[HNR沖繩環島跑] Day 1 那霸市 > 南城市

(左起) 盛、宗、Yvonne、Arthur、達仔

34度，熱到痴肺，今日跑完已經曬到變兩截色，曬紅到變馬嬲 pat pat一樣。同環台果次一樣，第一日既辛苦感覺始終都冇離開過我😂天氣、負重(7kg)、攀升426m、第一日就48km….今日全部事都係用生命值硬接。

跑到損手難腳(磨損)，加埋腳同膊啲酸聽日出晒黎都唔知點跑落去。今次已經叫有經驗，執到個袋有咁輕得咁輕，但跑到一半已經 feel 到個膊之後應該會幾難頂，不過多人一齊跑又係開心既。

今次係 planning 上已經有更好嘅準備，可惜總有估唔到嘅事。一早出發前搵個地標打卡先，張相個天靚到dum一聲，其實心情幾靚，但心裡暗暗地說了聲仆…直，第一日就萬里無雲咁樣樣，就知會曬到乾塘～今次 planning 上每個 CP(便利店) set 係8-15km/一個，唔會因爲停太多次而拖長時間，又唔會田為太長距離而令疲勞增加。

係八重瀨食完晏開始爆曬， 每一公里都好似無限延長咁，而背後嗰幾公斤好似愈黎愈重咁，而且仲要開始上斜，飛龍尋日仲下巴輕輕話跑完做體能，事後睇番錶原來我哋硬食咗四百幾米爬升，辛苦跑嘅之餘踩單車嘅都唔好受! 最後一個 CP 係知念岬嗰 Tourist Centre，條路終於有返啲人性，歡喜之餘忽然收到先頭部隊急電：

『喂，假架嗰 guesthouse 地址』

咩叫驚嚇就係呢啲啦! 正諗住換衫沖涼食嘢直奔幸福生活嘅我地當堂打嗰突，幾經辛苦終於搵到間嘢，五房一廳全海景，計返每人二百幾港蚊真係扺到爛。

抖夠去覓食，横掃超市啲打折食盒，搞左個九味餸嘅大餐，場面之盛大，我以為自己已經完走左。

(待續……)

HNR 跑步團隊
90後環台跑一千公里的故事 同步上載遊記

Gear support: ASICS、Round The World 優遊天下

Fitz 連結: https://fitz.hk/?p=94369