(編按: 跑開馬拉松玩開三項鐵人嘅賓叔叔 雷彬冶文，早前因為腳傷無得跑，養傷期間寫咗多篇文章反思跑步生涯及跑步意義，我們以「賓叔叔唔跑得齋講跑」為題，分篇發表。)
1. 唔跑得步 講下做乜跑步
等待傷患復原期間，奉 W 師傅口喻必須保持心率同肌肉訓練，踩車踩機游水輪住嚟就係唔跑，一直到比賽日直接落塲，Tapering 都慳番! 晨咁早出街踩單車，踩踩下落大雨，唯有坐低飲杯咖啡食個包再聽天由命，咁啱撞到老友茂利，正好飲住咖啡吹下水。
茂利 : 大哥誠其實你點解咁鐘意跑步呢? 幾十歲人唔倦㗎咩，學我打下 Golf 打下麻雀咪好囉，成日搞到身水身汗，唔通想老來先做職業運動員?
----- 廣告 Ad -----
叔叔 : 妖! 我唔會，亦無可能認屎認屁話希望成為一個職業運動員，亦都自問無呢份能耐無呢份實力，廣告人依然係我賴以維生搵兩餐晏仔嘅技倆 (雖然搵食越嚟越艱難!)，但自從投入馬拉松投入三鐵運動之後，雖然訓練辛苦疲憊但依然樂此不疲 ，至於攞奬?? 算吧啦 !! 我嘅目標只係希望每一次比賽成績都好過上一次，每一分一秒嘅進步，一點一滴嘅技巧增長，一絲一毫累積嘅運動知識，都帶來罄竹難書嘅喜悅，我真心相信我愛運動，我有運動癖!
明朝才子張岱寫過一首詩話：「人無癖不可與交，以其無深情也；人無疵不可與交，以其無真氣也。」意思係話無癖好無嗜好嘅人，做事唔慌會投入，呢種人無真摯情感，對朋友亦唔會有深情；兼夾無情無趣。而一個看起來毫無瑕疵嘅人，更不能交朋友，因為太假收藏真面目!
投入運動比賽嘅意外收穫係識多咗人，大部份都細我一截甚至一大截，多咗人同我討論運動交換心德，更多嘅係知道我跑馬拉松玩三鐵玩 IRONMAN 之後投以難以置信嘅目光問 : “ 嘩! 你玩啲咁嘢? 你貴庚呀? ” ，通常我會用堅定而帶一點溫柔嘅眼神回答: “ 係， 我係阿叔，我跑馬拉松玩三鐵，但唔好咁傻啦，只要有心，人人都可以玩到，你都得! ” 隨着對方回應以 “ 你咪點我喎!” 嘅眼神，話匣子因而好容易打開!
茂利 : 咁你係死唔認老咋嘛?
叔叔 : 傻啦，其實恰恰相反，喺歲月面前人人平等，無人可以長春不老，時間會喺臉容留下痕跡，亦總會在軀體留下歷煉，新陳代謝減慢，體力耐力反應力不復當年，肌肉鬆弛慢慢變成大肚 …….. But，呢一切其實可以透過有系統嘅運動及飲食而大幅度改善! 所有嘅 “ 原因 “ 都只係藉口，當然，人人有 Free Will，個個都可以選擇自己生活形式，但三十歲之後每個人都必須為自己健康同外形負責，高脂肪高膽固醇大肚腩隨咗有礙觀瞻之外仲好容易百病叢生，自己慘未算慘最慘係連累家人照顧你! 當然運動唔可以百份百避免病痛，但起碼機會大大降低，而你可以話我膚淺，但起碼唔會一身肥肉丟人現眼!
----- 廣告 Ad -----
茂利 : (望一望自己個肚腩) 妖，你即係寸我啫!
叔叔 : 咁多多少少梗有，再進一步睇，我相信近朱者赤嘅道理，一班喜愛運動嘅人，壞極有個譜，一班對需要咁辛苦操練嘅運動而依然甘之如飴嘅人，應該係一班對生命好有熱誠好積極嘅人，你幾時見過唉聲嘆氣消極頹廢嘅人會鐘意運動？我未見過，一個都未見過！經常同一大班咁正面嘅人喺一齊，人都醒神啲啦!
茂利 : 你又好似有少少道理喎，咁我走先嘞。
叔叔 : 咁急? 做乜?
茂利 : 我都係返屋企換衫去占度行下機，睇下結唔結識到對生命好有熱誠好積極嘅女仔至得 。
叔叔 : 妖，走罷啦你!
完。
(待續)
----- 廣告 Ad -----
