photo credit : Edmond Cheng
自2017年5月起開始著丫拖跑步，至今已接近七年了。跑咗咁多年，其中一個心願，係希望可以「丫拖」 (按: 香港人稱為人字拖) 上陣，一口氣跑晒香港所有嘅路賽馬拉松。
但係一直令自己卻步嘅原因，係其中一個大概搞咗十年左右嘅全馬口碑不太好，令我冇動力去報名及自製這個大滿貫。
貶眼到咗2023/24 賽季，全城街馬第一次舉辦全馬。至於那個口碑不佳的馬拉松則全無動靜。太好了，終於可以在不用參加那口碑不佳的馬拉松情況下，挑戰香港馬拉松大滿貫了。
----- 廣告 Ad -----
跟住就係報名、練習嗰D三幅被…… 不如廢話少說，直接跳去比賽日啦！
首關: 街馬全馬 17/12/2023
今次係全城街馬嘅第一個全馬賽事。因為係本季第一馬，我比自己嘅要求係「唔使快，當一個輕鬆長課跑，sub-4 收貨」。結果做到了，仲要係人生第一次全馬 negative split。今次亦應該係我跑咁多次馬拉松以來最輕鬆嘅一次，冇抽筋，影下相，食下嘢，唔經唔覺就跑完。最終以3:48:44 完賽，跑完都未夠九點。
賽道上真係有好多嘢食，我記得自己食咗燒腩仔、砵仔糕、飯團等等，但係好可惜錯過咗一口鮑魚。
賽道其實唔係太好跑，總爬升可能仲高過渣馬，而且密閉路段太多，有幽閉恐懼者不宜。不過有部份路段都幾有趣，例如會經過行人隧道，以及一段長約2-300米嘅草地等等，整體而言都值得一跑。唯一覺得唔太好係賽事係清晨5:00鳴槍，即係2:30就要起身出門。希望主辦單位下年可以研究吓將起跑時間延遲一點。
photo credit: Billy Lam
次關: 渣馬全馬 21/1/2024
街馬後有五個星期準備渣馬，期間冇再做30公里以上的長課，反而加強速度訓練，10K tempo 至超馬速的半馬等，希望比賽時可以造到理想時間。
比賽當日，天氣不錯，全程和好友 Alen 和 Edmond 兄一齊跑。頭40公里冇大問題，速度 keep 得好好，每5公里用時都保持住24:xx，去到40公里位置用時只係3:16:17。
----- 廣告 Ad -----
點知去到最後1公里就出事! 我跑到斷咗片! 衝綫後 Alen 和 Edmond 兄馬上陪我入咗救傷站，才慢慢恢復意識。恢復意識後第一件事問兩位朋友我係咪DQ 咗完成唔到賽事? 更搞笑係我衝綫後，即使斷了片，但竟然有按停GPS手錶，證明呢樣嘢真係跑手嘅本能!
