我的 Hong Kong 100 | 搏盡無悔! 贏咗自己!

雪雪茄 2023-02-23

字縮小字型大小。字重設字型大小。字放大字型大小。

疫情前 (2020) 曾參與過HK100嘅56公里，第2日就食100公里嘅花生十卜同學仔，連續2日都深深感受到大賽嘅好氣氛！於是決定2023年要報番場100公里實體賽體驗開心下 🤣

2020年Hong Kong 100 落場參與56公里賽事

2020年Hong Kong 100 做同學仔100公里嘅支援

結果衝完線同老公擁抱即爆喊!! 好L辛苦!!

呢個擁抱等左好耐

----- 廣告 Ad -----

你哋盡情笑我啦笑我啦我無問題架

我喺大半年前開始備賽，連續嘅2場100k打底，一直有好伙伴們打氣，同行扶持，喺彼此身上學習成長。加上同另一半並肩作戰，跑得好開心!  唯一狀況係入黑就眼瞓大跌watt!! 試過瞓5分鐘行1分鐘，試過行行下斷片瞌著左，試過食飯食糖食薯片食檸檬飲味精湯，試過食咖啡因gel照訓個胃又敏感，完全唔知道呢場HK100點樣跑到尾…… ☹️

2022年11月同老公完成Translantau 100公里虛擬賽

2022年12月同一班人去泰國嘻嘻哈哈玩Doi Inthanon 100公里

好多朋友問目標做幾多？

----- 廣告 Ad -----

「Sub16! 男金人!」

咁有幾大信心？

「50%! 唔瞓著先做到⋯」(我唔戴頭盔🪖嘅)

呢場唔單係時間嘅挑戰，更加係一場克服入黑眼瞓嘅突破! 走過5場100公里，好希望自己唔好再輸俾睡魔! 🤦🏽‍♀️

起點：北潭涌

係疫情後，香港嘅第一場100公里實體賽，好多參賽者，非常熱鬧！聽聞前一日56公里頭段上窰郊遊徑如年宵塞車，同Hill & Heal同學仔一齊開心打卡就快快上線等大會第一槍 🤩

俾前一日56公里實況相嚇親

當日100公里出發前嘅大合照

老公幫我係拱門前影嘅

SP : 東壩

可幸攝到靚位入上窰郊遊徑！ 路徑較窄，好多時跑緊需讓少少身位俾快腳越過，提醒自己小心禮讓，冼左落山坡仔受傷就唔抵，真係太窄就開聲講「等一陣，前面讓」。到西壩東壩石屎路況，更多選手超越自己，係短短12公里知道自己路跑底仍然好弱，不過唔緊要，用靚靚心情腳跑5分3輕鬆達陣就可以！最緊要輕鬆！😄

鋒師兄攝於上窰郊遊徑

----- 廣告 Ad -----

大會攝於東壩

CP1：鹹田

上緊西灣山途中感覺到空氣及溫度同剛才嘅東壩好唔同，無陽光直射，但焗促啲，濕度高，開始唧水濕少少面同後頸做降溫調節。平時好少跑到起水泡，經過第2個沙灘西灣覺得腳趾有啲痛，於是一埋站就搵義工拎凡士林搽磨甩左嘅皮同小水泡，好在未係好嚴重！😛當跑到石屎路況，感覺到前幾日著高踭鞋論盡拗到嘅左腳腕開始痛番，始終先開始20k左右，有少少擔心，盡量唔俾自己再拗到就安全！

大會攝於西灣

Nelson Wong 攝於鹹田灣

鋒師兄攝於鹹田CP之攪攪個水泡先

CP2：猴塘溪

“天氣熱！喺北潭坳買盒菊花茶飲住上牛耳石好爽！😆 又因為途中遇到怪獸sir、同學仔Ivan、Manyee、盛、攝影師跑步基好開心！😆

接住又好開心入CP見到其他同學仔打氣！多謝冰冰準備冰凍CC lemon+ ，仲有May嘅桔仔車厘茄🍊 另外非常感謝傑神俾成樽寶礦力我拎走 🙏🏽”

