----- 廣告 Ad -----
提起玻利維亞,相信好多人已經會聯想起「天空之鏡」呢個地方;「天空之鏡」其實係全世界最大嘅鹽湖, 正式名稱叫「Salar de Uyuni」, 位於玻利維亞其中一個市填 Uyuni 裡。每逢雨季,落雨令湖面大量積水嘅時候會產生鏡子反照嘅效果。
![](https://i0.wp.com/fitz.hk/wp-content/uploads/2018/10/Ultra-Bolivia-Race-玻利維亞越野賽-0110.jpg?resize=760%2C506&ssl=1)
我真係覺得,天空之鏡係人生中必須要到此一遊嘅地方
2012年我曾經都展開過追鏡之旅;當時入境殊不容易,名符其實要過關斬將,最後千辛萬苦下終於成功去到能夠一睹天空之鏡嘅絕世奇觀,簡直畢身難忘! 嗰陣我已經同自己講 :「有生之年,我點都要再踏足呢個地方多一次!」
----- 廣告 Ad -----
開始出嚟參與跑步比賽後,曾經有朋友同我講:「喂! Uyuni 都有個比賽跑喎!」細閱賽事資訊後知道比賽原來係以 multi stage 形式進行跑足7日兼170公里。不過嗰陣自己仲未玩過 multi stage,對「self sufficient」毫無概念,當時人生最長亦只係玩過100公里嘅比賽,覺得「要自己揹晒啲比賽物資跑咁長咁驚、咁難玩嘅?! 」加上玻國入境真係要搏下並非100%成功,種種原因下令到自己卻步唔敢去參加呢個比賽。
![](https://i0.wp.com/fitz.hk/wp-content/uploads/2018/10/Ultra-Bolivia-Race-玻利維亞越野賽-0210-e1539827543301.jpg?resize=477%2C636&ssl=1)
好早時期已經知道有呢個玻國鹽湖比賽,當時只係跑170公里,但已經嚇到我唔敢玩
![](https://i0.wp.com/fitz.hk/wp-content/uploads/2018/10/Ultra-Bolivia-Race-玻利維亞越野賽-0220.jpg?resize=535%2C680&ssl=1)
2012年玻國對特區護照入境仍未放寬,我係用 BNO 扮英國護照入境,所以要特意兜個大圈由阿根廷細關卡過境,由 Salta 搭長途車一路北上入玻國,確是十分頻撲
2016年亂打亂撞下參加左 MDS,雖然因為準備功夫欠充足整個比賽跑得相當辛苦,同一時間卻令我認識左一種自己認知以外嘅比賽模式。當時口裡雖然話:「咁辛苦,我以後一定唔會再玩 multi stage! 」,但其實心入面蠢蠢欲動希望可以再試一下類同嘅比賽。未幾響網上得知玻國終於放寬中國護照嘅入境可以做落地簽證; 一得知呢個消息,我腦海已經即時諗返起鹽湖個比賽;我知道,自己係會去的了。當刻我真係由心地左笑左出嚟; 諗唔到終有一日,我竟然可以響天空之鏡上跑比賽!
![](https://i0.wp.com/fitz.hk/wp-content/uploads/2018/10/Ultra-Bolivia-Race-玻利維亞越野賽-0310.jpg?resize=760%2C506&ssl=1)
參加 MDS 帶領我進入一個新領域,認識了 multi stage 嘅比賽模式
----- 廣告 Ad -----
![](https://i0.wp.com/fitz.hk/wp-content/uploads/2018/10/Ultra-Bolivia-Race-玻利維亞越野賽-0320-e1539666157446.jpg?resize=590%2C641&ssl=1)
見倒入境處列出特區護照免簽證或落地簽證國家名單中包括左玻利維亞,我雙眼立即發光
立定主意,就要開始唔同嘅準備功夫。入境雖然係容易左,但仍然有好多其他情況要去應付。最嚴峻嘅,係 Salar de Uyuni 位於海拔3600多米高,整過比賽都會係呢個高度甚至以上進行,全屬高原地帶,也即是有機會有高山反應。雖然自己都曾經試過參加過珠峰馬拉松,響海拔3400米至5400米嘅高度比賽過並無出現過問題,不過身體狀態每次都唔同,今次無高反亦唔代表下一次一定唔出現,尤其今次仲要負重、連續跑好幾日,去玻國路程遙遠頻撲等等等等可能令身體虛弱左令較大機會出現高反。不過高山反應實在無法100%避免,我個人亦不太想用藥物輔助 (有藥物可以減低高反出現,畢竟都會有副作用),於是響去年年底,我特意到台灣一趟並攀上全台灣最高嘅山峰玉山 (差不多有海拔4000米高),希望比身體再有機會接觸及適應高原環境。結果過程好順利,亦都為我對應付呢次比賽打左一支強心針。
