我為什麼不跑步，不keep fit?

好幾個星期前的五﹑六﹑日，一連三天「長跑長友」個谷給跑步前後激變相洗版，院友日以繼夜、夜以繼日post相。小個便出來，爬文都爬唔切。照片分享釋放了不少正能量之餘，大家都睇到啪啪聲(拍手激讚)同嘩嘩聲。其中不乏『曬你冷』的biggest loser分享，當事人還要輕描淡寫話呢啲算乜嘢啫。

我正在往聯合醫院途中，不停look手機讀留言。友人因為要『通波仔』入了廠。去到醫院門口時，他WhatsApp 我他已『被』出院，因為床位緊絀，唔係死得，就要讓返張床出來。原來現在『通波仔』好小事，通完一陣便可以回家休息。友人見我嚟到，叫我不如陪他去東莞揼邪骨。邪骨我就唔揼嘞，送你一程還可以。

我一路行，一路苦口婆心勸他注意飲食和多做運動。可能我傳教傳到他好L煩，他跟我講「再講呢啲就無FD做」。他還說早已unfriend，unfollow我，話睇我個啲跑步練習里數和pacing post，然後詐假意掀起衫拭汗曬腹肌selfie睇到好L大壓力，感到自我形象十分低落。他問我點解要跑步同keep fit，他要逐一KO我。

1. 運動可以減肥，超錯!
美國權威雜誌《大西洋》月刊的一篇文章《徒勞的鍛鍊》中指出，隨著運動越來越普及，但肥胖的發生率依然呈上升趨勢。文章認為，消耗的能量與你的活動量並沒有直接的關係，運動無助於減肥，還不如控制飲食。

資料來源: The science is in: Exercise isn’t the best way to lose weight

延伸閱讀: 為什麼跑步無助於你減重的五個原因

另外，像「肥苟」因為甲狀腺問題導致體重暴增，由110磅升至170磅，運動能發揮作用進乎零。

2. 控制飲食，可苦呢?
食好西乃人生一大樂事。對大部分人來說，食物只有好食和唔好食之分，管它健不健康。你是怎樣分辨食物是否健康呢? 方法其實好簡單，就係當食入口時，你想大叫「好好味呀!」你便要立刻吐出來，這正正就是邪惡毒物，不吃為妙。相反健康食物如麥皮、烚菜，即使是廚神煮，都唔慌好食得去邊。所以食家蔡瀾話未能食素，情願短幾十年命，都要享口福之樂 (好似有咁講過，除非唔係)。記者曾問蔡生：「做人的目的，只是吃吃喝喝？」他答： 「是。我大半生一直研究人生的意義，答案還是吃吃喝喝。」

3. 瘦即是美，點解肥美唔得?
欣宜大熱的「你瘦夠了嗎？」就是要批評現今社會風氣對女性那種苛刻的審美觀，要有『波』de (body)，不要全瘦或全肥，要尖尖的臉、修長的四肢和纖細的腰，但同時也要有巨乳和豐臀。她認為胖女孩也可以很美很有自信，如Adele，也可以有人愛，不需要為了討好別人而受苦，一生志業就是節食同做運動去塑造大眾認為的標準身材。

再者，fat也可以fit。二百五十磅的Mirna Valerio是超馬跑手，死未!?

圖片來源: http://rw.runnersworld.com/selects/ultra.html

4. 人著衫定衫著人
好多男生為了要能夠穿回Hugo Boss 46號slim fit而死keep爛keep.有必要嗎? Wyman一定無人魚線，你夠膽話Wyman著衫唔好睇嗎? 睇吓佢同佢啲fans會唔會鏟到你跳樓啦呀? Wyman 咁嘅身形也可以著得型。沒有合適的身材，只有稱身的衣服。

Wyman

此外，男仔要肥肥地，要長得富態。陳子聰就是嫌自己太靚仔，同厭倦成日要運動保持健美身形，所以谷肥自己，型男變肥佬，體重直迫二百二十磅。慘得過超儀不介意。此外城中富豪、金融才俊，都是『肥肥躉躉』，夠份量又不失霸氣，君不見名人拿柺杖入醫院，依然架勢。

陳子聰

5. Runner’s high，可必呢?
「好多種high法都係唔使辛苦的。」雞蟲話:「用尊貴的立法會游議員的講法，『扑嘢』- 一種有性無愛、如野獸一樣的性行為最High.你要跑幾耐先有runner’s high，雞蟲話佢打個冷震就hi咗。」如此類推，你問『脂優』兒童，他會答打機最high。你問毒L，他會話睇AV同單手打字最high。你問港女，她會話呢個時候最high梗係食大閘蟹啦。使L咁辛苦咩!

6. 為仔女樹立良好榜樣，慳啲啦!
跑咩鬼嘢步呀，有時間用來督促仔女做功課好過啦，日日百九幾樣習作，又興趣班、補習班、珠心算、名校面試班。攞行街紙時，監頭又詐型。跑緊嘅時候又感到內疚，跑嚟托咩。

我給他KO到無聲出，在友人臨上車時，我跟他說: 「我跑步不是因為他很容易，而是因為他很困難。」

聽過身邊港女分享各種離奇的減肥方法，排(定痾)油丸、洗腸、服用帶輕瀉作用的中藥、利尿劑、搣脂、抽脂、食肉減肥法、石器時代飲食法、去麩質飲食法、代餐排毒飲食、綠咖啡豆減重法、曲奇節食法、低碳水化合物飲食法、半素食法、食用蘋果醋等等。

連跟神棍性交轉運都信，就係不信最common sense的「食少啲，郁多啲」。

其實跑步是最平的身心健康良方，但不是人人付得起，你要有決心、紀律、毅力和恆心先得。

更多：
Fitz.hk Facebook專頁
追不到的跑步女孩 (四)
追不到的跑步女孩 (三)
追不到的跑步女孩 (二)
追不到的跑步女孩 (一)
Yiu Kwong Chan＠Fitz.hk
Fitz Running 跑步

本文屬作者意見，不代表Fitz立場。