[與神人拍跳系列] 小小小秘笈

同神人「拍跳」咪以為好輕鬆，當日小弟爆到七彩

仲有一個月就毅行，而家先分享點操，操幾多，都好似已經有D fuxking too late. 上星期日剛剛同Team Salomon 神人 Jacky Leung 「拍跳」，操左一轉大嶼山 (路線: 梅窩>大東>鳳凰>觀音山>羌山>靈會山>大澳)，神J 分享左好多 advanced skills 獲益不少，好難一次過講晒出來。 當中有D小小細節，小弟覺得都幾值得分享，幾實用同埋大家比較易消化，比賽時可以留意一下!

Jacky 一個好肯分享既高手，最重要係……..佢肯等埋我! (模擬對白 Jacky: 到未呀?)

*今篇文以文字為主……圖片欠奉。因為又要跟著神人 pace (其實跟唔到)，又要聽書，又要影相……小弟暫時未有咁既實力 (重點：當日我爆到7彩，真係無力影相)!

1. 放鬆膊頭好緊要

「推爆」/「撞牆」，我諗無人未試過。其實重點係大家 over used 或者往往比賽開段 chur 到自己太盡，我初初跑山時，非苦 Cap William 告誡我: 上山又要快，平路唔 jog 又話蝕，落斜唔衝又唔得。上中下三路都去盡，唔爆就假! 所以適當既放鬆，回氣及平穩番心律，係必須的!

至於如何上山時 Recover 當中有人會教雙手放身後或按腰，令身體挺直，腹胸擴大，配合平穩既呼吸，從而平復心律。而 Jacky 表示其實無論雙手放身後或按著腰部，其實最終目的係想令膊頭放鬆，因為特別係上山時，大多數人都會攰到膊頭僵硬，彎晒腰，急速喘氣。而雙手放身後或按腰，其實係一個方法去「硬性」提醒自已放鬆及平穩呼吸。

而最 advanced 既係要訓練到令自己習慣隨時隨地都可以放鬆膊頭，而最理想既效果係身體可以時刻保持挺直，雙手可以好似平時行街般自然擺動，配合有節奏既呼吸 就可以在一個輕鬆既狀態又可保持上山的速度.

2. 落山想唔膝頭痛/ ITB 有事? 提高步頻+前掌

「水浪窩」、「畢架山」、「鉛礦坳」都係毅行既膝痛熱點，因為呢幾段大落斜都幾攞命，特別係個D 大石梯級，而好多人都往往輕視落山，覺得衝得快好世界。大級大級跳落去，個個都落山王上身，跳既時候真係好爽，但去到中段，肌肉及體力開始下降，更加上 ITB 太緊，膝痛就來料!

一般人通病係在落山時，大級大級跳落去，腳掌著地力度過重及長，壓力上到膝蓋，所以在一大段下坡後，好多人都會膝頭頂唔順。

而 Jacky 表示，下坡要保持速度，重點不在你跳到幾大步，步跨有幾大。重點係「步頻」!

最理想既技巧係提高步頻速率，以快而短既節奏. 盡量以前掌輕輕著地。重點在於縮短腳掌與地面接觸的時間，就可減輕雙腿壓力。用4個字就可以簡易形容「蜻蜓點水」!

Video: 00:29 起，Mo Delvin 及 Tom 完美示範

3. 心態決定境界

除左技巧外，心態亦係成功既決定因素，當日小弟同神J 一口氣上完大東加鳳凰，已經油盡燈枯。小休完再上「三山」其實已經死死下。上面講個D 技巧都攰到實踐唔到。腰越行越彎，頭越 Dup 越低……越行越無心機!!!! (呢D 狀況大家係咪好熟悉呢????)

而當時 Jacky 表示，當疲憊不堪時，更加要抬起頭，放鬆膊頭，望下D遠野，享受一下山景。

即使當時D風好小都好. 都要去嘗試享受下，深呼吸……重點: 問下自己上山既原因係乜?

唔好諗：仲有幾耐先到? 點解今日咁L熱?

調整自己心態，享受山既美景/樂趣 ~ 心態決定境界!

爆到7彩既我，終於熬到放飯…….!!!!! 反觀神J…..輕鬆到呢!

最後，從 Jacky 身上我感受到地球人同外星人既分別! 不是在於體能+技巧，因為只要有決心，肯投資時間去訓練，終有一日你會做到。而分野係心理質素，卻往往先係地球人既「樽頸位」!

Jacky Leung

• Team Salomon 運動員
• 正職: 物理治療師
• 成績簡介:
  2017 Translantau 100 Overall亞軍，2016 年毅行者混合冠軍
• 另外，一篇 Jacky 好詳盡嘅分享