江湖有個傳聞，能夠贏晒香港六大山賽 (苗圃、雷利、毅行者、樂善盃、東北縱走、昂步棧道) 會被公認山界最強。對於啱啱新手村出黎闖江湖嘅我黎講，呢個稱號實在太吸引。
2012年1月1日，東北縱走，我第4，梁超賢第1
2012年1月11日，我第2，梁超賢第1
----- 廣告 Ad -----
超賢囊括晒「樂善」「東北」「昂步」三個大賽冠軍， 佢上台拎獎嘅一刻，成為我最憧憬嘅畫面，超賢亦成為我嘅偶像。
2012年4月，Action Asia Sprint – 梅窩，我再次遇上超賢。比賽完搭車嘅時候，我同超賢一齊坐，仲向佢表達小粉絲嘅傾慕。佢好謙虛咁講:「其實我唔係最強，只係前排狀態好，仲有好多本地選手同外國選手更強。」
佢再向我分析現時山界形勢:「毅行教室主要練毅行者、天鷹集中玩樂善盃、健行之友習慣遊山玩水…… 呢啲都係山界最出名嘅門派。而我所屬嘅消防隊亦有好多隱藏高手。」
喺超賢口中，山界就好似一個武林: 各大門派，派出精英參與幾場大賽，爭奪盟主寶座。但每場大賽嘅距離同路況、組隊安排、選手嘅狀態，都會產生唔同嘅比賽結果，要場場都贏絕對唔易。越野跑唔似路跑咁一面倒，只要肯力，充滿住機會，我地講好咗樂善盃再決一勝負。
為咗追趕超賢嘅腳步，呀競為我安排一星期兩課嘅城門河特訓。有一次，我哋快過架單車，單車呀叔驚嘆:「嘩，你哋有4分Pacing」。我心入面暗喜，但呀競即刻同我講:「你記住，4分 pacing 只係好慢!」
同時間，假日加入健行之友操山，認識到安哥、花哥哩啲前輩，帶行特別路線，學識爆林。
2011年5月，點滴揹水行，係一個揹住5kg水嘅慈善步行。我一起步就跑，結果快第二名30分鐘。當時啲人笑我傻:「邊有人係慈善步行跑嫁？」
----- 廣告 Ad -----
練跑半年，我感受自己好大變化，由開頭唔鍾意跑，到跑到唔識停，仲好積極咁周圍向人請教，加入唔同嘅團體學野。全因為有咗目標，有一個想要超越嘅人。
2012年11月，預備緊樂善盃嘅時候，收到一個突如其來嘅邀請，今次仲係100公里4人隊際賽……
2017年聰Sir參加Hawaii – Xterra Trial Run world Champion 圖: Wong Ho Chung 黃浩聰 Facebook專頁
現時視角
我諗每個人初出道時候都有一個偶像，哩個人會吸引住你去模仿、去追趕、去超越，從而引領你進步。而我嘅偶像係超賢。你嘅偶像係邊個呀？唔好講我，講其他人，講埋年份，我想知呀
