Fitz > 運動 Sports > 跑步 Running > [陰晴風雨開心同行系列] 緣份到了 自然有文出

古語有云:水,係要24小時內抽的。當大家玩到厭先嚟講佛系跑步? 咁呢幾日又真係有幾件事,令我不可不信緣。

緣份一

我們的毅行隊 Prison Break100 在去年毅行時因大夫受傷未能攞 full cert. 有日大夫話希望一隊人齊齊整整完一次賽,陰差陽錯下報了五一的元朗越野賽。由於隊長的無知和誤判,以為是5小時的郊遊變成要3.5小時時限內完賽堅砌,我們三人都信心不大 (除咗扮恐懼的隊長)。沒有最奇,只有更奇,大夫比賽前一日在家附近被野狗咬傷,不能出賽。臨時找來友好軍醫助拳,結果又順利3小時26分無傷完成,仲要唔駛包尾。咁 Prison Break100 幾時先可以齊章逃一次獄? 緣分到了,自然做到。

感激白頭軍醫助拳。緣份到了,自然做到隊友。

緣份二

女跑友抽中柏林馬,但工作關係九月不易攞假離開工作崗位,上FB叫朋友投票去唔去。呢啲情況,當事人心裡早應有答案,搵FB大神只為找人認同自己的決定。同樣在五一那天在馬拉松看世界推介下看了一篇文章,主旨本來是叫跑友不要在意時間,完成一場馬拉松本身已是了不起的成就。用同樣道理延伸,跑六大馬好勁好難得,咁我搵日落街跑咗42.195公里就係垃圾? 我的工作一樣難放假,都會葡萄人地講外地比賽氣氛幾咁好。但係我只係普通打工仔,要賺錢養家以外我仲覺得自己份工有責任,唔可以隨便行開,仲要平衡同家人相處時間呢? 海外賽事? 緣分到了,自然跑到。

Photo Credit:Eddie Kwan

刻意地扮專心比賽中。緣份到了,自然中槍。

緣份三

跑Tee共享發起人阿裕靚仔又跑得快就好多人都知。早兩日捐新跑衫給他時,忍不住問了他,連六大馬都 Sub-3 完,拿了”冬甩”,同 Thanos 集齊6粒寶石一樣咁勁,咁仲可以有乜推動力跑步? 佢話仲想進步,再快啲囉! 吓? 即係 Thanos 完成目標後笑一笑,咪繼續努力他宇宙平衡的理想。我只係患病慢腳大叔,但仍然俾阿裕激勵到! 好攰唔想跑?緣分到了,自然有原因繼續跑!

阿裕有型靚仔其實唔駛遮,呢張唔出樣只係因為影得佢唔夠英偉。緣份到了,自然集到郵。

緣分四

患病慢腳大叔都可以有夢想嘅! 我已報了九月一個越野追逐賽。“問我初衷鏗鏘的答,不吞吐”: 搶人仔,顏色冇所謂。問題是現在整套抗抑鬱藥,其中一粒是穩定心率,但當我進行高強度運動時則會將心率限制,情況同揸小巴截油限速一樣,延伸到平日新陳代謝都慢咗,加埋之前停操,個人開心放肆又食多咗,我由毅行時不足60kg變成而家67kg接近超重。咁點好呀? 錢都俾咗咯,仲有幾個月,盡做囉! 緣份到了,自然攞獎!

五一比賽時的心率圖,都唔好意思同人講比緊賽,以為我揸緊流攤。我出晒力了,緣份到了,自然完賽。

最後利申,我是一位現在沒有返教會的受洗基督徒,好似唔應該講咁多佛系緣份。雖然我唔使好似某啲達官貴人為自己申辯時就話係基督徒以證品格高尚,但我經常懷疑自己死後天國仲收唔收我。緣份到了,自然知道,唔駛提早去搵答案囉!

Fitz 文章連結: https://fitz.hk/?p=93513


更多:
Fitz Facebook專頁
陰晴風雨開心同行系列 Episode Final 人在 便有路
陰晴風雨開心同行系列 EP.2 如果禍與福都躲不過
陰晴風雨同路行系列 EP.1 第一次,第一年
陰晴風雨同路行系列
凌凌發@Fitz
Fitz Running 跑步


文章為作者意見,不代表Fitz立場。