續上篇:《跑步裝備: 要Fashion又要Function》
唔跑得步 講下跑步的心
今日唔講點樣跑快啲唔講 PB，講跑步心態。
有一日同朋友茂利食飯，落咗 Order 等食物上枱之間，各自習慣性的一邊吹水一邊碌 IG 碌FB，八卦嘅茂利偷我手機，然後語帶不屑話，喂大哥誠乜你睇啲 page ，唔係男人喪跑就係女人喪步再唔係就係男男女女一齊喪跑，又半馬又全馬又超馬，悶唔悶啲呀?( 事實當然唔止，咁啱果一刹那 DJSoda，lurehsu，studiocou_body，alisime 無更新啫!)
Nike 創始人Phil Knight 講過：” 我堅信如果塵世間每個人每日外出跑上幾公里，世界就會變得更美好。”
梗係，因為人人都要買一雙好啲嘅跑鞋，世界美好之餘，Nike 嘅世界就更加美好啦，您會咁諗!
事實上，跑步看似微不足道鬼咁簡單，好似係人都識，但當你肯長久堅持落去，就會漸漸發現，佢會帶俾你意想不到的驚喜。
----- 廣告 Ad -----
有前輩話，跑步能夠改變人嘅外貌，增強人嘅體質，清除煩惱令你身心舒暢，身與心都得到雙重健康活力。
太高深嘞大佬!
我反而 Buy 蔡東豪講嘅話，跑步，其實亦係一種修行，在整個過程中，不斷地改變自己、修煉自己，從體態到心態。
又有人話，跑步3K專治各種唔順超，5K專治各種抑鬱，10K跑完心情坦蕩，所以跑步，的確係治癒一切嘅良藥。
咁心理醫生失鬼晒業啦大佬?
----- 廣告 Ad -----
但又的確，我認同某知名教練話齋，運動能冶百病，除咗運動會令體內散發安多芬之外，當你認真去練跑，漸漸希望進步，注意飲食，鍛鍊肌耐力，同跑友較量交流，自己獨跑嘅時候，亦係同自己相處嘅好時機，心無旁騖，步履不停之中，頭腦特別清醒去回想遠近往事，修正未來，你試下問一問大部份跑馬拉松或長跑嘅人，一定會試過一路跑一路喺腦內自己同自己傾計，唔係一條友點過幾個鐘? 又無得碌手機又無得睇 Netflix 。
特別係人到中年之後，身體各項機能自不然逐步下降，古語有云年紀大機器壞也。幾年前某洋鬼子跑步雜誌有資料顯示，跑步一個月體重明顯下降，3個月心肺功能開始增強，1年後擺脱三高，3,5年後身體機能同個樣，都會明顯優勝於同齡人!
咁神奇? 我會話，積極配合飲食的話，雖不中亦不遠矣。
而且我發覺認真跑步嘅人，心腸都正路啲善良啲。咁跑步嘅有無西人有無百佳？當然有一定有，不過比例上比較少。你有無聽過元朗何律師，柒婆同十一哥鐘意跑步鐘意運動?
下次當你覺得好大壓力，鬱結難舒，滿腹惆悵嘅時候，試試暫時放低手上工作、眼前煩惱，著起對跑鞋出門去跑一跑，酣暢淋漓地跑佢幾公里，嗰啲想不開、看不透，放不下嘅事，都可能得到釋然，未必全部，但多多少少都總會有!
風水佬呃你十年八年，賓叔叔今次無點你。
唔跑得步 講下跑緊步嗰陣時會諗乜
- 熱唔熱身好呢? 熱少少定直接開跑好呢?
- 頭先出門口我有無鎖門呢?
- 前面條女後面睇幾正幾好身型喎，前面唔知點呢。
- 一陣跑完食沙嗲牛丁凍鴛鴦定白粥炸兩好呢?
- 點解今日好似唔係好夠氣咁嘅，唔通尋晚同阿茂利飲多咗啲?
- 呢條肥佬重耷耷都跑得幾快喎。
- 我隻 Garmin 係咪壞咗，跑咁耐先得 4K 幾嘅。
- 妖，前面班友又跑得慢又一字排開，阻Q住晒。
- 頭先同我打招呼嗰個邊個嚟㗎呢?
- 咦，嗰個咪阿強，同佢一齊跑 share 一支水嗰個唔係佢老婆喎。
- 頂，又係 3 字頭電話，十公里响咗四次。
- 咁 Q 熱，下次都係咪鬼晏晝出嚟跑。
- 膝頭哥又有啲痛添，使唔使去睇下呢?
- 邊個仆街俾隻狗周圍痾屎又唔清理呀，頂!
- 嘩，呢條女肥到咁仲著 Bar Tap 跑，攞命咩!
- 哈，次次跑都見到呢個阿叔，唔通佢跟蹤我?
- 下腹又痛痛地添，會唔會盲腸炎呢?
- 啱啱跑過嗰個女仔幾靚喎，係咪 XXXX 呢?
- 有啲急尿添。
- 本來諗住 15 K ，不如12K 算嘞，好鬼倦。
- 報唔報渣馬好呢?
- 呢條友著 NYC 馬拉松條 Finish Tee 寸寸貢咁，早知我著 Boston 嗰件啦，低調但威吖嘛。
- 聽日跑唔跑好呢，唔跑又俾 W 師傅寸喎。
- 如果我而家心臟病發，有冇人救我呢？
- 呢對鞋真係幾好跑。
- 嘩，呢個咁快嘅，係咪 Darren?
- 咦，有人影相，吸啖氣收一收腹先。
- 點解我心跳咁快嘅，唔通肥咗，無吖!
- 頂，呢段路咁鬼斜嘅!
- 終於跑完，冲埋凉定返屋企先冲好呢?
(待續)