Max攝於牛耳石山之我個口好忙呀🧃

冰冰攝於猴塘溪CP嘅熱切之手🍊🍒

CP3：白沙澳

賽前，狀態好同差時都練習過慢jog大灘路況，希望比賽可以較慳力又唔太甩時間。 實況，有感未能好好運用出黎，當時曾懷疑自己係咪狀態跌咗而少少灰豬。賽後，發現自己唔太願jog係因為姨媽探訪前一日，正正係狀態差嘅時候，諗番轉頭真係盡咗力走左，無悔！自己認為，大灘路段係一個能力分水嶺，有幸見到女2 Anna跑手輕盈飛躍石頭，真係好有型！🤩

CP4：榕樹澳

唔係講笑，呢段路真係好熱好曬！ 當正夏日中午跑青山公路嘅感覺跑就岩！無刻意跑速度，順住自己覺得舒服嘅感覺慢跑，上斜都慢jog，開心仔！一埋站就狂淋水降溫，爽啊！😆

----- 廣告 Ad -----

大會攝於深涌往榕樹澳小徑之曬到擘唔開對眼

CP5：企嶺下

榕北走廊、雞公山都係曬住上！ 雞公山上10次有9.5次都係熱恰恰 😂  相信好多山友都感受過呢座399米，唔高卻特別辛苦！先前提及嘅左腳腕係跑過榕樹澳後明顯痛多左，放鬆落到企嶺下就同supporters講需要噴撒隆巴斯同痴tape固定。多謝3爺幫我按腳放鬆下、再有大隻Max痴tape，老公同魔魔就張羅食嘅拎走嘅，讓我減少左憂慮！😚

Summer攝於雞公山之隻左腳好痛

Max攝於企嶺下燒烤場

魔魔攝於企嶺下燒烤場之俾仔仔圍

CP6：基維爾營

雖然突然嘅緊急處理，逗留時間比預期用多5分鐘，但無打算追番時間，行住斜坡等剛才食嘅雞粥同飯卷落左隔先！以前好怕麥4又長又迷幻，近呢幾年試過同老公順跑逆跑玩追逐戰、又同Naomi跑錯路自動加長版、再學鋒師兄跑番屋企，當跑緊時諗起啲回憶就好開心，笑住跑2個鐘！🤣 到營地有啲呆呆地，睇唔清人樣，多謝Yoyo同盛打氣！仲有補噴止痛嘅落膝頭！（膝頭爭氣啊！）

有哥攝於彎曲山

大會攝於麥徑第4段之諗緊開心回憶

CP7：畢架山

上雞胸山隱約仲有日照，掛住撳大脾上無盡快戴好頭燈，攪到要係平路企定定整3分鐘，呢啲小失誤要記低 😂 入黑跑嘅路徑，雙眼彷如失去距離感，憑身體記憶踩熟悉嘅石位，慢跑、爬樓梯就到！呢站初嚐大會嘅能量飲品Overstim Hydration Mix，一啖都想嘔，唔太啱飲，唯有捱到城門私補。

CP8：城門水塘

練習時有諗如何走分段，當時希望金山jog得晒2K斜坡做一個小挑戰，結果睡魔7點幾突襲，雙腳開始唔願跑，斜路轉為急步上，平少少就迫自己慢跑。好擔心睡魔跟到針草帽，開始食第一條含咖啡因嘅能量棒，亦諗住老公係城門等緊要快啲去到，再諗啲無聊嘅回憶片段有老公傍住我Z形爬過同一路段！唔想再敗俾睡魔！😵‍💫  就到樓梯前遇到三連貫強大完成者女7，先前係麥4萬里長城就已來回見過彼此幾次，觀察到佢路跑同落山能力高，同自己講努力係針草帽咬實佢，俾啲火黎！一埋站就同supporters講縮短休息時間，3分鐘內要走，老公好配合地即刻幫我換頭燈袋後備電、魔魔遞飯糰同將飯糰拎走、羅友準備濃縮版味精湯、大家為我打氣下飲過粥水就急急腳離開。

