[里約奧運] 女子馬拉松 姚潔貞名列39 東亞第5

香港跑友嘅「大師姐」姚潔貞，以第39名完成奧運女子馬拉松，以2小時36分11秒，雖然差22秒就打破香港紀錄，有啲可惜，不過喺烈陽之下仍有好表現，絕對令大家拜服！

睇番呢場比賽，亞洲嘅力量確實不容忽視。唔計巴林嗰兩位「外來」亞洲人，北韓呢個「神秘國度」真係令人眼前一亮。雙胞胎姊妹金慧成、金慧慶，兩位力敵一眾非洲、歐洲選手，第10、第11名過終點。

緊隨其後，就係兩位日本選手：第14名嘅福士加代子，同埋第19位嘅田中智美。田中智美喺今年嘅名古屋馬拉松，同小原怜鬥到最後1公里，最後僅敗得第二。呢次奧運馬拉松，田中係三位日本選之中排第二，但相信仍有進步空間。

至於姚潔貞，就喺以上呢四位之後，為東亞選手第五名，佢喺呢一年來嘅進步，有目共睹。呢次成績，比起佢舊年做出嘅2小時38分嘅個人最佳時間，快咗足足2分鐘！如果佢繼續進步的話，打破香港紀錄只係遲早嘅事，亦相信有能力同其他亞洲跑手競爭。

姚潔貞過30Km (田總短片)

至於其他亞洲代表，似乎有些少失水準。中國岳超第53名，華紹青第79名。台灣謝千鶴第113名，陳宇璿第127名。新加坡梁潔詩第131名。

更多：
Fitz.hk Facebook專頁
[里約奧運] 水神菲比斯 一日食12,000卡路里!
[人人奧運] 丹尼爾 x 葉姵延 由黑妹變辣妹
[人人奧運] 丹尼爾 x 黃蘊瑤 與鐵血女車神一盅兩件
[一個傳奇的誕生] 丹尼爾 vs 陳恩能 愛做有意義的事