香港人先至明: 當一個人對一件事投入近乎瘋癲嘅感情，並做出異於常人嘅行為，我哋會叫佢「院友」。而越野跑手阿恆 Hang，話自己對屯門青山嘅瘋狂程度，已經超越「院友」級別:
「如果你用院友形容我，就係對我大大不敬。唔該叫我做『院長』!」
Hang 好鍾意青山，一日兩、三登係等閒事，叫佢做「青山院長」唔會有人反對，而佢亦為自己起咗個網名叫「青山之王」:「有次比賽碼號布可以寫中文名，我就開玩笑改咗呢個名，純粹貪玩，因為真係成日上嚟。」
無論「青山之王」定「青山院長」，Hang 對青山呢份感情都係顯而易見。
青山原是我身邊伴
故事由2017年講起。當年 Hang 一班中學同學，忽然話要參加毅行，四位隊員約埋操山，第一課逆走麥三由水浪窩上雞公山，不過行咗唔夠10分鐘，超過一半隊員已經面青口唇白……於是一行人掉頭返歸。
經過幾輪轉換，Hang 最後都同朋友成軍，以較認真態度操練並完成100公里。自此之後，佢對越野跑山培養濃厚興趣，正式「入坑」。
「毅行之後都有參加啲山賽玩下。不過最初自己無太認真去操練，所以成績麻麻。比賽到尾段成日得番自己一個，覺得咁樣好悶，我希望自己可以跑快啲，至少達到中游成績，多啲人一齊跑下啦，於是決心上山練習下。」
「自小喺屯門長大，屯門得兩座山: 一係青山、一係九逕山。青山風景靚啲，所以成日就喺青山出沒。」
「我去青山有幾密? 如果有比賽又想練爬升，一個禮拜會有四、五日會跑上青山，每日上一兩次左右。最瘋狂一次，係舊年試過連續三日，第一日上8次，第二日上5次，第三日上6次。我又試過一日十登，不過覺得太悶，無下次。」
「我仲自創咗一條『杯靈Z道』，由圓頭山上，去到青山山頂，中間用「之字路」方式上上落落。原本杯靈雙渡1200米升降，我咁行樣行足足有2500米升降。」
青山依舊綠水長流?
青山幅員廣闊，路線眾多，除咗青山山峰，亦包括圓頭山、乾山、青山腹地、良田坳、青蝶脊等地。路線起點可以係最熱門嘅青山寺、良景邨、田景邨，以至元朗邊界廈村、屯子圍，東邊可以去到龍鼓灘。Hang 話自己無話邊一條路線最鍾意，行邊度視乎心情同練習內容，不過佢差唔多每次都以山頂為終點。
「青山嘅地貌好獨特，風景好靚。喺青山山頂可以望到整個屯門。日落時份向龍鼓灘方向，仲可以欣賞到日落。」
Hang 通常放工後，拎埋罐啤酒跑上山，然後一個人靜靜地睇日落。Hang 呢份「男人的浪澷」，就係佢紓緩生活壓力嘅方法。
「平時黃昏山上面唔多人，山上面真係好寧靜，絕對可以放鬆心情。」Hang 鍾情青山，相信對佢嘅感情唔會變。不過，青山係咪可以依舊?
「青山本身好貧脊，好易受風化破壞。疫情前後多咗好多人行山，又多咗人喺山上整啲枱枱櫈櫈，甚至開墾田地。另外又有人玩越野電單車，令到青山山徑受到破壞。」
「其實你同我都消耗緊大自然，好應該一齊保護環境，最簡單就係帶走自己垃圾。支水咁重你都可以拎上山，飲完得番個空樽咁輕，點解唔拎返佢落山呢?」講到呢到，「青山之王」有少少無奈。
「最後想多謝青山，令我係山上認識到好多朋友，有前輩、有新手、甚至很多一直景仰的大神，每個都係小弟的學習對象及鼓勵。最後嘅最後，小弟都同大部份香港人一樣，忙於為生活打拚，但不要忘記曾經的理想，更别忘了一番努力後的一罐啤酒。」
除咗搵 hashtag #青山之王，Hang 亦有 IG @1854_kfcp 同 Facebook page 從藍地出發，大家可以 follow 下。
在 Instagram 查看這則貼文
對裝備要求高
青山地型獨特，樹少沙泥多，特別多浮石碎石路面，所以對越野跑鞋嘅要求亦較高。
「鞋底要咬地以應付浮沙，亦要防滑，因為有露水嘅話啲石頭會好跣。亦因為青山石頭多，鞋頭及中底要有足夠保護。不過同時因為要長距離跑山，所以鞋底唔可以太硬，同埋要具有穩定性。」
最近 Hang 試著過 CRAFT ENDURANCE TRAIL 覺得完全符合上面幾點，佢相當滿意:
「呢對鞋十分全面，喺技術路面又得，普通山徑又得。我試過著過一次比賽，13公里大欖環塘。呢對鞋喺環塘泥路相當咬地，到石屎路面又唔會唔舒服，柔軟度適中。」
「上青山著呢對鞋，最大感受就係鞋身唔會太闊，好貼腳，喺青山咁崎嶇嘅山徑都可以跑得好穩定。」
「香港大多數越野賽其實都係跑官方行山徑，呢對鞋足夠應付有餘。」
CRAFT ENDURANCE TRAIL
CRAFT ENDURANCE TRAIL 採用全 Px Foam™ 中底，結合最佳堆疊高度，提供十足爆發力。Px Foam™ 是一種超輕質中底材料，可提供極高的能量回饋，同時具有抗震性和靈活性。 Px Foam 密度較低，比傳統 EVA 更輕 20%。配合超強抓地外底，可在中等路徑環境中提供出色的抓地力。
重量: 290g (UK 8)
高度: 前掌27mm，鞋跟36mm
價錢: $1,580
CRAFT Endurance Trail 系列銷售點
(以下店舖售賣款式不一，歡迎致電查詢）
WAH-LAAH!
九龍尖沙咀海港城海運中心2樓221號 – 2818 9337
WAH-LAAH! 網店
https://www.wah-laah.com/collections/craft
Action Panda 運動用品專門店
觀塘道460號觀塘工業中心2期4樓P室 – 5011 8027
GigaSports
尖沙咀海港城海運大廈2階OT227-229及242號鋪 – 2115 9930
GigaSports
香港金鐘太古廣場二期1 樓146號舖 – 2337 0005
Pro Runner葵芳店
葵芳新都會廣場1樓166舖 – 2895 1231
Pro Runner 沙田店
新城市廣場5樓515舖 – 2890 2208