我最後嘅記憶係跑上馬師道天橋，但係之後係點樣進入銅鑼灣、點樣衝綫，Sogo 外氣氛有幾熱閙，到執筆嘅呢一刻我都仲係未記得返。睇返網上影片/相片，以及同行跑友覆述，當我進入銅鑼灣後體力急速下降，停低了休息好幾次，之前行下跑下咁衝綫。奇怪嘅係，竟然咁都比我 PB 咗，完成時間係3:29:23，PB 咗一分鐘左右。
多謝救傷站嘅醫生姑娘同其他工作人員悉心照顧，亦好多謝兩位好友犧牲咗自己做好時間，在我斷片時都陪住我，之後又全程陪住我喺救傷站接受治療。此外，亦好多謝另一位街坊跑友賽後陪我返屋企。
當然更要多謝太太悉心照顧，一返到屋企就即刻有得浸香薰熱水浴，舒筋活絡。沖完仲有得嘆熱檸樂煲薑，飲完精神為之一振！
今年大會安排各方面都算可以接受，唯一「投訴」係個完賽牌比起早幾年仍然係好hea，只係僅僅好過上一屆少少。(上年嗰完成牌就簡直係過份: 冇年份、冇日期、冇距離)
photo credit: Mike Chui
尾關: 中國沿岸馬拉松 CCM
渣馬後兩星期，仲未抖夠就嚟挑戰呢個我夠膽話係全港最高難度嘅全馬路賽: 中國沿岸馬拉松（China Coast Marathon CCM)。
佢係全香港歷史最悠久嘅全馬賽事，有超過40年歷史。賽道大致係麥理浩徑第一段來回兩次，爬升高度約680米，大上大落，爬升幅度係渣馬的兩倍幾，堪稱地獄賽道。比起它，渣馬最多只是煉獄賽道。
呢個比賽唔講得少，細細地嘅賽事 (全馬只有301人) 但係取得國際馬拉松及道路賽協會 (AIMS) 認證，即係話可以用佢嘅成績嚟報一啲海外嘅著名馬拉松例如波士頓等等。我六年前玩過一次，當年因為帶傷上陣所以未盡全力，以4:34完成。今次希望可以sub-4，以後就可以將呢個賽完全從我的 bucket list 上刪除!
比賽當日濕度100%，又全程下著毛毛雨，要保守一點，以策安全。上半馬都幾順利，用時約1:54 。下半程基本上係上半馬嘅賽道嘅翻版，而半馬跑手係呢個時候大部分都已經完賽，剩下全馬跑手孤獨作戰，仿如西西弗斯式嘅意志考驗。
----- 廣告 Ad -----
勉強應付著無窮無盡嘅大上大落，到咗30k過後開始有少少作抽筋，馬上飲咗一包抽筋水，並放慢速度。捱到最後5K望一望表，見 sub-4 如無意外已成囊中物，決定採取穩守策畧: 為確保一定要sub-4，絕對唔可以抽筋，所以決定餘下路程上斜快行，平路和下斜就 jog。呢個策略好成功，最終保住 sub-4， 以3:55:28 完賽。
賽事搞得好好，工作人員和義工都好落力好熱心。而佢嘅最大特色係衝線嘅時候，工作人員會開咪，大聲宣布衝綫跑手名字及bib no， 彷彿每位完成者都係冠軍一樣!
我好推薦大家參加 CCM，起碼要試一次! 如果完成到CCM，相信世界上都冇幾多個路賽馬拉松會難得到你。
搞掂埋 CCM， 香港三大馬拉松丫拖大滿貫亦宣告順利完成。 最後分享少少穿丫拖跑步嘅經驗。
丫拖跑步心得分享
- 開始着嘅丫拖嘅時候係要時間適應，起初更加可能會刮腳。可以由幾k開始，慢慢加長，令自己適應。
- 如有需要可以着襪，增加穩定性和吸汗。我自己多數唔着，但係呢三隻全馬我着咗兩次，一次係因為街馬天氣太凍着襪保暖。另一次係CCM天氣潮濕，驚自己會出好多汗。過往經驗係丫拖防水但不防汗，汗水滑孱孱的質地會好跣腳，着咗襪就有助吸汗。
- 如果適應咗之後，我認為著Y拖跑步係唔會慢過一般跑鞋 (碳板鞋就唔敢講)，我自己着咗丫拖之後，路跑時間冇退步，今次渣馬更 PB 了。以我自己經驗，丫拖係可以由4:00/km 至 7:00/km 的速度都應付自如的。
好開心今次前後啱啱用咗50日，成功完成咗丫拖香港全馬大滿貫。賽前同自己講，如果今次CCM sub-4 就以後都唔會再參加，但寫完呢篇文之後又心郁郁想下年再挑戰，再跑好D時間。
不過我估所有跑友都係咁㗎啦，永遠都坐唔定，以自虐為樂。