![](https://i0.wp.com/fitz.hk/wp-content/uploads/2018/10/Ultra-Bolivia-Race-玻利維亞越野賽-0410.jpg?resize=760%2C506&ssl=1)
14年曾經同朋友到尼泊爾行山到3千多米海拔高 Poon Hill,當時已經有十多年無去過高原,但都無高山反應。嗰陣發現自己對高原嘅適應能力似乎不俗
![](https://i0.wp.com/fitz.hk/wp-content/uploads/2018/10/Ultra-Bolivia-Race-玻利維亞越野賽-0420.jpg?resize=473%2C680&ssl=1)
15年為尼泊爾地震後學校重建籌款而參加珠峰馬拉松,第一次響海拔5400咁高嘅地方比賽。慶幸當時亦無高山反應;因為咁嘅緣故促使我去嘗試參加今次嘅鹽湖比賽
![](https://i0.wp.com/fitz.hk/wp-content/uploads/2018/10/Ultra-Bolivia-Race-玻利維亞越野賽-0430.jpg?resize=760%2C570&ssl=1)
心入面早已計劃參加鹽湖比賽,所以去年刻意去台灣登上最高峰玉山,等自己身體可以多啲機會接觸高原加強適應
除左高山反應外,負重亦係呢個比賽需要重點注意嘅地方。上次參加 MDS 太過自負,一心諗住「食老本」無練過負重就去比賽,結果過程辛苦到不得了幾乎「客死異鄉」; 汲取過沉痛嘅教訓後,今次真係唔敢再怠慢,比賽前四個月我已經開始練習負重10kg跑步,每次12至18公里不等,逐漸慢慢加到30公里。 初初練負重都相當辛苦,尤其練習嘅時間係於香港嘅夏天,每次練完都有成身散晒嘅感覺。不過我好清楚,如果呢一刻唔努力啲練習,到時響高原負重跑,就只會百上加斤更加吃力的了。
![](https://i0.wp.com/fitz.hk/wp-content/uploads/2018/10/Ultra-Bolivia-Race-玻利維亞越野賽-0510.jpg?resize=760%2C464&ssl=1)
無乜準備下靠「老本」去參與 MDS,結果經歷十分慘痛
![](https://i0.wp.com/fitz.hk/wp-content/uploads/2018/10/Ultra-Bolivia-Race-玻利維亞越野賽-0520.jpg?resize=453%2C680&ssl=1)
完全無練過負重下去參加比賽,一句總結: 自作自受
![](https://i0.wp.com/fitz.hk/wp-content/uploads/2018/10/Ultra-Bolivia-Race-玻利維亞越野賽-0530.jpg?resize=760%2C552&ssl=1)
汲取過沉痛教訓後,鹽湖比賽前四個月我就開始左負重訓練,每個禮拜都揹住10公斤跑12至18公里
![](https://i0.wp.com/fitz.hk/wp-content/uploads/2018/10/Ultra-Bolivia-Race-玻利維亞越野賽-0540.jpg?resize=760%2C518&ssl=1)
早前「極地同行」同可藝中學嘅同學及其他唔同殘障嘅人士參加左戈壁100公里,並推住特製輪椅讓病童一齊參與。我同佢地一齊練習指點同學如何應付比賽,順道都比自己負重練左場30公里長課。
----- 廣告 Ad -----
相信好少人會考慮去南美比賽,其中有一個好關鍵嘅原因,就係路途相當遙遠,不折不扣的山長水亦遠。香港無直航機飛去南美,最方便通常係響美國嘅 L.A. 轉機,機程連 transit 等候時間,動軋都要24 至28小時。只是因為self sufficient 嘅比賽下我要煮食而需要帶燃料,而美國的 FAA (Federation Aviation Administration) 規定連寄存嘅行李都唔可以有任何可燃嘅物品。迫不得意下我唯有避開最省時嘅美國轉機;最後響要遷就自己可以放工後直出機場嘅航班下,我只能選擇響加拿大 transit,已經馬不停蹄飛機駁飛機咁直去集合城市玻國嘅 La Paz,我計算過,最後仍需要超國 50 個鐘,絕對係破晒我以往咁耐以嚟搭長途機嘅紀錄。我好記得,去南北極都真係唔駛咁耐。
