9月21日，菲律賓宿霧舉行了一場相信是東南亞首個真．赤足路跑賽「Barefoot & Sandal Roadfest 2025」。大會旨在倡導參加者回歸本能，鼓勵以極簡主義投入跑步運動。早前曾多次參與赤足賽事的 LRT 創辦人兼 CEO Leo Chan (陳利)，就代表 Barefoot Asia 參加了21公里的項目，是賽事唯一香港參加者 。
「Barefoot & Sandal Roadfest」設有兩個組別: 赤足組 (Barefoot) 及赤足鞋組 (Barefoot shoe sandal) ，賽事名稱 “Roadfest” 看似輕鬆「嘉年華」 ，實際挑戰卻遠超預期。首先參加者要在半夜起步，在炎熱潮濕的天氣下，面對腳下各種路況，挑戰十足。Leo 形容夜間的路面崎嶇不平且充滿沙石，甚至比早前參加過的日本飯能赤足越野賽更艱難。最終，Leo以第七名完賽 。
賽道狀況
----- 廣告 Ad -----
Leo 第一身分享 – 赤足「馬」上回顧 – Barefoot and Sandal Runfest 2025 (BSRF, Cebu)
呢場係我第六次長距離赤足比賽。過去一年，我已經完成咗五場全赤足半馬同一場着赤足鞋嘅全馬。當我喺 Facebook 見到 BSRF 公佈 — 呢個係菲律賓宿霧 (Cebu) 同埋應該係亞太區首場嘅赤足路跑賽 — 即刻覺得一定唔可以錯過。比賽有兩個嚴格組別：全程赤足同赤足鞋，途中換組就會即刻被取消資格。大會仲提醒部分路段會好「刮腳」。
賽事有 21 公里、10 公里同 5 公里，適合唔同程度嘅赤足跑手。不過 21 公里凌晨 3 點就起步 (短程 3:30 AM)，係我 25 年跑齡以來遇過最早嘅起跑時間! 雖然前一晚早瞓，但始終休息唔算充足。
比賽現場氣氛勁正，有音樂、有雷射燈，仲有一班赤足跑手互相打氣。除咗之前喺日本參加過嘅山徑賽，呢次算係我第一場真正嘅赤足公路賽。唔同於平時同啲着碳板鞋嘅跑手競爭，呢度大家都係同一個挑戰 — 用雙腳直接對抗路面。
3 點開跑，第一段路已經超 rough：凹凸唔平又多細石，雙腳一開始就好痛。不過身邊好多選手飛快衝過，之後先知原來佢哋好多已經有十年以上赤足經驗，特別係宿霧本地跑手。
----- 廣告 Ad -----
我一開始保守，大概 5:45/km 配速。去到平滑嘅柏油路就舒服啲。我跟住一位熟路嘅跑手跑，佢仲叫我「大家互相推動」，我哋一齊跑咗幾公里，直至 13 公里後佢慢慢落後。
21 公里要跑兩圈。到中途我睇 Amazfit TREX 3 Pro 已經顯示 11 公里，心知賽道長，最後果然係 22.2 公里。
第二圈我同一位叫 Ramon 嘅跑手一齊跑，佢步伐勻稱、姿勢靚。無論路面幾刮腳，佢都穩定喺我前面，成為我嘅心靈配速員。我哋一路踩住馬路上白色油漆線，稍為高起，舒服少少。我亦照計劃每 6 公里食一包 Maurten gel，體能保持得幾好。
最後 5 公里開始真係硬食，但望住 Ramon 頂得住，我都咬牙堅持。最終我用 2:08:59 完成，雖然同自己 1:51 嘅赤足 PB 仲有距離，但面對咁 rough 嘅路況加上濕熱天氣，能夠企硬跑完已經好滿足。
Ramon 遲我 30 秒衝線，之後我哋仲傾咗好耐，好似老朋友咁。原來佢已經赤足跑咗 13 年，仲曾經全程赤足完成 100 公里 ultra，用咗 16 小時，真係超勁！佢仲讚我配速穩定，對我嚟講係莫大鼓勵。
Ramon及Leo
雖然唔係 PB，但有人同我講我係 全場第七名 (約 150 人之中)。無論點都好，今次宿霧 (Cebu) 嘅比賽對我嚟講係好大嘅收穫 — 頂住挑戰、認識咗新朋友，仲繼續行緊赤足馬拉松之路。
多謝 BSRF，下年希望可以再嚟!
----- 廣告 Ad -----
要特別多謝 Barefoot Asia 一直以嚟對我嘅支持。無論係平時練跑 HYROX，定係返工訓練，我都會著佢哋嘅高質赤足訓練鞋。佢哋唔單止舒服，仲幫我訓練好小腿同腳掌嘅肌肉力量，令我可以應付各種赤足比賽同高強度運動!
