介紹返，佢叫做吳保錡，今屆渣打香港馬拉松10公里項目跑出55分12秒。同大多數同齡男性相比，今年32歲嘅保錡跑出呢個時間，當然唔講得話好出眾，不過對我呢啲鍾意跑步嘅保錡支持者嚟講，就真係好感動好感動。
保錡嘅演藝經歷，可以話係一個「細細個發星夢唔識死孤注一擲死不悔改」嘅香港人故事。佢自小鍾意唱歌跳舞表演，15歲投身社會後，將所有嘅身家時間都花喺學唱歌學跳舞報比賽自費拍MV。別人眼中係「發明星夢嘅失敗者」，玩歌唱比賽玩到接近30歲都未成名，直至2018年電視節目《全民造星》出局後，簽約電視台成男子組合 ERROR 一員。
入咗 ERROR 嘅保錡，亦唔算好有觀眾緣，唱歌唔算好聽講嘢唔算好流利加上又唔算靚仔，仲要喺節目表露佢「淆底獸」一面 (兩次跳笨豬跳失敗收場)。最令人反感嘅，就係出道無耐已經「爆粗同網民對罵」，形象插水，被電視台雪藏。
直至佢喺電視節目以「ViuTV寫輪眼」嘅身份，去學習「片石仔」以挑戰自己。雖然「片石仔」好似係一個好簡單嘅細路玩意，但觀眾仍然感受到保錡用謙虛態度從基本學習，最後達到導演要求，成功「自肥」。
----- 廣告 Ad -----
自此之後，我哋睇到一個唔一樣嘅保錡。佢雖然口齒唔伶俐，但做清談節目日見進步。佢雖然唔係唱家班，不過佢都有solo歌可以做到叱吒冠軍歌 (編按: 資料有誤，保錡嘅《猥瑣》最高係亞軍)。到2月12日星期日一覺瞓醒，竟然見到保錡跑完10公里同發哥合照，不期然爆出一句:「呢鋪保錡終於生性嘞!」
最令人安慰嘅，就係保錡定下未來目標，跑完10公里後，話要挑戰半馬、全馬，希望佢可以同唱歌跳舞一樣，對跑步都係咁堅持，喺賽道上繼續有進步。
推薦大家睇「熊仔頭」訪問保錡嘅短片。訪問者同被訪者都好坦白，毫無掩飾。
利申: 筆者係中年大叔，呢幾年鍾意咗睇電視，最鍾意嘅節目係《ERROR 自肥企劃》。
----- 廣告 Ad -----
編按: 本文為讀者投稿，標題為編者所擬。