![](https://i0.wp.com/fitz.hk/wp-content/uploads/2018/10/Ultra-Bolivia-Race-玻利維亞越野賽-0610-e1539791615684.jpg?resize=620%2C664&ssl=1)
多得美國 FAA 嘅規例連 CHECK IN 行李都唔可以帶燃料,我無得響美國轉機要另尋中轉站,最後加重左行程時間
![](https://i0.wp.com/fitz.hk/wp-content/uploads/2018/10/Ultra-Bolivia-Race-玻利維亞越野賽-0620.jpg?resize=760%2C439&ssl=1)
去玻國 La Paz 必須響秘魯嘅利馬轉機;單係去利馬,已經要42個鐘頭多
當然辛苦、長途跋涉呢啲係唔會有損我嘅興緻同決心; 最令我擔心的,畢竟都係入境問題 (因為自己完全控制唔倒的……)。縱然已官方宣佈特區護照可以做落地簽證,不過我已不停響網上搜索,發現新措施實施以嚟都搵唔倒有人直接響 La Paz 做落地簽證嘅案例 (咁就取唔倒經添!),前人通常都係響秘魯嘅 Cusco 庫斯科先做簽證再由 Puno 過境去 La Paz。由於假期有限,雖然我怎樣都需要先飛去秘魯嘅利馬,不過我真的無鬆動嘅時間再特意去 Cusco 做簽證。最後我貫徹自己一向嘅冒險精神,一於心口掛個「勇」字身先士卒就試一試! 儘管做落地簽都好,都要響出發前15日內做左網上申請,然後 Print 左個申請書出嚟入境嗰陣再同你對文件。過程係繁複,不過為左可以到天空之鏡跑比賽,呢啲純粹只屬小事一樁。
![](https://i0.wp.com/fitz.hk/wp-content/uploads/2018/10/Ultra-Bolivia-Race-玻利維亞越野賽-0710-e1539791698471.jpg?resize=750%2C575&ssl=1)
就算做落地簽證都要事前響網上做左申請;網上申請步驟雖然無美國咁繁複,但都相當冗長。最令人匪夷所思嘅 upload 上去嘅 file 唔可以超過500kb! 係500kb!! 文件檔案就得啫,圖片嗰啲點搞好呢?
![](https://i0.wp.com/fitz.hk/wp-content/uploads/2018/10/Ultra-Bolivia-Race-玻利維亞越野賽-0720-e1539791674177.jpg?resize=501%2C673&ssl=1)
網上填晒資料會出左Form比你到入境時要交,但出左呢張表都唔一定係申請成功,係要去到先知
呢次比賽路途好遙遠,加上只得我一個香港參賽者,簡單啲嚟講即係會缺乏支援,有什麼事都預左要靠自己。所以今次一定要準備充足。我好細心地思考點樣去鋪排及應付比賽,包括閱讀網上所有比賽嘅資料、響 google map 度研究比賽路線實際環境大概係如何、逐一試試唔同嘅食物及比賽乾糧看看邊樣較適合自己,每當有疑問時立即 email 大會去查詢。好值得欣賞嘅係,大會負責人一直都好 helpful,有問必答而且非常有效率,對我嘅疑問亦解答得好詳細,亦因為咁令我對比賽多左一份安心。其實唔好少看大會會回應參加者疑問呢一個過程,我試過響好多比賽提出查詢都石沉大海,求助無門,最後令我無法好好準備及享受比賽。今次我好覺得大會有重視及尊重每一個參賽者嘅參與,自己亦相對地會投入更多心機去跑呢一場比賽。
![](https://i0.wp.com/fitz.hk/wp-content/uploads/2018/10/Ultra-Bolivia-Race-玻利維亞越野賽-0810.jpg?resize=689%2C680&ssl=1)
呢個比賽預左唔會有太多亞洲人(因為對亞洲人嚟講去南美真係太遠了!)香港人就更加得我一個
![](https://i0.wp.com/fitz.hk/wp-content/uploads/2018/10/Ultra-Bolivia-Race-玻利維亞越野賽-0820.jpg?resize=760%2C536&ssl=1)
賽事負責人叫 Jerome,佢係法國人,響我報名參加比賽個過程入面都好helpful,一洗我覺得法國人總有份傲慢嘅印象
(待續……)
花姐跑攝遊世界 Facebook 專頁
Ultra Bolivia Race大會網頁
----- 廣告 Ad -----
Fitz連結: https://fitz.hk/?p=105361
Fitz Facebook 專頁
[Ultra Bolivia Race 玻利維亞越野賽] 張思縈女子組奪冠 亞洲第一人
Fitz Running 跑步