[武漢肺炎] 疫情之下的香港賽事

香港渣打馬拉松已定於2021年1月24日舉行

美國運動界最近已出口術，話武肺之下長跑、單車、三鐵等比賽大減，企業面臨倒閉潮，數以十萬計員工有機會裁員。咁嘅情況之下，香港嘅比賽又會有咩改變呢?

事實上，大批本地賽事已定於9月之後陸續舉行，除咗三大傳統慈善山賽 (苗圃挑戰12小時、雷利衛徑長徑、樂施毅行者) 確定了比賽及報名日期，渣打香港馬拉松亦已公布比賽時間，估計各大小賽事亦會開始推廣宣傳，相信下半年每個周末，香港都有幾場賽事同日舉行。

不過，有行內人士就分析，在疫症未完全消退之前，比賽都唔太可能同以往一樣。

疫症之下，暫時未知樂施毅行者等活動嘅規模會否縮減

縮減規模

疫情關係，當局未必批准太多人參加嘅賽事，亦因為去年社會運動，令一連串賽事被逼取消，退款幾近成為指定動作 (零退款未必有法律問題，但會被人「唱衰」)。主辦機構為免重大損失，有可能會將賽事規模縮減，除限制參加人數，賽事亦可能以中短途為主。

縮減開支

美國 Ironman Group CEO Andrew Messick 透露，搞一場比賽95%收入靠報名費。唔少本地比賽無商業贊助，報名費幾近係唯一收入來源。不過縮減規模之下，報名費又唔可以增加，比賽風險又高咗 (有取消壓力)，唯有縮減開支。

所以，未來嘅比賽好自然會少咗啲豪華補給站、精美紀念品，甚至連比賽 tee 都可能要自己買。

鼓勵自給自足

疫情令大家重視衛生，一盤食物人拎你又拎，以後真係 No way! 所以，點樣設置補給站相信會係一項大挑戰。或者有賽事會標榜「自給自足」，參加者既可安心比賽，主辦大會又可以孭少個鑊。

疫症之下，水站設計都係一門學問

香港長跑比賽已暫停超過半年，下半年比賽雖然會大爆發，但提醒大家唔好一窩蜂去報名。小心揀選適合自己嘅賽事，研究主辦大會嘅往績，先為上策。