「我－跑－完－馬－拉－松！」

相片來源: Ric Tse https://www.facebook.com/rictsephotography

雖然遲咗少少，但我終於可以大大聲咁講，我跑過馬拉松。唔係10K，唔係半馬，係真真正正42.193 公里嘅馬拉松！Yeah! 多謝各位！跑咗幾耐？？唏，細路哥都求學不是求分數啦，總之， 超標完成。

諗番嗰日跑到維園，見到最後一段直路，我望住終點計時個鐘跑，心裡只係諗「快得一秒得一秒」。過咗終點，個人呆咗。「吓，完咗喇？好似有啲野未做咁嘅？」不過唔理得咁多，大會唔俾人停咁耐，快快手攞咗塊牌先！

傳說中只有完成咗全馬先有嘅獎牌，雖然你有生得有啲似新年放全盒嗰啲朱古力金幣，手工又唔及Pandora啲charms咁精細，但係我好鐘意你呀！！！好型呀！！

返到屋企雖然超攰，但勁開心，不停同班跑會同學仔whatsapp share番啲bling bling合照。突然，有人傳來一張我跑緊時影嘅相。跟住，不祥嘅感覺湧住嚟，我終於記得我有啲咩未做：

我唔記得chok樣衝線！

是咁的，上年半馬同前年10k嘅經驗都話我知，想要一張見得下人嘅終點相，衝線時係要加多兩錢肉緊做擺手同跨大步跑。面部表情就緊係要幾專注有幾專注。（幸好通常都唔會係大頭相，塊面又跑到紅紅地，所以冇化妝都還可以接受到。）

前兩年無論係大會定係啲攝影師朋友幫手影嗰啲都麻麻地，本想今年影番張靚啲威下，點知今年嗰幾張，個樣仲衰過之前。早知係咁就攞張「我要真普選」遮住塊面先衝線啦。唉。