黃浩聰在 UTMB 2021 以男子第10名衝線，再度為香港爭光，但過程原來一啲都唔簡單。以下係聰sir賽後喺 Facebook 嘅分享，特此刊登:
第三次跑UTMB，希望突破2019年嘅時間，但今年開凍，對於炎夏訓練嘅我來講有啲不利，大會亦係賽前兩日發出訊息要求係 base kit 上再附加 cold weather kit。我按住上次分段時間走，去到80km Courmayeur 快左10分鐘，諗住有機會做到。但經過100K嘅賽道最高點 Grand Col Ferret，當時大約係4-5am，極之寒冷同大風。受寒冷影響，精神狀態好差，雙眼睇野好模糊。之後仲仆親成手血，去到 CP 俾工作人員發現，捉左檢查傷口同包紥。
接下來後半程因為睇野唔清楚，好難捱，但我知道係香港好多跑山嘅朋友睇住我，支持我，我唔可以放棄，即使做唔到目標，起碼都要盡力去做。最後我搵到方法，一到崎嶇路嘅時候就捽一捽眼睛先，或者清水洗洗面，可以短暫睇清楚幾十秒。
去到125km Champex Lac，Viann 同我講只要追多兩個就可以男子 Top 10，我定呢個為目標，一定要追到前面兩個。
最後，我用左23小時17分40秒完成，171.5公里，10042米攀升，男子組第10名，有得上頒獎臺。
----- 廣告 Ad -----
我係香港炎熱嘅夏天練習，生活係低海拔，用土炮大帽山模擬外國高山……雖然好多條件限制，但係連續兩屆UTMB可以登上頒獎台嘅例證中，證明只要肯努力，一樣可以。
雖然今次比賽唔完美，但今次獲得嘅經驗，亦令我相信下次可以跑出更好成績，我會再挑戰
黃浩聰 Wong Ho Chung
香港頂尖越野跑手，正職消防員，贏取的錦標不計期數。2018年以戈壁沙漠冠軍、阿他加馬沙漠、納米比亞沙漠亞軍，以及南極冠軍，奪得世界四大極地超級馬拉松巡迴賽總冠軍。