Zue攝於城門水塘CP之老公唔易做

CP9：鉛礦坳

係針山腳時，義工話我而家排緊第11位，俾心機追！ 當時諗只要追到女7就可以！ 係突然間，察覺自己上樓梯好重，心率不斷下跌，由133跌到低見117……  明明已經俾自己一個目標去跑，每個鐘食夠最少110卡有飯有電解，熟悉針草帽有主場之利…… 但睡魔再一次勾走半個魂魄。 心知不秒，即開第2包咖啡因能量棒，食左半條個胃唔太舒服，有啲反胃，知道自己用盡左食咖啡因嘅quota。 上緊草山時，愈黎愈覺得漫長，唔好話追女7，基本上黑夜中只有自己一個。 開始頹廢閃過停低恰一陣時，抬頭望個天，星空閃爍好靚，擰頭望城市，燈火璀璨熱鬧，好想將呢件事分享俾老公知，「我好眼瞓！」😂 沿途嘅分叉位都有義工留守，佢哋都追問同一問題「你bib幾多號？」，好似不斷提醒住自己，現時仲係排緊第11位。

終點：大帽山扶輪公園

“埋站時見到有另一女仔，同自己講真係要俾力頂埋佢，開turbo上四方山嘅樓梯，唔只要過一個身位，係要見唔到影果種！ 然後再過晒前面所有拎poles嘅男跑手，確保自己團火蓋過睡魔嘅誘惑！😤直到大帽山3板斜時，又開始細Z型行，果時好大風好凍，想拎件風褸出黎著而發現「唔。見。左！」，安慰自己連風都幫手刮醒自己清醒啲，凍就要跑埋佢等個人熱啲！

到白波果下就開始咬實前面個男人跑，初初係有啲距離，直到過埋再係禾塘崗第1節見到另一女仔落碎石路。 又同自己講要過就要第2節上樓梯時jog埋。唔係講笑，走左95K先jog樓梯，一到平地真係腳軟，頂埋佢，跑埋！落樓梯跳級轟埋！ 頭燈啲光又散又微弱，真係好驚差錯腳係咁先，但要轟就係而家！一跑出蓮姐小食亭就聽到蓮姐嗌我，好抱歉果時太專注未能俾到反應 😅

就喺最後100米多少少嘅大帽山道，遇上女9嘅身影，坦白講，自己極度缺乏自信，最無信心就係爆炸力衝100米。小時候運動會，被迫參與嘅無論係100米定200米我都係包尾，果份陰影面積無法計算，哈哈！

講番現場，最後果幾秒真係非常刺激！ 先係我發力跑，佢追上，自己再係入草地紅地毯範圍領先2個身位，再到佢爆多下伸腳踩計時板……當刻個腦有好多好多小劇場「我唔得架啦」「邊夠佢衝」「草地好冼呀頂」「唔想係鏡頭前仆直呀」「張相會好7架」「應該個身體壓線先定係腳出先」「好亂呀即係要點衝線」🌚🌚🌚

結果我哋相差0.01秒！！輸左名次，贏左自己！！

太盡力轟落山，以致老公、魔魔、Yvonne一攬我，我就開始喊⋯ 好L辛苦啊！！😭😭😭

頭70K跑得好開心，心情好好，入黑嘅30K用意志跑無訓到真係大躍進，做咩最尾自己最弱嘅落山項目會跑到成隻狗，想仆想仆咁L辛苦架！？ 🤮🤮🤮

仲有呀，做咩話我排第11位，跑極都係11 ！ ”