或許長跑是肥仔的救藥

超人•不會跑 2017-12-18

字 Decrease font size. 字 Reset font size. 字 Increase font size.

當你處於中學時代，係個肥仔，而每當到每年一度嘅陸運會你會諗……究竟有D咩項目係啱自己既呢? 然後望一望人哋短跑，回想一下自己玩「捉E因」被人秒殺，絕望! 再睇下人地玩田賽：跳高、跳遠，或者有個項目係跳落海鬥快浮返上黎的話就有機會贏。不如玩力的表現丫，但人地廣濶既胸襟，加強勁既臂彎。原來離起跑線已經相差好遠……

噢! 冇錯，我係個肥仔。侈望住有日可以係田徑運動拎個獎光下宗耀下祖!

----- 廣告 Ad -----

中五時候，花左五年時間，終於比我諗倒條絕世好橋 — “3000米公開賽”。講到公開賽，意思係中一至中七唔分組，萬人一齊跑3公里，而且唔計個人成績。咁即係咩? 高手唔會同你玩，低 Form 唔會夠你玩，要做既係，練到中七，就可以大哈細，冇智慧 (係奬項誘惑下，智慧絕對係可以放棄)。諗左五年，終於茅塞爆開，簡單! 剩返既就係落街練跑。

記得岩岩開始既時候，著住件校服背心底衫，體育課短褲，加對我引以為傲既羽毛球鞋 (唔係白飯魚)，原因係我特登買左條深藍色既鞋帶換左本身條白色，感覺已經型到世界盡頭。直至有一次跑上銀線灣，撞岩見倒架警車，警察哥哥同我對望左好幾秒，之後佢忍唔住衝過黎查我身份証，對唔住! 我真係冇。之後諗返，佢好明顯當左我係 ii 個仔 — ii仔! 原來型到盡頭真係7。

網絡截圖

開始好易，堅持好難。興幸既係，當你好用心做一件事既時候，身邊總會有好多唔同既人一齊陪你、支持你、放甩你，雖然跑步好痛苦，但好感動。而難過既係有一日大家都有自己既路要跑，又得返自己一個。但點都好，冇佢地，跑步應該一早已經放棄左。

不禁諗起一首歌 <萍聚>

只要我們曾經奔跑過對你我來講已經足夠
人的一生有許多回憶只願你的追憶有個我

中七運動會 — 輸了，哭了。

世事原來冇簡單過，終於可以完美放棄。唔駛再追單車、唔駛再比人過頭、唔駛再辛苦、唔駛再跑啦！但落敗既感覺仍然好難受，唯有落街跑下步散下心。唔知幾時開始，當心情唔好就會落街跑，矛盾到呢……之後既日子，當跑慣左3k，就去跑5k 6k 7k 8k……見唔倒盡頭。

----- 廣告 Ad -----

轉眼間，時間黎到 2016/2017。先後遇倒 Asics 同 HNR 有一班志同道合既朋友一齊 keep 住跑落去，春天一齊努力，夏天一齊講粗口，秋天一齊加操，冬天一齊比賽，一切都好美好。

然後命運係一班兄弟推動下報左猛龍慈善跑 (比賽日期2017年4月30日)，記得比賽係跑萬宜水庫，太陽好曬，熱到一個點，都算啦，都唔好一開波上斜丫，會死架，咁既然報左，唯有頂硬頭皮上。記憶中好多師兄師姐都好快，我係後面扯緊吼—媽的，邊個發明左跑步! 後段後面有個師兄見倒我面容拗曲，都忍唔住關心下同打打氣，然後放甩左我。好唔甘心，但仍然好窩心。終於沖左線，等齊兄弟，食個大會免費雪糕，收工。

突然有朋友聽倒類似叫我個名，咁一睇又無妨既，公開組冠軍! 唔好呃叔叔喎，真係，十年啦原來，d 袓宗終於比我光耀倒，而其實呢個目標早就忘記左，突然間，百般滋味在心頭。