為咗一個 like，你會去到幾盡?
有人去自殺崖玩倒樹蔥 (當然set好機自拍或他拍)，有人開 live 喪食，最終暴弊。大家都覺得佢地魯莽、愚蠢，為刷存在感唔洗去到咁盡。不過條命係佢地，想點玩自己負責。
但如果利用女性的身體去換 like，就過晒條雙白線。
----- 廣告 Ad -----
近日 FB 見到某跑界攝影師出個 post，影一位女跑手的背面和遠攝她很細小不清的正面 (當然對男性來說具吸引力和聯想)，叫網友俾 like，如果夠200 like 睇清晰正面，1000 like 送大頭!
彷彿去了街市，埋嚟睇埋嚟揀，10蚊斤菜心，買夠兩斤送蕃茄。但起碼菜心是屬於你的貨物，我地亦唔需要顧及菜心的感受。一位女性在街上跑，可能預左中鎗，或俾人多望兩眼。不過佢唔會想被人利用她的 body，明碼實價作販賣 like 的用途，你賺like，唔可以謀殺別人的尊嚴，不是道德L，是基本野。
攝影師可能認識被攝者，他說出 post 後獲得她的同意刊登照片。不肯定當事人是否覺得事到如今，唯有同意。就算同意刊登，亦唔等於贊成你利用她的身體和肖像來呃 like 做買賣。
最近見某著名女跑手出個衝完圈的 post，原本好日常的一件事，但有網友留言話佢:「頸以下缺點全部暴露晒出離，老細，你真失敗。」活生生是一宗欺凌! 在跑界，女性永遠是小眾。身邊很多女跑友反映，她們在山上在路上在網上，身材樣貌往往成為周遭的取笑焦點，但都敢怒不敢言，想出聲，又怕被網絡欺凌。
----- 廣告 Ad -----
刻意用女性的樣貌身材做槓桿謀取利益，明顯是一種冒犯。而且更引來網友高談闊論女性的身軀，造成二次傷害。可能你會說玩下啫，洗唔洗咁認真? 不過就係咁玩下玩下，女性就被變成「你條菜」，用嫩口、爽口來形容 (還有更多不堪入耳的)，再不是地球上另一半的人類!
尊重，要求真的很高嗎？
如果你認同要尊重女性，請俾個 like 呢篇文章，為女性發聲，希望有1000個 like，let’s make it loud and clear!
