自從接觸長跑之後，每週一課長課好似已經成為特定節目。
由於居住喺荒島，加上本身係一個超級路痴，人稱「青公」嘅青山公路好自然成為我長課嘅首選。通常我都會由荃灣西出發來回屯門公路轉車站，有時要跑遠啲就會去到黃金海岸附近折返。不過今次有啲唔同，反正乜嘢比賽都無晒唔怕影響訓練，我就決定走一次呢條全港最長嘅行車道路 — 青山公路!
話到明係路痴，出發之前點都要做下資料搜集嘅。原來青山公路於1911年動工，於1920年全線建成，全長約52km，分為22段，至今仍然係全港最長嘅行車道路!
----- 廣告 Ad -----
今次青公全走我由深水埗近桂林街路口作起點，亦即係嘉頓麵包嘅斜對面，值得留意嘅係青山公路於九龍區呢一段中文稱為「青山道」，而英文就一樣叫做「Castle Peak Road」，同新界嘅路段有所不同。青山道由深水埗經長沙灣再到荔枝角，一直去到蝴蝶谷道路口，大概 2km 左右。沿途經過唔少街口，途人亦都比較多，所以跑起上嚟都要比較小心，始終「人無事先做到世界冠軍」嘛!
食完早餐，準備出發!
由青山道轉入青山公路葵涌段，由於路痴怕麻煩，選擇跟住 Google map 指示經蝴蝶谷道上，無錯係「上」，雖然呢段蝴蝶谷道只係短短500m左右，但可能係全程青公最斜嘅一段，有種死去活來嘅感覺! 幾經辛苦終於轉入葵涌段，係，由轉入新界開始青公會叫返做青山公路，而且會附加地區後綴以作識別。葵涌段一開始依然係上斜，大概有1.6km左右，不過之後就係一大段落斜路，有上有落絕對係練跑嘅好地方，難怪沿路都見到有跑友練斜路啦!
乜料一開波就要上斜呀……
沿路一直到大窩口地鐵站附近轉入荃灣段，大概跑咗8km左右，又到補水時間；溫馨提示：由於路途遙遠，建議多帶一點水旁身，而我就選擇大概每 4km 停一停、飲啖水再上路。進入荃灣段，有一小段路會經過荃灣市中心，途人再次比較多，還好路痴平日都會喺呢一帶出沒，無驚無險底下終於由海安路進入熟悉嘅「青公路段」，亦即係汀九段。
似曾相識嘅感覺!
汀九段呢段路，有跑開青公嘅跑友相信絕不陌生。途經汀蘭居、近水灣、麗都灣等。麗都灣係我幾鍾意嘅一個地方，尤其係夏天跑長課跑到就嚟中暑嘅時候，落去沙灘沖一沖身再食塊冰菠蘿絕對係一種享受!
----- 廣告 Ad -----
過咗機場核心之後就係深井段，落一條大斜路之後就會見到嘉頓，但喺之前個迴旋處會見到有隻鵝喺中間，唔知其他跑友有無留意到呢?
跑到呢到其實有少少想食嘢，係唔係我嘅幻覺呢?
深井浪翠園之後會進入青龍頭段同大欖段，沿海邊一條大直路正好用嚟放空一下。一直去到屯門公路轉車站大概已經跑咗一個半馬嘅距離喇，亦都係因為咁，我就將我第二包 gel 留返到轉車站先食 (今次帶咗4包gel，打算每10km食一包作補給)，順便去一去廁所當作小休一下。
前面有公廁同汽水機，可以稍作休息同補給一下。
之後再沿住大欖段走約3km，進入掃管笏段，此時亦會經過黃金海岸，係平時由荃灣西出發跑30km長課嘅折返點。
緊接住嘅就係青山灣段，途經咖啡灣、青山灣、三聖、置樂、華都等地方，一直去到杯渡路為止。
之後嘅新墟段、嶺南段、藍地段、洪水橋段、屏山段、甚至乎去到元朗段，其實都係跟住輕鐵路線走，路旁有單車徑，但當然都係跑返行人路比較安全，反正元朗段之前途人都唔算太多。
進入元朗段，相信係全條青公最多人嘅一段，因為途經人稱「大馬路」嘅元朗市中心，亦係元朗嘅核心地帶。值得一提嘅係如果要補給例如買水等，就要趁呢個機會喺大馬路附近店舖購買，因為之後嘅路段理論上係無得補給㗎喇!
題外話，跑到大概37km左右，經過元朗警署，繼續向大馬路進發，途中入過7-11買咗枝寶礦力，亦因為之前36km無晒水飲，所以我都喺7-11停低飲咗啖寶礦力先再繼續上路，最後大概用咗10min左右經過元朗站，我覺得無可疑!
過咗元朗段之後，就進入潭尾段同米埔段。喺潭尾段路上你會發現原來自己已經跑咗一隻全馬，不過我當時就更加享受大自然嘅氣息，同盡量吸收多一點清新空氣。
----- 廣告 Ad -----
開始有少少大自然嘅感覺，爽呀!
終於進入最後路段，進入沙塵滾滾嘅新田段、洲頭段同埋古洞段，全程大概7km左右。由於呢幾段路都比較多大車經過，空氣都相對比較污濁；而且路旁嘅行人路亦比較窄同凹凸不平，跑起上嚟要比較小心。
幾經辛苦，終於走到古洞段嘅盡頭，連接粉錦公路嘅路口，亦係全條青山公路嘅終點，唔知我幾時會試一次「逆走」呢? 哈哈……
成就解鎖! XD
