共籃球場、商場 (有7仔、餐廳，甚至宜家家居)，緩跑徑有坐椅有健身設備
• 建議使用方法：屋企人去宜家睇傢俬，你唔使拎permit匆匆去索番幾K，沖埋涼換埋衫都夠時間。

位置圖

坑渠對岸係一條行車路，不過車輛好少

講下講下，荃灣仲有一處無乜人介紹過嘅緩跑地方，下次再講。

更新：感謝荃灣友網友提點，呢條緩跑徑晚間有以下問題:

1. 燈光昏暗
2. 太多人放狗，並有狗隻隨處便溺
3. 夏天多蚊

編輯誠徵: 各區跑步、做運動或行山徑嘅設施介紹，冷門熱門皆可。無時間寫文，可傳來圖片及簡單介紹，我們可代為整理。電郵: [email protected]

Fitz連結: https://fitz.hk/?p=115515