圖：政府新聞網
喺香港嘅渡海泳比賽裏面，我在役期間（編按：Erwin為前香港游泳隊代表），每年大概有五至六個渡海泳比賽，其中包括1月1號元旦冬泳、吐露港渡海泳、年初一近水灣冬泳、10月1號國慶海賽⋯⋯ 當年我無論渡海泳，以至冬泳比賽，都曾經攞過冠軍，屋企裏面50幾個獎杯，其中有40幾個都喺渡海泳奪得。最可惜嘅係，當年維港水質污染問題未解決，我無緣喺我巔峰嘅時期參加維港渡海泳。不過咁都好，如果唔係星期日（10月18日）上電視比人話偷步嗰個，一定會係我！！
渡海泳偷步係常識
每一個渡海泳比賽都會有Starter黎去發號施令，多數情況佢都會大嗌1~2~3~然後鳴槍！普羅大眾當然會覺得係一個正常嘅程序，但其實係我同埋幾個師兄弟嘅心裏面知道，發號施令果條友其實只係一個傀儡，真正嘅Starter，唔係……應該係話StarterS咪就係我哋嘅一眾師兄弟。當發號施令嗰位兄台嗌1，我哋就會衝出去再大嗌：「2，3，去呀！」，之後全世界就會一齊衝出去，要搵邊個先偷步都真係幾難。
咁你可以話嘅，今次嘅比賽係海上面出發而唔係沙灘上邊出發，咁邊有咁容易可以有計劃地偷步呀?! 咁梗係有計啦⋯⋯不過衰嘢唔好喺度講啦！
----- 廣告 Ad -----
今次泳總話：「冇架！冇得Restart！只可以取消資格DQ！」冇計啦佢都係做義工架嘛！唔通要佢同你哋講今次係大會準備不足係我哋嘅錯咩？算啦！個比賽成2500人參加，俾下面啦cut them some slack!
我唔係話比賽犯規係啱！只係話下次如果要犯規都犯得精明啲，唔好係電視上面講到好似好委屈咁啦。不過諗返轉頭，姑勿論係我十年前嗰陣，還是係星期日畀人DQ嗰幾個泳手，其實唔偷步都係會贏架啦！
Erwin
曾經代表香港參與多項游泳和水球的國際賽事，也是前澳洲昆士蘭省水球和游泳代表! 致力為大家分享健身knowledge&運動experience，使大家可以遠離肥胖，又能夠擁有一個beach body!! http://www.facebook.com/erwintrainingdiary