大戰在即，如箭在弦，百感交集 (攝於l’Index 2396m賽前試路)
大嬸一般俾人嘅印象係圓潤啲，少少幸福肥。而我未開始玩越野跑之前，身形已經偏瘦，媽媽話:「而家咁就靚啦，唔好再瘦。」
但自從開始訓練、參加比賽，體重就一路下滑——而家只剩45kg。媽媽見到我瘦到面尖尖，好似無飽飯食咁，成日都話:「食多啲啦，唔好再跑啦，跑到咁瘦!」
話雖如此，佢冇阻止我，因為知道我鍾意跑山，我就是任性。
----- 廣告 Ad -----
備戰OCC：慢腳的修行
2025年4月，我報咗專為 UTMB 系列賽設計嘅訓練班。同學個個都參加長距離: UTMB (174公里)、TDS (153公里)、CCC (101公里)、只有我一個參加OCC (57公里)，而且年紀最大，跑得最慢。
教練每星期派功課：指定距離、爬升、速度。同學個個交足功課，仲要超額完成。
我見到佢哋咁勤力，唔敢怠慢。壓力好大，但又唔想拖慢大家，唯有咬緊牙根追數。
最誇張係7月最後一日，我累積爬升咗9600米，仲要死死地氣追埋400米，因想突破一萬米爬升關口。其實教練只係要求OCC爬升嘅兩倍 (3300米 x 2)，但大家好似有強迫症咁，不斷挑戰自己。
輪迴連姐、波頂、間中去埋妙高台和四方山的日子
傷患來襲：行水變黑妹
操得太多，腰緊引致腿部神經痛。開始擔心影響訓練進度，甚至出唔到賽。
醫師建議減操、去泳池「行水」。我好聽話，停操兩星期，日日行水，有時間就加埋泰式按摩或中式推拿。
----- 廣告 Ad -----
但「行水」都有代價——原來水中紫外線比陸上更強，全身 (除腳板底外) 曬到黑晒，之前嘅美白工程正式報銷 。
比賽前夕：負面情緒浮現
大會預測會有暴雨，起步時間延遲兩小時，新增兩件 mandatory gears：防水長褲 (我有) 和防水手套 (我冇)。
即刻去買英國名牌 Dexshell 防水手套，再加防水襪 (呢個好有用，真心推介)，課金不菲 。
快將起步，負面情緒浮現，我開始擔心: 天雨路滑、怕冷、怕跣、怕受傷……最怕媽媽擔心。
我定下目標: 安全完賽，不要受傷，要活著回來。
風景優美，但要步步為營
比賽日：驚險一幕
天氣唔算太差，但賽道技術性高、爬升多。捱到CP4前，出現驚險一幕：
我在山坡失足，翻咗兩個筋斗，背包物件、眼鏡、帽子飛晒岀來，幸好有矮樹頂住，人冇受傷。我慢慢爬番上賽道，繼續比賽。(後來發現新買的防水手套唔見咗，超肉痛!)
最漫長的10K：迎來接放學的滾動
因為起步時間延遲，最後10K要開頭燈。夜山係我最弱一環，因我有散光，要在昏暗的環境中前行，路面又多石，仲要落大雨，我唔敢再跑快，被迫要開郊遊mode，這是我山賽中最漫長和煎熬的10K。
----- 廣告 Ad -----
我知道有幾位同學會接放學，佢哋有些剛完成 TDS，有些要準備 UTMB，我想快啲到終點，唔想阻礙佢哋休息，奈何雙腳已不由我話事，心急如焚。終於捱到河邊時，傳來陣陣打氣鈴聲，即時好 high，突然出現教練和同學的面孔，我異常滾動，即開衝 interval mode。
對不起，讓你哋久等了！衷心感激接我放學的教練和同學，並鳴謝在香港為我打氣的好友
衝線後，我站在拱門下的一刻，感到十分夢幻。5個月艱苦訓練，超額完成課表，腳痛、曬黑、瘦到唔似人形……換來組別第十名 。能夠完成這個殿堂級國際賽事，一切都值得！
發夢也未諗過我可以站在這裡
任務完成：媽媽，我冇事!
我打電話俾媽媽，話我完賽，冇受傷（當然冇講跌落山果段，亦知道佢冇fb同ig，又唔會睇Fitz）。
聽得出媽媽鬆咗一口氣，仲叫我快啲去休息、食返啲嘢。
我聽住聽住，眼淚就流出嚟。
後記：我係唔係不孝？
媽媽已經88歲，應該係無憂無慮享福嘅年紀，我仲要令佢添煩添憂，擔心我會唔會跌親、會唔會受傷。
我唔知自己係唔係不孝？我唔知自己應唔應該繼續參加越野跑比賽？但我知道，媽媽冇阻止我，因為佢知道——我跑得辛苦，但跑得開心。佢見到我開心，佢仲開心。
媽媽，我愛您！
是妳溫馨的目光，教我堅毅望著前路，叮囑我跌倒不應放棄
