古語有云: 「我辦事，你放心。我瀨嘢，你開心。」希望我的分享能令你爆一句抵L死之餘，同時長些知識。
1. 勿穿大會新tee比賽
支持活動有很多方法，但不用自殘。新衫因質地較『硬正』，容易與皮膚磨擦導致損傷，不要睇小一個細細的label，經十萬次輕觸你的皮膚之後，可以成為極大殺傷力武器。回家沖涼時，你會痛不欲生。因此，跑手應穿著過往曾練跑或比賽的衣服及鞋襪出戰。出門前在敏感位置塗上凡士林，可減低因磨擦帶來的受損，如下圖，係邊L度都有機會擦傷。
更重要是如果你想給『射中』的話，最好穿得與眾不同，這樣才會吸到攝影師的睛。我只是第一次跑渣打十公里賽時穿過大會tee，上線時發現大部分跑手都跟我一樣，睇落似足大閱兵，千人一面。
2. 咩錶都好，最重要係charge足電
沒什麼『柒』得過晚上忘了charge電，上線時方發現只有少量電力。因為如果隻錶無紀錄，表示你無跑過。
----- 廣告 Ad -----
3. 忌未衝線，先興奮
大型賽事起步時，情況似足蝙蝠車從蝙蝠洞彈出時，成千上萬隻蝙蝠洶湧而出。經驗淺的跑手容易給帶快，打亂了配速，提早『爆偈』，最終要含恨上『回收車』。
4. 去porta portty時，把所有會跌出來的東西交給朋友看管
起碼你的太陽眼鏡一定要有眼鏡繩。狹小的空間，身手更好，你都有機會不小心掉東西。我就試過跌咗副新買的Oakley，當時我慘叫了一聲『X』，應該方圓十公里都聽到。(電影效果就係聽見慘叫，然後拉wide shot個隻)
5. 忌load嘢變癩嘢
跑全馬一定聽過『撈碳』，學名是Carbohydrate loading （醣原負荷法/或譯肝醣超補法）。冚世界都知不是比賽前一晚先load，偏偏當我跑海外馬時，總係一錯再錯參加pasta party，由於意大利粉用了大量芝士和cream sauce 煮，食完當晚我都要攬著個馬桶瞓。另一次，我跑新馬，一班師兄話乳豬夾方包，我抵不著誘惑，吃了十年份量的總和，最後肚痾，PW完走。
6. 宜整裝待發
『院友』比賽前一晚都會post成副『架生』的照片，除了『曬』之外，還有實際作用，就是確保不會遺漏了什麼裝備。我試過太急趕執拾，忘了帶power gel跑渣馬，我又係慢腳，去到補給站時，連蕉皮﹑朱古力包裝紙都無，飲水啦，你呢啲慢腳阻收工嘅仆街。
----- 廣告 Ad -----
第二朝，要儘早起身，梳洗完，要梁朝偉上身，學足佢係「阿飛正傳」裝身經典的一幕。不徐不疾地把裝備穿好，執正個look，正所謂『輸人不輸陣』。
7. 跑海外馬時，宜出發前準備好所有裝備
2010 東馬，比賽前一晚已開始下雨，天氣預告明天雨勢更大。講你都不會相信，我行遍整個新宿都找不到便利雨衣或跑步專用的輕便雨衣。淋著雨，在三、四度氣溫下跑了四個多小時，我真係跑到見到一道亮光和耶穌在另一邊等我。
8. 起步前保暖功夫做到足
香港人特別怕凍，廿度已經要著羽絨、戴冷帽、圍頸巾，所以跑海外馬時，起步前要確保身體不會流失大量熱能，避免消耗更多熱量來維持體溫。方法可參考: Runner’s World 的 The Best Throwaway gear to keep warm before a race
9. 忌貪新鮮，試新嘢
較具規模的馬拉松賽事一般都有Expo。在Expo，除了售賣限量版大會tee 及鞋的攤位永遠迫著人之外，擁擠在賣能量補充品攤位的人也不少。我呢啲『年度』跑手，沒有累積，旨意奇蹟，以為新產品能支持我完走，胆粗粗試新嘢。比賽過程中，血液湧向五肢，胃部的消化能力是比較弱的，加上未試過，胃部一時間適應不來，超出負荷地給狂啪難以消化的食物，結果就是提早上岸劏個死去活來。
10. 我好緊張，以至於根本睡不著
第一次參加馬拉松賽是新馬，要凌晨三點去到起點。本打算八點上床，但我總是睡不著，整個晚上在床上輾轉反側，第二天我如喪屍般上線，堅係輸在起跑線。之後，我請教李師傅，他說作息規律要成個月前開始建立，還有『覺』是一個星期前瞓定，儲夠睡眠，養足精神。即使之前一晚睡得很少，問題也不大。
安眠藥，我都瀨哂嘢，之前無啪過，藥力在起跑時才發揮，正宗sleep running。
無論怎樣，最難的一步是「開始」，你已做到了。現在你已站在起跑線上，接下來，深呼吸，然後跟自己說 ”我準備好了”，開波吧！
----- 廣告 Ad -----
更多：
Fitz.hk Facebook專頁
地獄在人間
世上或屎上最煩膠跑友 – 香港人
我為什麼不跑步，不keep fit?
Yiu Kwong Chan＠Fitz.hk
Fitz Running 跑步
本文屬作者意見，不代表Fitz立場。
