疫情反覆，望穿秋水的實體賽仍然遙不可及。不過香港人一貫轉數快，應變自救，五花八門的虛擬跑爭相出台，各自各精彩。不過當萬物皆虛擬，不代表我們要降低要求。大嬸一向精打細算，報賽事要物有所值，尤其虛擬跑，基本上無水站、零補給、無路標、比賽氣氛欠奉，跟自己操山無分別，但大部份都有收取報名費。
最近大嬸尋得全城最短路線虛擬跑 – TGR (The Green Race) 的 Hard As Nayls ，報名費仲超抵，以1K 1蚊計算，最短距離是4K組別，報名費4蚊，有bib、有排行榜、頭三名有獎，還可順道遊古蹟，堅係疫情價! (香港人除左鍾意返工、睇紅葉，呢期對古物古蹟有一份特別情懷。)
Hard As Nayls (12/12/20 至 21/2/21) 不是熱烘烘的大賽事，對好多人來說有點陌生，每年都會為非牟利機構籌款，今年有三間受惠機構: Naylor Education, Sai Kung Stray Friends Foundation 和Exchange & Empower (支援尼泊爾女性越野跑手)。賽道主要在清水灣釣魚翁、西貢、將軍澳一帶。分100K、50K、22K (部份要游水，不過泳灘好似仍關閉)、20K、8K (小朋友可玩) 和4K (家庭為單位)，可說是大包圍，由嚴肅長途山友到 hea 玩合家歡都可以參與，而且不限次數上載成績，跑到你滿意為止。
----- 廣告 Ad -----
咁抵玩嘅賽事梗係叫埋跑班首席長老 May 姐一齊玩，我地慳慳地用$20報20K組。TGR 活動素來多外國人玩，可以自 high 參與一場國際賽事。20K屬短途賽，爬升約1000m。為了增加動力，我向 May 姐提出一個輕輕鬆鬆但堅唔離地 (measurable and achievable) 嘅目標:
「May 姐，不如我地今日當 recovery run，做個 Sub-4 連影相。」
「又話郊遊 mode! 咪玩，你唔記得我已是60+的婆婆嗎?」
「但你係兩星期內走兩場100K嘅外星婆婆，go、go、go!」
「喂呀，咪開咁快啦，我都未撳錶!」
可以自定 Bib no
起點是清水灣二灘巴士總站，走 2K 斜路，到清水灣鄉村俱樂部閘口，轉右踏上釣魚翁郊遊徑，約3.5K到「蝦山篤」，有長木椅面向整個清水灣，火石州一帶群島盡收眼底，是文青看海的打咭位。大嬸當然不會錯過做偽文青，但 May 姐卻趕緊腳步沒有留影，似乎 Sub-4 目標發生了效力。
大嬸在「蝦山篤」思考人生
----- 廣告 Ad -----
跑到釣魚翁山腰之際 (賽道不攻頂)，迎頭遇到幾個十來歲的青少年，似在搵路。其中一位男生，帶著一臉稚氣加半臉認真問大嬸：
「請問呢條喺唔喺通向成功之路?」
（咁哲學嘅! 玩嘢呀?）
「我答唔到你。去唔去到成功要視乎你有無付出努力！」哲學問題哲學回答。
「…….」小朋友遇上喜歡搞事的大嬸，一時間不知點回。
「其實你地想去邊?」
「釣魚翁山頂。」
「過左啦，你地走緊相反方向出馬路，你地仲想唔想回頭去攻頂?」
「我地要成功！」少年們沒有半點懸念。見他們語氣堅定，大嬸指示他們走一條上山的小徑。
就是年輕，星星也可以摘下來!
約8K去到五塊田(好一個鄉村味的名字)，落回清水灣道，向清水灣方向走3K行人道，到大坳門迴旋處轉左入龍蝦灣路，再走2K到清水灣騎術學校。臨近學校時會經龍蝦灣石刻(於1983年列為法定古蹟)，全港現有126項法定古蹟，如果唔趕時間，值得行落去打咭。
龍蝦灣石刻在此沿石級落海邊，有指示牌
古物古蹟辦事處圖
古物古蹟辦事處圖
騎術學校右旁是龍蝦灣郊遊徑入口，是今日最後一個要打的大佬，到頂是291m的大嶺峒，雖然不算攞命，但艷陽高照，又到尾段，點都要俾啲掙扎，特別是有 Sub-4 的目標，總想達到。幸好龍蝦灣郊遊徑沿途有靚景，遠眺南北果州，碧海藍天，涼風拂面，令人振奮，給力過食 gel。
龍蝦灣郊遊徑景色冇得輸
May姐，俾啲掙扎
----- 廣告 Ad -----
上完龍蝦灣郊遊徑，已有點累，落到到清水灣郊野公園，兜個細圈離開大坳門，最後3K跑馬路回清水灣一灘，再去二灘衝線。希望做到 Sub-4，大家加快腳步。最後一段由二灘石級返回巴士站路面時，發現被政府用鐵欄封住，要爬過這個小小彩蛋，向終點直奔，結果3小時42分完成。
Sub-4 啫 (留意番，我地只係跑20K，唔係全馬)，不過大家都 high 過攞獎! 開心其實好簡單，年齡不是局限，未試過不是藉口 (又諗起某個教練)，只要你肯踏出第一步!
