[渣打香港馬拉松2020] 中咗籤 畀唔畀錢好?

香港馬拉松嘅抽籤結果已經公佈，網上觀察所得，今屆中籤比率頗高。不過，唔少人中咗籤之後心情忐忑，唔知畀唔畀報名費好。

執筆之時，已經有超過10個賽事宣告取消或延期，大多數都係以「社會情況等不確定因素」為理由，當中以雷利衛徑長征、香港單車節，以及維港渡海泳最令人關注。(見《攬炒活動時間表》)

咁，全香港最大型嘅長跑比賽「香港馬拉松」，當然屬於高危活動，雖然距離比賽仲有四個月，但唔少人都覺得有取消嘅可能。

取消比賽未必可退款

今年「港馬」報名費分別係 $450 (全馬)、$400 (半馬)、$360 (10K)，不過如果活動取消，依照大會章程，所繳交嘅報名費係不獲退款。

「如比賽因任何非大會所能控制或不可抗力的情況下而被迫取消，所有報名費將不獲退還，大會亦不會負有任何其他責任。」

最新情況係，網上流傳有人向田徑查詢退款情況，回覆嘅電郵話會「考慮不同情況下嘅選項，包括活動取消退款嘅可能性。」 (按: 維港渡海宣告取消，但參加者可獲全數退款。)

總之，畀咗錢嘅話，點都要面對活動取消所帶來嘅損失。

重金屬同學會 主教練金永強 圖: Wing Ying Chan

金Sir: 我已經交咗錢

重金屬同學會 主教練金永強，對於「港馬」舉辦情況亦不表樂觀。他解釋，「港馬」係全港最大型賽跑活動，所面對嘅風險大得驚人:

1. 政府 (特別是警方) 與市民嘅關係太過惡劣，比賽當中若雙方發生磨擦，隨時造成難以收拾嘅情況。單係起步鳴鎗時市民對台上官員嘅敵意行為，已十分難控制
2. 就算沒有出現混亂，不少市民都會和平表達意見，例如衣著上和打扮上有政治宣傳口號，呢啲並唔係政府樂意見到
3. 「港馬」為IAAF金級賽事，佢哋要保住呢個級數，更加要避免混亂情況，所以有關方面應該會安全先行

不過，金Sir強調，佢已經報咗名，畀晒錢。因為佢為咗要支持本地長跑賽事，理性上雖然覺得有取消嘅可能，不過情感上都要投下支持一票。

大家記住，中籤跑手要喺10月17日 (星期四) 晚上11時59分前交費，先至確認名額。呢幾日大家好好考慮一下啦。

Fitz連結: https://fitz.hk/?p=126470